ملکاپور:شدید گرمی کی لہر؛ انتظامیہ کی جانب سے الرٹ جاری

ملکاپور :17/ اپریل ( محمد احسان سر ) محکمہ موسمیات کی پیش گوئی کے مطابق اور تحصیل آفس ملکاپور سے جاری کردہ اطلاعات کے حوالے سے آئندہ چند دنوں میں ضلع بلڈانہ کا درجہ حرارت 40oc سے 44oc کے درمیان رہنے کا امکان ہے۔ بڑھتی ہوئی گرمی کے پیش نظر شہریوں کی صحت پر منفی اثرات سے بچاؤ کے لیے ضلع انتظامیہ نے درج ذیل ہدایات پر عمل کرنے کی اپیل کی ہے.
اہم ہدایات اور احتیاطی تدابیر:
پانی کا استعمال: پیاس نہ لگنے کی صورت میں بھی زیادہ سے زیادہ پانی پیتے رہیں۔ سفر کے دوران اپنے ساتھ پانی کی بوتل ضرور رکھیں.
کام کے اوقات: دوپہر 12:00 بجے سے 4:00 بجے کے درمیان غیر ضروری طور پر دھوپ میں باہر نکلنے سے گریز کریں۔ اگر باہر جانا ضروری ہو تو سر کو ڈھانپ کر (ٹوپی، رومال یا چھتری کا استعمال کرتے ہوئے) نکلیں.
مشروبات و غذا: جسم میں پانی کی مقدار برقرار رکھنے کے لیے لیموں شربت، چھاچھ، لسی یا او آر ایس (ORS) کا استعمال کریں.
لباس: دھوپ میں باہر جاتے وقت ہلکے رنگ کے اور ڈھیلے سوتی کپڑے پہنیں.
بچے اور بزرگ افراد: کم عمر بچے، بزرگ افراد اور بیمار افراد کو شدید گرمی سے بچانے کے لیے خصوصی احتیاط برتی جائے۔ انہیں بند گاڑیوں میں ہرگز نہ چھوڑیں.
اگر ہیٹ اسٹروک (لو لگنے) کی علامات ظاہر ہوں تو کیا کریں؟
اگر کسی کو چکر آنا، متلی، شدید سر درد یا زیادہ بخار محسوس ہو تو فوری طور پر اسے سایہ دار جگہ پر منتقل کریں، ٹھنڈے پانی سے جسم کو صاف کریں اور قریبی سرکاری اسپتال میں علاج کے لیے لے جائیں۔
’’گرمی سے خود کو محفوظ رکھیں اور احتیاط برتیں۔
تحصیلدار، ملکاپور
دفتر تحصیلدار، ملکاپور