ناندیڑ: واجے گاؤں تا بافنا ٹی پوائنٹ پل کے کام کا جائزہ

ناندیڑ:2ستمبر(نمائندہ اعتبار) سمردھی مہامارگ منصوبے کے تحت ناندیڑ شہر میں واجے گاؤں تا بافنا ٹی پوائنٹ کے درمیان زیرِ تعمیر پل کے کام کا تفصیلی جائزہ لینے کے لیے 2 ستمبر 2026 ءکو میونسپل کارپوریشن میں میئر محترمہ کویتا سنتوش مولے کی صدارت میں ایک اہم جائزہ اجلاس منعقد ہوا۔ اجلاس میں پل کی تعمیر کے دوران کیے جانے والے مختلف اقدامات اور ضروری احتیاطی تدابیر پر تفصیلی تبادلۂ خیال کیا گیا۔واجے گاؤں سے بافنا ٹی پوائنٹ کے درمیان تعمیر ہونے والا یہ پل شہر کے آمدورفت کے نظام اور مستقبل کی ٹریفک کے لحاظ سے انتہائی اہم منصوبہ ہے۔ تاہم، پل کی تعمیر کے دوران مقامی شہریوں اور گاڑی چلانے والوں کو کسی قسم کی دشواری کا سامنا نہ کرنا پڑے، اس کے لیے انتظامی سطح پر پیشگی تیاری ضروری ہے۔ اسی پس منظر میں میئر نے پہل کرتے ہوئے اس خصوصی اجلاس کا انعقاد کیا تھا۔اجلاس کے دوران پل کی تعمیر کے مقام پر حفاظتی اقدامات پر خصوصی توجہ دی گئی۔ میئر نے متعلقہ محکموں کو ہدایت دی کہ تعمیراتی کام کے دوران سڑک پر ٹریفک کی روانی برقرار رکھنے کے لیے مناسب متبادل راستوں کی منصوبہ بندی کی جائے، حادثات سے بچنے کے لیے تعمیراتی علاقے میں ضروری سمت نما بورڈ اور بیریکیڈز نصب کیے جائیں اور رات کے وقت گاڑی چلانے والوں کو واضح طور پر نظر آنے کے لیے مناسب روشنی کا انتظام یقینی بنایا جائے۔ اس کے علاوہ تعمیراتی کام کے دوران اڑنے والی دھول سے شہریوں کو ہونے والی پریشانی سے بچنے کے لیے بھی ضروری احتیاط برتنے کی ہدایت دی گئی۔
اس اہم جائزہ اجلاس میں ڈپٹی میئر دیپک سنگھ راوت، ایڈیشنل کمشنر گریش کدم، ڈپٹی کمشنر س۔ اجیت پال سنگھ سندھو، مہاراشٹر اسٹیٹ روڈ ڈیولپمنٹ کارپوریشن (MSRDC) کے ایگزیکٹیو انجینئر رام داس کھلسے، کنٹریکٹر کمپنی کے پروجیکٹ مینیجر لیونڈر سنگھ سیروہی، اتھارٹی انجینئر دیشمانے، میونسپل کارپوریشن کے کارپوریٹر محمد مسعود احمد خان، گروپ لیڈر س۔ مجیب، عبد اللطیف عبد المجید، سُمیت موتھا، محمد ناصر احمد اور متعلقہ محکموں کے افسران موجود تھے۔اجلاس میں موجود کارپوریٹروں نے تعمیراتی مقام پر شہریوں کو پیش آنے والی ممکنہ دشواریوں کی نشاندہی کی۔ MSRDC کے افسران نے پل کے کام کی موجودہ صورتحال اور پیش رفت کی معلومات پیش کرتے ہوئے یقین دلایا کہ عوامی نمائندوں کی جانب سے تجویز کردہ تمام حفاظتی اقدامات اور احتیاطی تدابیر پر سختی سے عمل درآمد کیا جائے گا۔ اجلاس میں میونسپل کارپوریشن اور MSRDC کے درمیان مناسب تال میل برقرار رکھتے ہوئے کام کو مقررہ وقت میں محفوظ طریقے سے مکمل کرنے کے عزم کا اظہار کیا گیا۔
میئر کی ہدایات:
پل کی تعمیر کے دوران مختلف محکموں کے درمیان بہتر تال میل برقرار رکھنے کے لیے ایک خصوصی ’کوآرڈی نیشن کمیٹی‘ تشکیل دی جائے۔ اس کمیٹی میں میونسپل کارپوریشن کے متعلقہ افسران، علاقے کے کارپوریٹر، پولیس انتظامیہ اور مہاوِترن کے افسران کو شامل کیا جائے۔اس کے علاوہ منصوبے کی منصوبہ بندی اور کام کی مکمل تفصیلات سے واقفیت کے لیے آئندہ 8 دن کے اندر پورے منصوبے کی تفصیلی پریزنٹیشن PPT کی شکل میں پیش کی جائے۔ PPT پریزنٹیشن کے بعد تمام متعلقہ محکموں کے افسران اور کمیٹی کے ارکان موقع پر جاکر مشترکہ معائنہ کریں، تاکہ زمینی صورتحال کے مطابق آئندہ کے فیصلے کیے جاسکیں۔