12 ستمبر کو قومی لوک عدالت، باہمی رضامندی سے مقدمات نمٹانے کا سنہری موقع

ناندیڑ :9؍ستمبر (نمائندہ اعتبار) مہاراشٹر اسٹیٹ لیگل سروسز اتھارٹی، ممبئی کی ہدایات کے مطابق اور ضلع لیگل سرویس اتھارٹی، ناندیڑ کے صدر و پرنسپل ضلع و سیشن جج نریندر برہمے کی رہنمائی میں ہفتہ، 12 ستمبر 2026 کو ناندیڑ ضلع کی تمام عدالتوں میں قومی لوک عدالت کا انعقاد کیا جائے گا۔ اس لوک عدالت میں عدالتوں میں زیرِ التوا قابلِ تصفیہ مقدمات کے ساتھ ساتھ مقدمہ دائر کرنے سے قبل کے معاملات بھی باہمی مفاہمت کے ذریعے نمٹائے جائیں گے۔آج کی مصروف زندگی میں وقت اور پیسے کی اہمیت کو مدنظر رکھتے ہوئے لوک عدالت مقدمات کو باہمی رضامندی سے نمٹانے کا ایک مؤثر موقع ہے۔ عدالتوں میں زیرِ التوا مقدمات کے فریقین اگر باہمی رضامندی سے سمجھوتہ کرنے کی کوشش کریں تو اس سے ان کا وقت اور اخراجات بچانے میں مدد ملے گی۔ اس کے علاوہ باہمی رضامندی سے تنازع ختم ہونے کے باعث فریقین کے باہمی مفادات اور خوش گوار تعلقات برقرار رکھنے میں بھی مدد ملے گی۔لوک عدالت میں باہمی رضامندی سے نمٹائے جانے والے مقدمات میں قابلِ تصفیہ فوجداری مقدمات، چیک باؤنس کے معاملات، بینک اور قرض وصولی کے مقدمات، وراثتی حقوق کے معاملات، موٹر حادثات میں معاوضے کے مقدمات، ٹریفک چالان، ملازمت سے متعلق معاملات، مزدور تنازعات، اراضی حصول، محکمۂ محصولات سے متعلق معاملات، بجلی کے بل، میونسپل کارپوریشن اور میونسپل کونسل کے پانی اور مکان ٹیکس کے معاملات، ٹیلی فون بل، ازدواجی و خاندانی تنازعات، تجارتی تنازعات، ثالثی کے معاملات، صارفین کے تنازعات، دیوانی مقدمات اور ثالثی یا باہمی تصفیے کے ذریعے قابلِ حل دیگر عدالتی معاملات شامل ہیں۔ اس کے علاوہ عدالت میں مقدمہ دائر کیے جانے سے قبل کے معاملات بھی لوک عدالت میں باہمی رضامندی سے نمٹائے جاسکیں گے۔ضلع لیگل سرویس اتھارٹی کے سکریٹری شرد دیشپانڈے نے فریقین سے اپیل کی ہے کہ وہ اپنے مقدمات جس عدالت میں زیرِ التوا ہیں، اس عدالت کے احاطے میں خود حاضر ہوکر لوک عدالت کے ذریعے اپنے معاملات باہمی مفاہمت سے نمٹانے کے اس سنہری موقع سے فائدہ اٹھائیں۔قومی لوک عدالت سے متعلق مزید معلومات کے لیے ضلع لیگل سرویس اتھارٹی، ناندیڑ یا قریبی عدالت میں قائم تعلقہ لیگل سرویس کمیٹی سے رابطہ کرنے کی اطلاع بھی دی گئی ہے۔