گردوارہ گیٹ نمبر 1 تا لنگر صاحب روڈ پر تجاوزات کے خلاف ناندیڑ میونسپل کارپوریشن کی سخت کارروائی

ناندیڑ:9؍ستمبر (نمائندہ اعتبار)ناندیڑواگھالہ شہر میونسپل کارپوریشن کی تجاوزات مخالف ٹیم نے بدھ، 9 ستمبر 2026ءکو شہر کے انتہائی مصروف اور عقیدت مندوں کے لیے اہم تخت سچکھنڈ شری حضور صاحب گردوارہ گیٹ نمبر 1 تا گردوارہ شری لنگر صاحب روڈ کے دونوں جانب قائم غیر قانونی تجاوزات کے خلاف بڑی کارروائی کی۔ میونسپل کمشنر ڈاکٹر مہیش کمار ڈوئی پھوڑے کے احکامات اور پولیس کے سخت بندوبست میں چلائی گئی اس مہم کے نتیجے میں مذکورہ سڑک تجاوزات سے پاک اور کشادہ ہوگئی۔تخت سچکھنڈ شری حضور صاحب میں ملک و بیرونِ ملک سے روزانہ ہزاروں سکھ عقیدت مند اور سیاح حاضری کے لیے آتے ہیں۔ گیٹ نمبر 1 سے لنگر صاحب گردوارہ جانے والی اس اہم سڑک کے دونوں جانب گزشتہ چند ماہ کے دوران مقامی دکانداروں، ہاتھ گاڑی والوں اور خوانچہ فروشوں کی جانب سے بڑے پیمانے پر تجاوزات قائم کرلی گئی تھیں۔ بعض مقامات پر مستقل اور عارضی شیڈ بھی تعمیر کیے گئے تھے، جس کے باعث سڑک تنگ ہوگئی تھی اور عقیدت مندوں، پیدل چلنے والوں اور ٹریفک کو شدید مشکلات کا سامنا کرنا پڑ رہا تھا۔اس معاملے میں میونسپل انتظامیہ کے علاوہ ہائی کورٹ میں دائر عوامی مفاد کی درخواستوں کے پیش نظر بھی تجاوزات فوری طور پر ہٹانے کی ہدایات دی گئی تھیں۔اسی پس منظر میں بدھ کی صبح میونسپل کارپوریشن کے تجاوزات محکمہ کی ٹیم جے سی بی مشین، ڈمپر اور دیگر عملے کے ساتھ موقع پر پہنچی۔ کارروائی کے دوران سڑک کے دونوں جانب قائم غیر قانونی اوٹے، ٹپریاں، غیر مجاز شیڈ، اشتہاری بورڈ اور سڑک پر لگائی گئی ہاتھ گاڑیوں کو ہٹایا اور ضبط کیا گیا۔کارروائی کے دوران بعض کاروباری افراد نے ابتدائی طور پر مخالفت کی کوشش کی، تاہم میونسپل کارپوریشن کی ٹیم نے قانونی امور سے آگاہ کرتے ہوئے پولیس کی مدد سے پوری سڑک پر قائم تجاوزات کو ہٹا دیا۔ میونسپل انتظامیہ کے مطابق اس کارروائی میں کل 102 تجاوزات کرنے والوں کے خلاف کارروائی کرتے ہوئے 4 ٹرک سامان ضبط کیا گیا۔یہ کارروائی میونسپل کمشنر ڈاکٹر مہیش کمار ڈوئی پھوڑے، پولیس سپرنٹنڈنٹ نیلابھ روہن اور ایڈیشنل میونسپل کمشنر گریش کدم کی رہنمائی میں انجام دی گئی۔ ڈپٹی کمشنر اجیت پال سنگھ سندھو کی قیادت میں تجاوزات محکمہ کے اسسٹنٹ کمشنر راون سونسلے، علاقائی افسر راجیش جادھو، گوتم کواڑے، ناگ ناتھ پتانگے، وٹھل تڈکے، فائر بریگیڈ افسر نلیش کامبلے، پولیس سب انسپکٹر اتم گٹے، اجے ساکھرے، ٹریفک برانچ کے رویندر گھاڈگے سمیت غیر مجاز تعمیرات و تجاوزات محکمہ اور پولیس انتظامیہ کی مشترکہ ٹیم نے کارروائی مکمل کی۔کارروائی کے بعد گردوارہ علاقے کی سڑک دونوں جانب سے مکمل طور پر کھل گئی اور آمد و رفت کے لیے زیادہ کشادہ ہوگئی۔ عقیدت مندوں اور مقامی شہریوں نے میونسپل کارپوریشن کی اس کارروائی کا خیرمقدم کیا۔
میونسپل کارپوریشن کا انتباہ:
میونسپل انتظامیہ کی جانب سے کہا گیا ہے کہ عقیدت مندوں کی حفاظت اور شہر میں ٹریفک نظام کو ہموار رکھنے کے مقصد سے یہ مہم چلائی گئی ہے۔ آئندہ اگر کسی نے مذکورہ سڑک پر دوبارہ تجاوزات قائم کرنے کی کوشش کی تو اس کے خلاف مقدمہ درج کرنے کے ساتھ سخت جرمانہ اور قانونی کارروائی کی جائے گی۔ انتظامیہ نے دکانداروں اور شہریوں سے تجاوزات نہ کرنے اور انتظامیہ کے ساتھ تعاون کرنے کی اپیل کی ہے۔