میونسپل کمشنر ڈاکٹر مہیش کمار ڈوئی فوڑے نے وارڈ وار ’ایس آئی آر‘ ووٹر رجسٹریشن کیمپوں کا معائنہ کرکے کام کا جائزہ لیا

ناندیڑ: 15 جولائی(نمائندہ اعتبار) الیکشن کمیشن آف انڈیا کی ہدایات کے مطابق اس وقت ملک بھر اور ریاست میں انتخابی فہرستوں کی خصوصی جامع نظرِ ثانی (Special Intensive Revision – SIR) 2026 کا پروگرام جنگی پیمانے پر جاری ہے۔ اس قومی مہم کے تحت ناندیڑ شہر کے زیادہ سے زیادہ شہریوں کے نام انتخابی فہرست میں درج کرنے اور موجود غلطیوں کی اصلاح کے لیے وارڈ وار خصوصی ’ایس آئی آر‘ کیمپ منعقد کیے گئے ہیں۔ان کیمپوں کی پیشگی تیاریوں اور جاری عملی کام کا جائزہ لینے کے لیے ناندیڑ واگھالہ سٹی میونسپل کارپوریشن کے کمشنر و ایڈیشنل ڈسٹرکٹ الیکشن آفیسر ڈاکٹر مہیش کمار ڈوئی فوڑے نے آج مختلف وارڈوں میں قائم کیمپوں کا اچانک دورہ کیا۔میونسپل کمشنر نے شہر کے اہم وارڈ دفاتر کے تحت آنے والے اسکولوں، سماجی مراکز اور مقررہ سرکاری عمارتوں میں قائم ’ایس آئی آر‘ کیمپوں کا معائنہ کیا۔ ان میں بالخصوص نرسنگھ مندر کوٹھا، نرسنگھ ودیا مندر اور جے بھیم نگر کے کیمپ شامل تھے۔اس موقع پر انہوں نے تمام انتظامات کا باریک بینی سے جائزہ لیا اور اس بات کو یقینی بنایا کہ ہر مرکز پر بوتھ لیول آفیسرز (BLO)، نگراں افسران اور معاونین مقررہ وقت پر موجود ہیں یا نہیں۔ انہوں نے مراکز پر آنے والے مقامی شہریوں سے بھی گفتگو کی، ان کے شبہات اور سوالات کا ازالہ کیا اور اپنے شمار کنندگی فارم جلد از جلد جمع کرنے کی اپیل کی۔میونسپل کمشنر نے اسسٹنٹ الیکٹورل رجسٹریشن افسران کو ہدایت دی کہ کیمپوں کے ذریعے زیادہ سے زیادہ شمار کنندگی فارم جمع کرنے اور انہیں کمپیوٹرائزڈ کرنے کے لیے مؤثر کوششیں کی جائیں۔ انہوں نے میونسپل کارپوریشن کے علاقائی افسران کو بھی ہدایت دی کہ وہ اس کام میں ہر ممکن تعاون فراہم کریں۔بارش کے موسم کے پیشِ نظر میونسپل کمشنر نے ہدایت دی کہ کیمپ کے مقامات پر شہریوں کے بیٹھنے، پینے کے صاف پانی اور مناسب چھت یا سائبان کا انتظام یقینی بنایا جائے۔
شہریوں سے انتظامیہ کی اپیل:
میونسپل کارپوریشن انتظامیہ نے ناندیڑ کے تمام شہریوں سے اپیل کی ہے کہ وہ اپنے بی ایل او سے رابطہ کرکے شمار کنندگی فارم مکمل کریں اور اسے جمع کرائیں یا اپنے وارڈ میں قائم قریبی ’ایس آئی آر‘ کیمپ کا دورہ کرکے فارم جمع کرنے اور کمپیوٹرائزیشن کا عمل مکمل کروائیں۔انتظامیہ نے شہریوں سے جمہوریت کو مضبوط بنانے اور درست و شفاف انتخابی فہرست تیار کرنے کے لیے بھرپور تعاون کی اپیل کی ہے۔اس معائنہ دورے کے موقع پر ڈپٹی کمشنر نتن گاڑھوے، ڈپٹی کمشنر ایس۔ اجیت پال سنگھ سندھو، متعلقہ اسسٹنٹ الیکٹورل رجسٹریشن افسران، متعلقہ وارڈوں کے علاقائی افسران اور میونسپل کارپوریٹرز موجود تھے۔