ناندیڑ ضلع میں پولیس کا بڑے پیمانے پر کومبنگ آپریشن، 94 عادی مجرموں کی جانچ

ناندیڑ: 15 جولائی (نمائندہ اعتبار) ناندیڑ ضلع میں املاک اور جسم کے خلاف جرائم کی روک تھام اور عادی مجرموں پر قابو پانے کے مقصد سے ضلع پولیس نے رات کے اوقات میں بڑے پیمانے پر ’’کومبنگ آپریشن‘‘ انجام دیا۔ پولیس سپرنٹنڈنٹ ڈاکٹر نیلابھ روہن کی ہدایت پر 14 جولائی کی رات 11 بجے سے 15 جولائی کی صبح 3 بجے تک ضلع بھر میں یہ خصوصی کارروائی جاری رہی۔ اس کومبنگ آپریشن میں ایڈیشنل پولیس سپرنٹنڈنٹ، تمام سب ڈویژنل پولیس افسران، مقامی کرائم برانچ کے پولیس انسپکٹر، افسران و اہلکار، ضلع کے تمام پولیس تھانوں کے انچارج افسران، معاون افسران، پولیس اہلکار اور آر سی پی کے جوانوں نے حصہ لیا۔پولیس کی جانب سے کارروائی کے دوران املاک اور جسم کے خلاف جرائم میں ملوث عادی مجرموں، غیر قانونی اسلحہ رکھنے والوں، ضلع بدر اور تڑی پار ملزمان، ہسٹری شیٹروں، مطلوب اور مفرور ملزمان کی جانچ کی گئی۔پولیس کی جانب سے جاری کردہ تفصیلات کے مطابق کومبنگ آپریشن میں مجموعی طور پر 64 پولیس افسران اور 241 اہلکاروں کو تعینات کیا گیا تھا۔ کارروائی کے دوران دفعہ 55، 56 اور 57 کے تحت تڑی پار یا مجوزہ کارروائی والے 41 افراد، ایم پی ڈی اے کے تحت کارروائی کے بعد رہا ہونے والے 37 افراد اور املاک و جسم کے خلاف جرائم میں ملوث 94 عادی مجرموں کی جانچ کی گئی۔آپریشن کے دوران آرمس ایکٹ کی دفعات 3/25 اور 4/25 کے تحت ایک مقدمہ درج کیا گیا، جبکہ مہاراشٹر پولیس ایکٹ کی دفعات 122 اور 142 کے تحت 11 مقدمات درج کیے گئے۔ اس طرح مختلف پولیس تھانوں میں مجموعی طور پر 12 مقدمات درج کیے گئے۔اس خصوصی کارروائی کے دوران 34 قابلِ ضمانت وارنٹ اور 20 ناقابلِ ضمانت وارنٹ کی تعمیل کی گئی، جبکہ 67 سمن بھی متعلقہ افراد تک پہنچائے گئے۔درج کیے گئے مقدمات میں وزیرآباد پولیس تھانے میں دو، بھاگیہ نگر پولیس تھانے میں تین، شیواجی نگر پولیس تھانے میں ایک، ناندیڑ دیہی پولیس تھانے میں تین، بھوکر پولیس تھانے میں دو اور اردھاپور پولیس تھانے میں ایک مقدمہ شامل ہے۔ناندیڑ ضلع پولیس کے مطابق اس خصوصی کومبنگ آپریشن کا مقصد عادی مجرموں کی سرگرمیوں پر نظر رکھنا، مطلوب اور مفرور ملزمان کی جانچ کرنا اور ضلع میں امن و امان برقرار رکھتے ہوئے جرائم کی روک تھام کو مزید مؤثر بنانا تھا۔