ناندیڑ میں ویلفیئر پارٹی آف انڈیا کے نائب صدر مجتبیٰ فاروق سے خصوصی ملاقات

ناندیڑ:16؍اگست ( شیخ عمران) آج ناندیڑ میںویلفیئر پارٹی آف انڈیا کے قومی نائب صدر جناب مجتبیٰ فاروق صاحب سے شہر صدر شیخ محمود صاحب کی خصوصی ملاقات منعقد ہوئی۔ یہ دورہ ان آفیشل (Un-Official) نوعیت کا تھا، تاہم اس موقع پر نہایت سنجیدہ اور اہم موضوعات پر سیر حاصل گفتگو ہوئی۔اس ملاقات میں مقامی بلدیاتی انتخابات، ان کے طریقۂ کار، انتخابی حکمت عملی اورپارٹی کے استحکام کے لیے کیے جانے والے ممکنہ اقدامات پر تفصیلی مشاورت کی گئی۔ شرکاء نے اس بات پر زور دیا کہ تنظیمی ڈھانچے کو مزید مضبوط بنایا جائے تاکہ عوامی مسائل کے حل میں پارٹی کا کردار مؤثر اور فعال ہو۔بعد ازاں، ونچت بہوجن آگھاڑی کے ریاستی نائب صدرجناب فاروق احمد صاحب سے بھی خصوصی نشست ہوئی، جس میں ریاست مہاراشٹر کی موجودہ سیاسی صورتِ حال، اقلیتوں کو درپیش مسائل اور ان کے ممکنہ حل پر گہرائی سے تبادلۂ خیال کیا گیا۔ اس موقع پر ویلفیئر پارٹی کے دیگر ذمہ داران بھی موجود تھے۔ملاقات کا ماحول نہایت خوشگوار اور برادرانہ رہا، جبکہ باہمی تعاون اور مشترکہ جدوجہد کے عزم کا اظہار بھی کیا گیا۔ آخر میں جناب فاروق احمد صاحب نے روایتی انداز میں شال اور کتابیں پیش کر کے جناب مجتبیٰ فاروق صاحب کا پرتپاک استقبال کیا، جس سے تقریب کو مزید وقار اور یادگار بنانے میں مدد ملی۔یہ ملاقات نہ صرف پارٹی کی داخلی مضبوطی کے لیے اہم سنگ میل ثابت ہوگی بلکہ مستقبل میں عوامی خدمت اور سیاسی استحکام کے لیے مشترکہ حکمت عملی طے کرنے کا بھی ذریعہ ثابت ہوسکتی ہے۔