افسانچہ: گھر کی راہ

از قلم عارف محمد خان، جلگاؤں

عید کی خوشیاں ابھی آنکھوں میں تھیں کہ صحرا نے راستہ روک لیا۔
ٹرک خاموش ہوا تو سب نے سمجھا، تھوڑی دیر کی بات ہے۔ مگر سورج سر پر چڑھتا گیا اور پانی زمین کی آخری دعا بن گیا۔
ایک ایک کر کے آوازیں بجھتی رہیں۔ کسی نے گھر کا نام لیا، کسی نے ماں کو یاد کیا، کسی نے بچوں کی تصویر آنکھوں میں بسائے آخری سانس لی۔
جب امدادی ٹیم پہنچی تو ٹرک وہیں کھڑا تھا، مگر اس کے مسافر اپنے گھروں سے پہلے مٹی کے گھر پہنچ چکے تھے۔
صحرا آج بھی ویسا ہی ہے، فرق صرف اتنا ہے کہ اس کی ریت کے نیچے اب چند ادھورے خواب بھی دفن ہیں۔