اسٹاف سلیکشن کمیشن (SSC) امتحان کے پیشِ نظر امتناعی احکامات نافذ

ناندیڑ: 28 ستمبر(نمائندہ اعتبار) اسٹاف سلیکشن کمیشن (SSC) کی جانب سے ناندیڑ میں کمپیوٹر پر مبنی امتحان منعقد کیا جا رہا ہے۔ امتحان کے دوران امن و امان برقرار رکھنے اور امتحانی عمل کو شفاف و پُرسکون ماحول میں مکمل کرنے کے مقصد سے ضابطۂ شہری تحفظ، 2023 کی دفعہ 163 کے تحت ضلع انتظامیہ کی جانب سے امتناعی احکامات جاری کیے گئے ہیں۔ناندیڑ شہر کے گورنمنٹ ٹیکنیکل کالج، بابانگر اور ناندیڑ دیہی پولیس اسٹیشن کی حدود میں واقع وسنت راؤ نائک کالج، وسرنی کو امتحانی مراکز مقرر کیا گیا ہے۔جاری حکم کے مطابق 30 ستمبر سے 28 اکتوبر 2026 تک صبح 7 بجے سے شام 7 بجے کے دوران امتحانی مراکز کے اطراف 500 میٹر کے علاقے میں امیدواروں اور امتحانی امور سے وابستہ افسران و ملازمین کے علاوہ دیگر افراد کے داخلے پر پابندی رہے گی۔اسی طرح امتحانی مراکز کے 500 میٹر کے دائرے میں موبائل فون، ٹیلی فون، ٹی وی، لاؤڈ اسپیکر، فوٹو کاپی مشین اور دیگر مواصلاتی آلات کے استعمال کی بھی اجازت نہیں ہوگی۔ امتحانی عملے کے علاوہ کسی بھی شخص کو اس علاقے میں کمپیوٹر، لیپ ٹاپ، کیلکولیٹر، ریڈیو یا ٹرانزسٹر استعمال کرنے سے بھی روک دیا گیا ہے۔امتحانی مراکز کے اطراف موجود لاؤڈ اسپیکر، عوامی ٹیلی فون اور دیگر مواصلاتی ذرائع کو بھی مقررہ مدت کے دوران بند رکھنے کی ہدایت دی گئی ہے۔امتحان کے دوران کسی بھی قسم کی رکاوٹ یا ناخوشگوار واقعے کی روک تھام کے لیے امتحانی مراکز پر پولیس افسران اور اہلکار تعینات کیے جائیں گے۔ ناندیڑ کے پولیس سپرنٹنڈنٹ نے تمام متعلقہ افراد سے امتناعی احکامات پر سختی سے عمل کرنے کی اپیل کی ہے۔