مہاراشٹر کے پہلے ’’ای وی فاسٹ چارجنگ اسٹیشن‘‘ کا ناندیڑ ضلع کلکٹریٹ میں افتتاح

ناندیڑ: 17 جولائی(نمائندہ اعتبار): ماحول دوست نقل و حمل کو فروغ دینے اور الیکٹرک گاڑیوں کے استعمال کی حوصلہ افزائی کے مقصد سے ضلع پلاننگ کمیٹی کے ایک منفرد اقدام کے تحت قائم کیے گئے مہاراشٹر کے پہلے ای وی فاسٹ چارجنگ اسٹیشن کا افتتاح آج ضلع کلکٹر آفس کے احاطے میں ریاستی وزیر برائے دیگر پسماندہ طبقات و بہوجن فلاح، ڈیری ڈیولپمنٹ، غیر روایتی توانائی اور معذورین کو بااختیار بنانے کے امور نیز ضلع ناندیڑ کے سرپرست وزیر اتل ساوے کے ہاتھوں عمل میں آیا۔اس موقع پر راجیہ سبھا کے رکن پارلیمنٹ اشوک راؤ چوہان، راجیہ سبھا کے رکن پارلیمنٹ ڈاکٹر اجیت گوپچھڑے، کنوٹ کے رکن اسمبلی بھیمراؤ کیرام، نائیگاؤں کے رکن اسمبلی راجیش پوار، بھوکر کی رکن اسمبلی شری جیا چوہان، میئر کویتا مولے، ضلع کلکٹر راہول کرڈیلے، رہائشی ڈپٹی کلکٹر کرن امبیکر سمیت مختلف محکموں کے افسران اور معزز شخصیات موجود تھیں۔سرپرست وزیر اتل ساوے کی دور اندیشی کے نتیجے میں ضلع منصوبہ بندی کمیٹی کے ذریعے اس منفرد منصوبے کو عملی جامہ پہنایا گیا ہے۔ اس منصوبے کے تحت ضلع ناندیڑ کے تمام 15 تعلقوں کے تحصیل دفاتر میں ای وی چارجنگ اسٹیشن قائم کیے جا رہے ہیں۔ان مراکز پر 60 کلو واٹ صلاحیت کے فاسٹ چارجر نصب کیے گئے ہیں، جن کی مدد سے ایک ہی وقت میں دو الیکٹرک گاڑیوں کو چارج کیا جا سکے گا۔ یہ سہولت عام شہریوں کو مناسب نرخوں پر دستیاب ہوگی، جس سے الیکٹرک گاڑیوں کے مالکان کو بڑی سہولت حاصل ہوگی۔اس موقع پر بتایا گیا کہ ضلع منصوبہ بندی کمیٹی کے ذریعے مہاراشٹر کے تمام تعلقہ ہیڈکوارٹروں میں اس نوعیت کی ای وی چارجنگ سہولت فراہم کرنے کا یہ اپنی نوعیت کا پہلا منصوبہ ہے۔ اس اقدام سے نہ صرف الیکٹرک گاڑیوں کے استعمال کو فروغ ملے گا بلکہ ماحولیات کے تحفظ، ایندھن کی بچت اور سبز توانائی کے فروغ میں بھی اہم مدد حاصل ہوگی۔یہ منصوبہ ضلع کلکٹر راہول کرڈیلے کی رہنمائی میں کامیابی کے ساتھ نافذ کیا گیا ہے۔ اس موقع پر مقررین نے کہا کہ اس اقدام کے ذریعے ضلع ناندیڑ نے ماحول دوست اور پائیدار ترقی کی سمت ایک اور اہم قدم اٹھایا ہے۔