چوری شدہ مارواڑی نسل کا گھوڑا برآمد، دو ملزمان زیرِ حراست، گھوڑا اصل مالک کے حوالے

ناندیڑ: 5؍جولائی (نمائندہ اعتبار) ضلع پولیس سپرنٹنڈنٹ ڈاکٹر نیلابھ روہن کی ہدایت پر بھاگیہ نگر پولیس اسٹیشن کے کرائم ڈٹیکشن اسکواڈ نے مارواڑی نسل کا چوری شدہ گھوڑا محض دو دن کے اندر برآمد کرکے اس کے اصل مالک کے حوالے کر دیا۔ اس معاملے میں دو ملزمان کو حراست میں لے کر ان کے خلاف مزید قانونی کارروائی کی جا رہی ہے۔پولیس کے مطابق 2 جولائی 2026ء کو شکایت گزار ڈاکٹر راگھویندر شیواجی راؤ کلکرنی، عمر 39 سال، پیشہ ڈاکٹر، ساکن روی نگر، ناندیڑ نے بھاگیہ نگر پولیس اسٹیشن میں شکایت درج کرائی تھی کہ ان کا تقریباً 80 ہزار روپئے مالیت کا مارواڑی نسل کا گھوڑا 19 جون 2026ء کی شب زراعت میدان کے علاقے سے چوری ہو گیا تھا۔ اس شکایت پر جرم نمبر 342/2026 کے تحت بھارتیہ نیائے سنہتا (BNS) کی دفعات 303(2) اور 3(5) کے تحت مقدمہ درج کیا گیا۔تفتیش کے دوران کرائم ڈٹیکشن اسکواڈ کے پولیس سب انسپکٹر نریش واڈیوالے کو خفیہ اطلاع موصول ہوئی۔ تکنیکی شواہد اور سی سی ٹی وی فوٹیج کی مدد سے ملزمان کا سراغ لگایا گیا۔ اس کارروائی میں شیخ عدین شیخ یاسین، عمر 20 سال، پیشہ نجی ملازم، ساکن لیبر کالونی، ناندیڑ اور ایک نابالغ کو حراست میں لیا گیا۔ ان کے قبضے سے چوری شدہ گھوڑا برآمد کرکے اصل مالک کے حوالے کر دیا گیا۔یہ کامیاب کارروائی پولیس سپرنٹنڈنٹ ڈاکٹر نیلابھ روہن کی رہنمائی میں پولیس انسپکٹر سنتوش تانبے، پولیس انسپکٹر (کرائم) مہیش مالی، پولیس سب انسپکٹر نریش واڈیوالے، پولیس سب انسپکٹر ونود دیشمکھ، ہیڈ کانسٹیبل وشال مالوے، پولیس کانسٹیبل عدنان پٹھان، وشنوکانت منڈے، راجیو گھلے، راہل لاٹھکر، ناگناتھ چاپکے، سدھاکر مردوڑے اور انکوش کامبلے سمیت بھاگیہ نگر پولیس اسٹیشن کے عملے نے انجام دی۔