وزیرِ اعلیٰ دیویندر فڈنویس کا واشم کے خشک سالی سے متاثرہ علاقوں کا دورہ

ملکاپور: 25 / ستمبر (محمد احسان سر ) ریاست میں بارش کی طویل غیر موجودگی کے باعث کپاس، سویا بین اور دیگر فصلوں کو درپیش نقصان اور کسانوں کی مشکلات کا جائزہ لینے کے لیے وزیرِ اعلیٰ دیویندر فڈنویس نے ودربھ کے دو روزہ دورے کے دوران 24 ستمبر کو ضلع واشم کے کارنجہ لاڈ، منگرول پیر، مالیگاؤں سمیت مختلف خشک سالی سے متاثرہ علاقوں کا دورہ کیا. اس موقع پر انہوں نے کسانوں سے براہِ راست ملاقات کرکے فصلوں کی موجودہ صورتحال، بارش کی کمی سے پیدا ہونے والے مسائل اور حکومتی امداد سے متعلق ان کی توقعات کے بارے میں تفصیلی معلومات حاصل کیں.
وزیرِ اعلیٰ نے مختلف علاقوں میں کسانوں سے روبرو گفتگو کرتے ہوئے ان کی مشکلات اور فصلوں کو پہنچنے والے نقصان کی تفصیلات توجہ سے سنیں. کسانوں نے کپاس، سویا بین اور دیگر فصلوں کی موجودہ صورتحال، پانی کی قلت اور بارش نہ ہونے کے باعث پیدا ہونے والی دشواریوں سے انہیں آگاہ کیا. وزیرِ اعلیٰ نے فصلوں کو پہنچنے والے نقصان پر افسوس کا اظہار کرتے ہوئے کسانوں کو ضروری حکومتی تعاون اور امداد فراہم کرنے کی یقین دہانی کرائی.
کارنجہ لاڈ، مالیگاؤں اور منگرول پیر سمیت مختلف علاقوں میں بڑی تعداد میں کسانوں نے وزیرِ اعلیٰ سے ملاقات کی اور اپنے مطالبات و مسائل پیش کیے. وزیرِ اعلیٰ نے کسانوں کی باتیں سننے کے ساتھ ساتھ موقع پر موجود متعلقہ افسران سے فصلوں اور نقصانات کی صورتحال کے بارے میں معلومات حاصل کیں اور ضروری کارروائی کے لیے ہدایات جاری کرنے کا یقین دلایا. وزیرِ اعلیٰ نے انتظامیہ اور متعلقہ محکموں کے افسران کو ہدایت دی کہ کسانوں کی مشکلات کے ازالے کے لیے مؤثر تال میل کے ساتھ کام کیا جائے اور فصلوں کو پہنچنے والے نقصان سے متعلق ضروری معلومات اور اعداد و شمار بروقت جمع کیے جائیں، تاکہ متاثرہ کسانوں تک حکومتی امداد پہنچانے کے لیے مناسب اقدامات کیے جا سکیں.
اس موقع پر زرعی کمشنر، ضلع کلکٹر، تحصیلدار، تعلقہ زرعی افسر سمیت مختلف متعلقہ محکموں کے افسران موجود تھے. اس کے علاوہ مختلف علاقوں سے بی جے پی اور راشٹروادی کانگریس (اجیت پوار) کے مقامی قائدین، عہدیداران اور کارکنان بھی موجود رہے.
وزیرِ اعلیٰ کے اس براہِ راست کسان رابطے کے دوران مقامی کسانوں کو اپنی فصلوں کی صورتحال، نقصانات، مشکلات اور توقعات حکومت کے نمائندے کے سامنے براہِ راست رکھنے کا موقع ملا. دورے کے دوران وزیرِ اعلیٰ نے متاثرہ کسانوں کے مسائل کو سنجیدگی سے لیتے ہوئے ضروری اقدامات اور نقصان کے ازالے کے لیے حکومتی سطح پر مناسب کارروائی کی یقین دہانی کرائی. تصویر میں: وزیرِ اعلیٰ دیویندر فڈنویس کے ہمراہ کارنجہ لاڈ کے معروف ایڈووکیٹ جنید خان، جو راشٹروادی کانگریس ( اجیت پوار ) سے وابستہ ہے، نظر آ رہے ہے.