بافنا ٹی پوائنٹ تا دیگلور ناکہ سڑک کی خستہ حالی اور ٹریفک جام پر فوری کارروائی کا مطالبہ

ناندیڑ: یکم؍ اکتوبر(نامہ نگار) بافنا ٹی پوائنٹ سے دیگلور ناکہ اور آگے وازیرگاؤں پولیس چوکی تک سڑک کی خستہ حالی، سڑک کی کم ہوتی چوڑائی، ٹریفک جام اور بڑھتے ہوئے حادثات کے پیش نظر متعلقہ انتظامیہ سے فوری اقدامات کا مطالبہ کیا گیا ہے۔اس سلسلے میں کانگریس پارٹی کے اقلیتی سیل کے بلاک صدر عبدالرحیم پٹیل نے ناندیڑ-واگھالہ شہر میونسپل کارپوریشن کے کمشنر اور ناندیڑ کے ضلع کلکٹر کو الگ الگ مکتوب پیش کیے ہیں۔
سڑک کی چوڑائی کم ہونے سے حادثات کا خدشہ:
میونسپل کمشنر کو دیے گئے مکتوب میں کہا گیا ہے کہ گزشتہ ڈھائی ماہ سے بافنا ٹی پوائنٹ کے مقام پر سڑک کے درمیان ٹین شیڈ کی تعمیر کا کام جاری ہے۔ اس کے باعث ٹریفک کے لیے دستیاب سڑک کی چوڑائی کم ہو گئی ہے۔ مکتوب کے مطابق پہلے تقریباً 20 فٹ چوڑی سڑک دستیاب تھی، جو اب دونوں جانب سے تقریباً 10 سے 12 فٹ تک محدود ہو گئی ہے۔ سڑک کی خراب حالت کے باعث گاڑی چلانے والوں کو مشکلات کا سامنا کرنا پڑ رہا ہے اور اس مقام پر بار بار حادثات بھی پیش آ رہے ہیں۔ اس لیے بافنا ٹی پوائنٹ تا دیگلور ناکہ راستے کے دونوں جانب خراب سڑک کی فوری مرمت کرنے کی درخواست کی گئی ہے۔
رات کے وقت اندھیرے سے بھی شہریوں کو خطرہ:
مکتوب میں مزید کہا گیا ہے کہ سڑک پر ڈوائیڈر پول نصب کیے جانے کے باعث رات کے وقت پورے علاقے میں اندھیرا رہتا ہے، جس سے شہریوں کی سلامتی کا مسئلہ پیدا ہو رہا ہے اور مبینہ طور پر لوٹ مار کے واقعات بھی پیش آتے ہیں۔اس صورتحال کے پیش نظر سڑک کے دونوں جانب عارضی ڈوائیڈر پول؍پتّیاں لگا کر فوری طور پر روشنی کا انتظام شروع کرنے کا مطالبہ کیا گیا ہے۔ ساتھ ہی سڑک کی مرمت اور روشنی کے انتظام کے سلسلے میں ضروری کارروائی کرنے کی درخواست کی گئی ہے۔
بھاری گاڑیوں کی آمدورفت پر عارضی پابندی کا مطالبہ:
دوسرے مکتوب میں ضلع کلکٹر سے بافنا ٹی پوائنٹ سے وازیرگاؤں پولیس چوکی تک بھاری گاڑیوں کی آمدورفت پر عارضی پابندی عائد کرنے کی درخواست کی گئی ہے۔مکتوب کے مطابق بافنا ٹی پوائنٹ پر سڑک کی توسیع کا کام شروع ہونے کے باعث سڑک کے درمیان ٹین شیڈ تعمیر کیے گئے ہیں، جس سے سڑک کی دستیاب چوڑائی کم ہو گئی ہے۔ نتیجتاً اس راستے پر بار بار ٹریفک جام کی صورتحال پیدا ہو رہی ہے اور ٹریفک کے نظام پر بھی اثر پڑ رہا ہے۔ مکتوب میں اس راستے پر حادثات میں اضافے کا بھی ذکر کیا گیا ہے۔عبدالرحیم پٹیل نے مطالبہ کیا ہے کہ شہریوں کی سلامتی اور ٹریفک کو رواں رکھنے کے لیے بافنا ٹی پوائنٹ تا واجے گاؤں پولیس چوکی راستے پر بھاری گاڑیوں کی آمدورفت عارضی طور پر روکی جائے اور بھاری گاڑیوں کے لیے متبادل راستے کا فوری انتظام کیا جائے۔
انتظامیہ سے فوری مداخلت کی اپیل:
دونوں مکتوب میں شہریوں کی سلامتی اور ٹریفک کو منظم رکھنے کے لیے فوری مداخلت کی اپیل کی گئی ہے۔ ایک طرف سڑک کی مرمت اور روشنی کا انتظام کرنے، جبکہ دوسری طرف بھاری گاڑیوں کی آمدورفت کو متبادل راستے کی جانب منتقل کرنے کا مطالبہ کیا گیا ہے۔مکتوب پر عبدالرحیم پٹیل، بلاک صدر (اقلیتی سیل)، کانگریس پارٹی، دیگلور ناکہ، ناندیڑ کے دستخط موجود ہیں۔