ناندیڑ: محکمۂ موسمیات کا انتباہ، 17 اور 18 جولائی کے لیے یلو الرٹ جاری

ناندیڑ: 16 جولائی(نمائندہ اعتبار) : علاقائی محکمۂ موسمیات، ممبئی کی جانب سے آج جاری کردہ اطلاع کے مطابق ضلع ناندیڑ کے لیے 17 اور 18 جولائی 2026 ءکو یلو الرٹ جاری کیا گیا ہے۔محکمۂ موسمیات نے پیش گوئی کی ہے کہ ان دونوں دنوں کے دوران ضلع کے بعض مقامات پر 30 سے 40 کلومیٹر فی گھنٹہ کی رفتار سے تیز ہوائیں چل سکتی ہیں، جبکہ گرج چمک اور آسمانی بجلی کے ساتھ ہلکی سے درمیانی درجے کی بارش کا بھی قوی امکان ہے۔ اس قدرتی صورتحال کے پیش نظر تمام متعلقہ محکموں اور عوام سے احتیاطی تدابیر اختیار کرنے کی اپیل کی گئی ہے۔
آسمانی بجلی چمکنے کی صورت میں یہ احتیاطی تدابیر اختیار کریں:
اگر گرج چمک کے ساتھ بارش کی پیش گوئی ہو تو غیر ضروری طور پر گھر سے باہر نہ نکلیں۔ اگر آپ کھلی جگہ پر ہوں اور قریب کوئی محفوظ عمارت موجود نہ ہو تو نشیبی مقام پر بیٹھ جائیں، گھٹنوں کو سینے سے ملا کر سر جھکا لیں۔
آسمانی بجلی چمکنے کی صورت میں فوراً کسی محفوظ عمارت میں پناہ لیں۔ گھر کی بالکونی، چھت یا بیرونی برآمدے میں ہرگز نہ ٹھہریں۔ اگر گھر میں بجلی سے چلنے والے آلات استعمال ہو رہے ہوں تو انہیں فوراً بند کر دیں۔ تاروں کی باڑ، بجلی کے کھمبوں اور دیگر دھاتی اشیا سے دور رہیں۔ اگر پانی میں کھڑے ہوں تو فوراً وہاں سے نکل جائیں۔
ان کاموں سے گریز کریں:
آسمانی بجلی چمکنے کے دوران گھر کے لینڈ لائن فون کا استعمال نہ کریں۔ شاور کے نیچے نہائیں نہیں۔ گھر کے نلکوں، پانی کی پائپ لائنوں اور دیگر برقی آلات کو ہاتھ نہ لگائیں۔
تیز ہواؤں اور گرج چمک کے دوران لوہے کے ڈھانچے والے خیموں یا شیڈز میں پناہ نہ لیں۔ اونچے درختوں کے نیچے یا دھاتی ٹاوروں کے قریب کھڑے نہ ہوں۔ اگر آپ گھر کے اندر ہوں تو کھلے دروازے یا کھڑکی سے آسمانی بجلی گرتی ہوئی دیکھنے کی کوشش نہ کریں، کیونکہ یہ بھی باہر کھڑے رہنے جتنا ہی خطرناک ہو سکتا ہے۔
یہ اپیل ضلع ڈیزاسٹر مینجمنٹ آفیسر، ناندیڑ کی جانب سے جاری کی گئی ہے۔