ناندیڑ: سرپرست وزیر اتل ساوے کا وشنوپوری فلائی اوور حادثہ کا معائنہ

ناندیڑ: 17 جولائی(نمائندہ اعت بار) ناندیڑ۔لاتور قومی شاہراہ پر وشنوپوری میں سری گرو گوبند سنگھ جی انجینئرنگ کالج کے سامنے واقع فلائی اوور کے پہلو کا نچلا حصہ اچانک منہدم ہونے کے واقعہ کا ریاستی وزیر برائے دیگر پسماندہ طبقات و بہوجن فلاح، ڈیری ڈیولپمنٹ، غیر روایتی توانائی اور معذورین کو بااختیار بنانے کے امور نیز ضلع ناندیڑ کے سرپرست وزیر اتل ساوے نے آج جائے حادثہ کا دورہ کرکے جائزہ لیا۔سرپرست وزیر نے کہا کہ ریاستی حکومت نے اس واقعہ کو انتہائی سنجیدگی سے لیا ہے۔ دو روز قبل مرکزی حکومت کے اعلیٰ سطحی ماہرین کی ٹیم نے جائے وقوع کا معائنہ کرکے فلائی اوور کی ساخت کا تفصیلی تکنیکی جائزہ لیا ہے۔ اگر تحقیقات میں تعمیراتی خامیاں، ناقص معیار کا تعمیراتی سامان، کام میں لاپروائی یا متعلقہ اداروں کی جانب سے کسی بھی قسم کی غفلت ثابت ہوتی ہے تو ذمہ دار افراد کے خلاف قانون کے مطابق سخت کارروائی کی جائے گی۔انہوں نے فلائی اوور کے منہدم شدہ حصے کا معائنہ کیا اور نیشنل ہائی وے اتھارٹی آف انڈیا (NHAI)، متعلقہ تعمیراتی کمپنی اور ضلع انتظامیہ کے افسران سے واقعہ کی تفصیلی معلومات حاصل کیں۔ انہوں نے ہدایت دی کہ فلائی اوور کے باقی ماندہ حصے کی مضبوطی، استحکام اور معیار کا مکمل تکنیکی معائنہ کرکے فوری طور پر ضروری احتیاطی اقدامات کیے جائیں۔اتل ساوے نے بتایا کہ فلائی اوور کی تعمیر کے معیار، استعمال شدہ تعمیراتی سامان، ڈھانچے کی مضبوطی اور دیگر تکنیکی پہلوؤں کی باریک بینی سے جانچ کے لیے انڈین انسٹی ٹیوٹ آف ٹیکنالوجی (IIT) کی ماہر ٹیم کو طلب کیا جائے گا۔ اس دوران ضروری مرمت، اصلاحی اقدامات اور آئندہ کی انتظامی کارروائی بھی عمل میں لائی جائے گی۔انہوں نے متعلقہ حکام کو ہدایت دی کہ شہریوں کی حفاظت کو مدنظر رکھتے ہوئے متبادل راستوں کے ذریعے ٹریفک کی روانی برقرار رکھنے کے لیے مؤثر انتظامات کیے جائیں۔ انہوں نے کہا کہ خوش آئند بات یہ ہے کہ اس حادثے میں کوئی جانی نقصان یا سنگین زخمی ہونے کا واقعہ پیش نہیں آیا، جس کے باعث ایک بڑا سانحہ ٹل گیا۔سرپرست وزیر نے یقین دلایا کہ آئندہ اس نوعیت کے واقعات کی روک تھام کے لیے پورے فلائی اوور کا مکمل تکنیکی معائنہ کیا جا رہا ہے اور تحقیقاتی رپورٹ کی بنیاد پر ذمہ داری کا تعین کرتے ہوئے قصورواروں کے خلاف قانون کے مطابق سخت کارروائی کی جائے گی۔اس موقع پر رکن پارلیمنٹ ڈاکٹر اجیت گوپچھڑے، رکن اسمبلی بھیمراؤ کیرام، رکن اسمبلی راجیش پوار، ضلع کلکٹر راہول کرڈیلے، نیشنل ہائی وے اتھارٹی آف انڈیا کے افسران، متعلقہ تکنیکی ماہرین، ضلع انتظامیہ اور پولیس محکمہ کے اعلیٰ افسران موجود تھے۔