گریجویٹ حلقۂ انتخاب کے الیکشن کے لیے ناندیڑ انتظامیہ تیار

ناندیڑ:28؍ستمبر (نمائندہ اعتبار)مہاراشٹر قانون ساز کونسل کے 5۔اورنگ آباد ڈویژن گریجویٹ حلقۂ انتخاب کے دو سالہ انتخابات کے پیشِ نظر ناندیڑ ضلع انتظامیہ نے انتخابی تیاریوں میں تیزی پیدا کردی ہے۔ انتخابات کے تمام مراحل مقررہ وقت پر اور خوش اسلوبی سے مکمل کرنے کے لیے مختلف شعبے قائم کرکے افسران و ملازمین کی ذمہ داریاں طے کردی گئی ہیں۔ضلع کلکٹر راہل کرڈیلے نے متعلقہ افسران اور ملازمین کو ضابطۂ اخلاق پر سختی سے عمل کرنے کی ہدایت دی ہے۔ انہوں نے کہا کہ انتخابی عمل شفاف اور غیر جانب دارانہ طریقے سے مکمل کرنے کے لیے تمام محکمے باہمی تال میل کے ساتھ کام کریں۔ضلع کلکٹر دفتر میں ضلع کلکٹر راہل کرڈیلے کی صدارت میں 5۔اورنگ آباد ڈویژن گریجویٹ حلقۂ انتخاب کے دو سالہ انتخابات کے سلسلے میں تشکیل دی گئی مختلف کمیٹیوں کے نوڈل افسران اور ان کے ماتحت افسران و ملازمین کا جائزہ اجلاس منعقد ہوا۔ اس موقع پر ایڈیشنل ضلع کلکٹر رتن دیپ گائیکواڑ، نائب ضلع انتخابی افسر راج کمار مانے، تمام سب ڈویژنل افسران، نوڈل افسران اور متعلقہ ملازمین موجود تھے۔انتخابی عمل کے لیے نامزدگی اور ووٹر فہرست، ضابطۂ اخلاق، قانون و نظم و نسق، تربیت، بیلٹ پیپر کی جانچ اور تقسیم، ووٹر بیداری و سہولیات، گاڑیوں اور ٹرانسپورٹ کا انتظام، پولنگ عملے کی تعیناتی، پوسٹل بیلٹ پیپر، آئی ٹی اور پولنگ ڈے رپورٹنگ، اسٹرانگ روم اور ووٹوں کی گنتی، غیر قانونی شراب کی نقل و حمل کی روک تھام، انتخابی اخراجات کی نگرانی، میڈیا مانیٹرنگ، ووٹر مدد اور شکایات کے ازالے سمیت مختلف شعبے قائم کیے گئے ہیں۔انتظامیہ کی جانب سے ووٹروں کو ضروری سہولیات فراہم کرنے، معذور اور بزرگ ووٹروں کی مدد کرنے، پولنگ مراکز پر مطلوبہ عملہ اور انتخابی سامان دستیاب رکھنے، ووٹنگ کے بعد بیلٹ باکس کو محفوظ طریقے سے اسٹرانگ روم میں منتقل کرنے اور سی سی ٹی وی و سکیورٹی کے مناسب انتظامات کو یقینی بنانے کا منصوبہ بھی تیار کیا گیا ہے۔انتخابی اخراجات پر نظر رکھتے ہوئے امیدواروں اور سیاسی جماعتوں کے اخراجات کا ریکارڈ مرتب کرنا، میڈیا میں شائع ہونے والی انتخابی خبروں کی نگرانی کرنا اور ووٹروں کی شکایات کا فوری ازالہ کرنا بھی متعلقہ شعبوں کی ذمہ داری ہوگی۔ضلع کلکٹر راہل کرڈیلے نے ہدایت دی کہ الیکشن کمیشن کی رہنما ہدایات کے مطابق تمام افسران و ملازمین اپنی ذمہ داریاں پوری مستعدی کے ساتھ انجام دیں۔ انہوں نے خصوصی طور پر کہا کہ کسی بھی صورت میں ضابطۂ اخلاق کی خلاف ورزی نہ ہونے پائے، اس بات کا خاص خیال رکھا جائے۔