’’زبانِ اردو کا نیا سفیر – سید حسین اختر‘‘

تحریر: رغیب الرّحمٰن انعامدار

ادب کی دنیا میں کچھ تقرریاں محض رسمی نہیں ہوتیں – وہ عہد و پیمان بن جاتی ہیں۔
مہاراشٹر حکومت کی جانب سے جناب سیّد حسین اختر کو مہاراشٹر اسٹیٹ اُردو ساہتیہ اکادمی کا چیئرمین مقرر کیا جانا اردو زبان و ادب کے لیے ایک سنگِ میل کی حیثیت رکھتا ہے۔
یہ تقرری اس بات کا ثبوت ہے کہ حکومتِ مہاراشٹر اردو کے ادبی و ثقافتی ورثے کی بقا اور ترقی کے لیے نہ صرف سنجیدہ ہے بلکہ اس مشن کی قیادت اُن ہاتھوں میں دینا چاہتی ہے جنہیں زبان کی روح اور اس کے تہذیبی پس منظر کا شعور حاصل ہے۔
حسین اختر صاحب نہ صرف ایک تجربہ کار منتظم اور فعال سماجی شخصیت ہیں بلکہ اردو زبان کے ساتھ ان کی وابستگی جذباتی ہونے کے ساتھ فکری بھی ہے۔
ان کی شخصیت ایک ایسے ادیب کی ہے جو روایت اور جدیدیت کے سنگم پر کھڑا ہو کر اردو کو عصری تناظر میں دیکھنے کی صلاحیت رکھتا ہے۔
ان کے دورِ قیادت میں اُمید کی جاتی ہے کہ مہاراشٹر میں اردو زبان کے لیے نئے منصوبے، تعلیمی و ثقافتی سرگرمیاں، نوجوانوں کے لیے ادبی پلیٹ فارمز اور بین اللسانی روابط کے امکانات فروغ پائیں گے۔
یہ تقرری دراصل اردو زبان کے مستقبل پر یقین کی علامت ہے۔