18ویں انٹرنیشنل صوفی رنگ فیسٹیول 2026 کا شاندار افتتاح

اجمیر شریف:25 اگست (راست)تاریخی محفل خانہ، درگاہ حضرت خواجہ معین الدین چشتیؒ، اجمیر شریف میں 18ویں انٹرنیشنل صوفی رنگ فیسٹیول 2026 کا پُروقار افتتاح روحانی و صوفیانہ ماحول میں عمل میں آیا۔ فیسٹیول کے پہلے ہی روز ملک و بیرونِ ملک سے 50 ہزار سے زائد زائرین اور عقیدت مندوں نے شرکت کی، جو فیسٹیول کے اٹھارہ سالہ سفر کے بڑے اجتماعات میں شمار کیا جا رہا ہے۔فیسٹیول میں 43 ملکی و بین الاقوامی فنکار شرکت کر رہے ہیں۔ اس اہم ثقافتی و صوفیانہ پروگرام کی قیادت چشتی فاؤنڈیشن کے چیئرمین حاجی سید سلمان چشتی، فیسٹیول ڈائریکٹر ڈاکٹر عظیم ایس میمن، فیسٹیول ایڈوائزر سفیر ڈاکٹر فہیم ایف خان اور کوآرڈینیٹر استاد محمود شیخ کر رہے ہیں۔افتتاحی تقریب کی نظامت اور تلاوتِ کلامِ پاک کی سعادت سید فضیل چشتی نے حاصل کی۔ بعد ازاں انجمن خدام خواجہ کے سیکریٹری سید کلیم الدین چشتی نے دعائیہ اور خیرمقدمی کلمات پیش کیے۔حیدرآباد سے تشریف لائے معروف فنکار اور اردو و عربی خطاطی کے ماہر انیل چوہان نے بارگاہِ رسالت مآب ﷺ میں نعتِ پاک کا نذرانہ پیش کیا۔ ان کی شرکت اور فن کا یہ مظاہرہ اجمیر شریف کی اس مشترکہ گنگا جمنی تہذیبی روایت کی عکاسی کرتا ہے جو صدیوں سے مختلف مذاہب اور ثقافتوں کے درمیان محبت و ہم آہنگی کا پیغام دیتی آئی ہے۔قومی کونسل برائے فروغِ اردو زبان، نئی دہلی (NCPUL) کے پروجیکٹ اسسٹنٹ محمد قاسم نے نئی نسل کے لیے اردو زبان اور خطاطی کی اہمیت و افادیت پر پُرمغز خطاب کیا۔ تقریب کے اختتام پر چشتی فاؤنڈیشن کے چیئرمین حاجی سید سلمان چشتی نے اظہارِ تشکر کیا، جبکہ اندور سے تشریف لائے آفتاب قادری نے محفلِ سماع میں صوفیانہ کلام پیش کرکے حاضرین کو روحانی کیفیت سے سرشار کیا۔اس موقع پر حاجی سید سلمان چشتی، گدی نشین درگاہ اجمیر شریف و چیئرمین چشتی فاؤنڈیشن نے کہا:’’صوفی رنگ کوئی محض پرفارمنس نہیں، بلکہ رنگوں، لکیروں، حروف اور سُروں میں ادا کی گئی ایک دعا ہے۔ جب ایک ہی دن پچاس ہزار سے زائد طلبگارِ دل خواجہ غریب نواز کے آنگن میں قدم رکھتے ہیں تو وہ صرف سامعین بن کر نہیں آتے، بلکہ ایک ہی راہ کے مسافر بن کر آتے ہیں۔ خطاط کے قلم کا ہر نقش اور سماع کا ہر سُر وہی پیغام لیے ہوئے ہے جو اجمیر شریف صدیوں سے دنیا کو دیتا آیا ہے—سب کے لیے محبت، کسی کے لیے بغض نہیں۔‘‘فیسٹیول کے دوران دو نادر قرآنِ مجید کی خصوصی نمائش بھی منعقد کی گئی ہے۔ ان میں ایک قرآنِ مجید آبِ زم زم، گوند اور زعفران کے قدرتی امتزاج سے تحریر کیا گیا ہے، جبکہ دوسرا قرآنِ مجید مکمل طور پر دست دوز یعنی ہاتھ سے سلائی کیا گیا ہے۔ نادر قرآنِ مجید کی نمائش کے ساتھ لائیو خطاطی ورکشاپس اور روایتی لائیو قالین آرٹ پینٹنگ کے مظاہرے بھی حاضرین کی خصوصی توجہ کا مرکز بنے رہے۔18واں انٹرنیشنل صوفی رنگ فیسٹیول 2026، 26 اگست 2026 تک درگاہ اجمیر شریف میں جاری رہے گا۔ فیسٹیول کے دوران روزانہ خطاطی کے خصوصی سیشنز، فنکاروں کے لائیو مظاہرے، نادر مخطوطات و قرآنی فن پاروں کی نمائش اور شام کے اوقات میں محفلِ سماع کا اہتمام کیا جا رہا ہے۔منتظمین کے مطابق فیسٹیول میں مذہب، قومیت اور ثقافتی پس منظر کی تفریق کے بغیر تمام زائرین اور فنونِ لطیفہ سے دلچسپی رکھنے والے افراد کو شرکت کا موقع فراہم کیا جا رہا ہے۔ صوفی رنگ فیسٹیول کا بنیادی مقصد فن، خطاطی، موسیقی اور صوفیانہ روایت کے ذریعے محبت، امن، بھائی چارے اور باہمی ہم آہنگی کے پیغام کو فروغ دینا ہے۔