انتخابات کے لیے انتظامیہ تیار، ڈویژنل کمشنر نے آٹھوں اضلاع کی تیاریوں کا جائزہ لیا

چھترپتی سمبھاجی نگر: 21 اکتوبر (نمائندہ اعتبار) اورنگ آباد ڈویژن گریجویٹ حلقۂ انتخاب کے لیے انتظامیہ پوری طرح تیار ہوگئی ہے۔ ووٹنگ کا عمل پُرامن، بے خوف اور شفاف طریقے سے مکمل کرنے کے لیے تمام متعلقہ محکمے باہمی تال میل کے ساتھ کام کریں۔ یہ ہدایات ڈویژنل کمشنر اور الیکشن رٹرننگ آفیسرجی۔ شری کانت نے جاری کیں۔جمعہ، 23 اکتوبر کو ہونے والی ووٹنگ کے پیش نظر انہوں نے آج بدھ کی دوپہر آن لائن میٹنگ کے ذریعے ڈویژن کے آٹھوں اضلاع کی انتخابی تیاریوں کا جائزہ لیا۔ اس میٹنگ میں چھترپتی سمبھاجی نگر، جالنہ، بیڑ، لاتور، دھاراشیو، پربھنی، ناندیڑ اور ہنگولی اضلاع میں انتخابی انتظامات کا جائزہ لیا گیا۔اس موقع پر پولنگ مراکز پر بنیادی سہولیات، ووٹروں کے لیے ضروری انتظامات، انتخابی سامان کی دستیابی، افسران اور ملازمین کی تعیناتی اور پولنگ مراکز پر سکیورٹی انتظامات کے بارے میں معلومات حاصل کی گئیں۔ اس کے علاوہ پولنگ مراکز کے اطراف سیاسی جماعتوں کے بوتھ قائم کرنے کے لیے کیے گئے انتظامات کا بھی جائزہ لیا گیا۔ووٹروں کو اپنے حقِ رائے دہی کے استعمال میں کسی قسم کی دشواری پیش نہ آئے، اس کے لیے پولنگ مراکز میں داخلے کے انتظامات، ضروری سہولیات، رہنمائی کے لیے سائن بورڈز اور ووٹنگ کے عمل کے لیے تعینات عملے کی تیاری کو یقینی بنانے پر زور دیا گیا۔انتخابی سامان کی تقسیم، بیلٹ باکس کی محفوظ نقل و حمل، ووٹنگ کے بعد بیلٹ باکس جمع کرنے کے انتظامات اور ووٹوں کی گنتی کے مراکز پر تیاریوں کے سلسلے میں بھی متعلقہ ضلع انتظامیہ کو ضروری ہدایات دی گئیں۔اورنگ آباد ڈویژن گریجویٹ حلقۂ انتخاب میں آٹھ اضلاع شامل ہیں اور اس انتخاب میں 41 امیدوار میدان میں ہیں۔ اس انتخاب میں مجموعی طور پر 3 لاکھ 26 ہزار 701 ووٹرز اپنے حقِ رائے دہی کا استعمال کریں گے۔ آٹھوں اضلاع میں 842 پولنگ مراکز پر ووٹنگ ہوگی۔ جمعہ، 23 اکتوبر کو صبح 8 بجے سے دوپہر 4 بجے تک ووٹنگ کا وقت مقرر کیا گیا ہے۔بیلٹ پیپر پر ترجیحی ترتیب درج کرکے ووٹ ڈالنا ہوگا، اس لیے ووٹروں کو درست طریقے سے ووٹ ڈالنے کے بارے میں رہنمائی فراہم کرنے کی ہدایات بھی دی گئی ہیں۔انتخابی عمل کو پُرامن اور شفاف طریقے سے مکمل کرنے کے لیے تمام متعلقہ افسران چوکس رہیں، ووٹنگ کے دن پیش آنے والی ممکنہ دشواریوں کو فوری طور پر دور کرنے کے اقدامات کریں اور تمام محکمے آپس میں تال میل برقرار رکھیں۔ یہ ہدایات ڈویژنل کمشنر جی۔ شری کانت نے اس موقع پر جاری کیں۔