اسکولی طلبہ کو لے جانے والی بسوں کی جانچ

ناندیڑ:24 ؍جولائی(نمائندہ اعتبار):ریجنل ٹرانسپورٹ آفس کے خصوصی دستہ کے ذریعے 18 سے 30 جون 2025 ءکے دوران اسکولی طلبہ کو لانے اور لے جانے والی اسکول بسوں کی موٹر وہیکل ایکٹ کی دفعات اور موجودہ حکومتی قواعد کے مطابق جانچ کی گئی۔ اس جانچ مہم میں اسکول بسوں کے تمام جائز کاغذات اور بسوں کی جانچ کی جاتی ہے۔ اس کارروائی میں 89 بسوں پر کارروائی کی گئی اور 7 لاکھ 4 ہزار روپے جرمانہ عائد کیا گیا۔اس جانچ کے دوران جائز کاغذات پیش نہ کرنے والی، بغیر اجازت نامے یا اجازت نامے کی شرائط کی خلاف ورزی کرنے والی، اہلیت کا سرٹیفکیٹ نہ رکھنے والی، گاڑی میں غیر قانونی تبدیلیاں کرنے والی، سی سی ٹی وی اور ٹریکنگ سسٹم کا استعمال نہ کرنے والی، اسکولی طلبہ کی غیر قانونی نقل و حمل کرنے والی، نشستوں کی گنجائش سے زیادہ طلبہ کی نقل و حمل کرنے والی، جائز اسکول بس اجازت نامہ نہ رکھنے والی اور موٹر وہیکل ایکٹ کی دفعات کی پابندی نہ کرنے والی اسکول بسوں پر جرمانہ عائد کیا گیا اور موٹر وہیکل ایکٹ کے مطابق کارروائی کی گئی۔ضلع کی تمام تنظیموں، اسکول بس ڈرائیوروں اور مالکان سے اپیل کی گئی ہے کہ وہ اسکول بسوں کی جانچ کے دوران جرمانہ اور موٹر وہیکل ایکٹ کی دفعات کے مطابق کارروائی سے بچیں۔ اس کے لیے اسکولی طلبہ کی غیر قانونی نقل و حمل نہ کریں۔ گاڑی کے تمام جائز کاغذات ساتھ رکھیں۔ موٹر وہیکل ایکٹ کی دفعات کے مطابق جانچ کے دوران مطالبہ کیے جانے پر جائز کاغذات پیش کریں۔ اسکولی طلبہ کی نقل و حمل قواعد کے مطابق کریں۔ گاڑی کی ضبطی اور جرمانہ سے متعلق کارروائی سے بچیں۔ یہ اپیل ریجنل ٹرانسپورٹ افسر ناندیڑ نے کی ہے۔