متاثرین کے تمام مسائل کو ترجیحی بنیادوں پر حل کریں گے : نگراں وزیر اتل ساوے

٭ متاثرہ گاؤں کے شہریوں کو جلد ہی مستقل گھر دیے جائیں گے۔ نگراں وزیر کی جانب سے سیلاب متاثرین کو ذاتی امدادی چیک تقسیم
٭ حسنال، راونگاؤں، بھاسواڑی، مکروم آباد گاؤں کا دورہ کر کے جائزہ لیا ۔ متاثرین کو جلد ہی حکومتی امداد فراہم کی جائے گی

ناندیڑ:24 ؍اگست(نمائندہ اعتبار) گزشتہ ہفتے ناندیڑ ضلع کے مکھیڑ تعلقہ میں شدید بارشوں کی وجہ سے حسنال، راونگاؤں، بھنگولی، بھاسواڑی، اور مکروم آباد گاؤں میں سیلابی صورتحال پیدا ہوئی، جس سے بڑے پیمانے پر نقصان ہوا۔ کئی گھروں کو نقصان پہنچا، جبکہ ہزاروں ہیکٹر زرعی زمین پانی میں ڈوب گئی۔ نقصانات کا جائزہ لینے کے لیے پینچ نامے جاری ہیں، اور متاثرین کے تمام مسائل کو ترجیحی بنیادوں پر حل کیا جائے گا، ایسی یقین دہانی ریاستی وزیر برائے دیگر پسماندہ طبقات کی فلاح و بہبود، ڈیری ڈیولپمنٹ، غیر روایتی توانائی، اور معذوروں کی فلاح و بہبود، اور ناندیڑ ضلع کے نگراں وزیر اتلساوے نے دی۔ نگراں وزیر نے آج مکھیڑ تعلقہ کے حسنال، راونگاؤں، بھاسواڑی، اور مکروم آباد کے سیلاب سے متاثرہ گاؤں کا دورہ کیا اور سیلابی پانی سے ہونے والے نقصانات کا براہ راست جائزہ لیا، اور شہریوں سے بات چیت کی۔ ان کے ہمراہ رکن راجیہ سبھا اشوک چوہان، رکن اسمبلی ڈاکٹر تشار رتھوڑ، ضلع کلکٹر راہول کرڈیلے، ضلع پنچایت کی چیف ایگزیکٹو آفیسر میگھنا کاولی، پولیس سپرنٹنڈنٹ ابیناش کمار، دیگلور کے سب ڈویژنل آفیسر انوپ پاٹل، مکھیڑ کے تحصیلدار راجیش جادھو، اور متعلقہ محکموں کے افسران موجود تھے۔ نگراں وزیر نے کہا کہ سیلاب متاثرین کے تمام مسائل کو فوری طور پر وزیر اعلیٰ دیویندر فڑنویس کے سامنے پیش کیا جائے گا اور ان مسائل کو حل کیا جائے گا۔ متاثرین کو زیادہ سے زیادہ امداد فراہم کی جائے گی۔ اس موقع پر حسنال موضع میں نگراں وزیر نے ذاتی طور پر فوت شدگان کے وارثوں کو فی کس 50 ہزار روپے کے امدادی چیک تقسیم کیے۔ اس کے علاوہ متاثرہ گاؤں کے شہریوں کی جلد ہی بحالی کی جائے گی اور انہیں مستقل گھر فراہم کیے جائیں گے۔ نگراں وزیر اتل ساوے نے واضح کیا کہ حکومت متاثرین کے ساتھ مضبوطی سے کھڑی ہے اور ان کے مسائل حل کرنے کے لیے حکومتی امداد فراہم کی جائے گی۔ انہوں نے کہا کہ سیلاب سے متاثرہ علاقوں میں شہریوں کو بچانے اور ان کی مدد کے لیے ضلع انتظامیہ نے قابل تعریف کام کیا ہے اور وہ مسلسل رابطے میں رہ کر معلومات حاصل کر رہے ہیں۔ انہوں نے یہ بھی واضح کیا کہ جن علاقوں میں پانی داخل ہونے سے نقصان ہوا، اس کے ذمہ دار افسران کے خلاف کارروائی کی جائے گی۔
نگراں وزیر اتل ساوے کی جانب سے ذاتی طور پر امداد:
نگراں وزیر اتل ساوے نے حسنال موضع میں فوت شدگان کے وارثوں کو ذاتی طور پر فی کس 50 ہزار روپئےکے امدادی چیک تقسیم کیے۔ اس کے علاوہ، جن شہریوں کے گھروں میں پانی داخل ہوا تھا، انہیں 10 ہزار روپئےکے امدادی چیک بھی تقسیم کیے گئے۔ گزشتہ تین دنوں سے نگراں وزیر اتلساوے نے ضلع میں سیلابی صورتحال کا فوری نوٹس لیتے ہوئے سیلاب متاثرین کے لیے امدادی سامان فراہم کیا تھا۔ یہ سامان دیگلور کے سب ڈویژنل آفیسر اور مکھیڑ کے تحصیلدار کے ذریعے سیلاب سے متاثرہ گاؤں میں تقسیم کیا گیا۔ اس سامان میں روزمرہ کے استعمال کے کپڑے، ساڑی، ٹی شرٹ، ٹریک پینٹ، تولیہ، اور ضروری ادویات جیسے کہ پیراسیٹامول ٹیبلٹ سٹرپ، او آر ایس وغیرہ شامل تھے۔
نگراں وزیر اتل ساوے نے ضلع میں نقصانات کا جائزہ لیا:
آج صبح نگراں وزیر اتلساوے نے گورنمنٹ ریسٹ ہاؤس میں ضلع میں بارشوں سے ہونے والے نقصانات کا تفصیلی جائزہ لیا۔ اس موقع پر رکن راجیہ سبھااشوک چوہان، رکن پارلیمنٹ ڈاکٹر اجیت گوپچھڑے، رکن اسمبلی سری جیا چوہان، ضلع کلکٹر راہول کرڈیلے، ضلع پنچایت کی چیف ایگزیکٹو آفیسر میگھنا کاولی، پولیس سپرنٹنڈنٹ ابیناشکمار، میونسپل کمشنر مہیش کمار ڈوئی پھوڑےاور تمام محکموں کے سربراہان موجود تھے۔ اس موقع پر ضلع کلکٹر راہول کرڈیلےنے پریزنٹیشن کے ذریعے ضلع میں ہونے والے نقصانات کی معلومات فراہم کیں۔