مردم شماری میں ملکاپور تحصیل ریاست میں اول

ملکاپور: 5/ جون : ( محمد احسان ) مردم شماری 2027 کے تحت ہاؤس لسٹنگ اور ہاؤس کاؤنٹنگ (HLB) کے پہلے مرحلے کا کام سو فیصد مکمل کرتے ہوئے ملکاپور تحصیل نے ریاست مہاراشٹر میں پہلی پوزیشن حاصل کر لی ہے. مقررہ مدت سے قبل تمام 192 ہاؤس لسٹنگ بلاکس کا کام مکمل کرنے والی ملکاپور ریاست کی پہلی تحصیل بن گئی ہے، جس پر انتظامیہ کی کارکردگی کو ریاستی سطح پر سراہا جا رہا ہے. ملک کی ترقیاتی منصوبہ بندی کے لیے نہایت اہم سمجھی جانے والی مردم شماری کے عمل میں ہاؤس لسٹنگ اور ہاؤس کاؤنٹنگ ابتدائی اور حساس مرحلہ ہوتا ہے. اس مرحلے میں شہریوں کی رہائشی صورتحال، خاندانی ڈھانچہ، سماجی و معاشی معلومات اور بنیادی سہولیات سے متعلق اعداد و شمار جمع کیے جاتے ہیں. مستقبل کی ترقیاتی اسکیموں اور سرکاری پالیسیوں کی تیاری کے لیے یہ معلومات انتہائی اہم تصور کی جاتی ہیں. ضلع کلکٹر ڈاکٹر پروین کمار دیورے اور ریذیڈنٹ ڈپٹی کلکٹر سریش کوھواڑے کی رہنمائی میں ضلع کی مردم شماری مشینری کو ضروری سمت اور رہنمائی حاصل ہوئی. باقاعدہ جائزوں، وقتاً فوقتاً جاری کی گئی ہدایات اور کام کے معیار پر خصوصی توجہ کے باعث مہم کو مطلوبہ رفتار حاصل ہوئی. ملکاپور کے تحصیلدار اور چیف چارج آفیسر سمادھان سونونے اور ایڈیشنل چارج آفیسر ڈاکٹر چاروشیلا چودھری کی قیادت میں پوری ٹیم نے بہترین ہم آہنگی کے ساتھ کام انجام دیا. ہر مرحلے پر نگرانی، باریک بینی سے منصوبہ بندی اور مسائل کے فوری حل کی بدولت کام مقررہ وقت میں مکمل کرنے میں کامیابی حاصل ہوئی.اس کامیابی میں فیلڈ ٹرینرز مہالے، منڈے اور گنیش پاٹل کی تربیت اور رہنمائی اہم ثابت ہوئی، جبکہ مردم شماری کے تکنیکی معاون پرشانت واکوڈے نے تکنیکی امور میں مسلسل تعاون فراہم کیا. اس دوران میدان میں جا کر معلومات جمع کرنے والے سپروائزرز، مردم شماری اہلکاروں اور محکمہ مردم شماری کے ملازمین کو اس کامیابی کا اصل معمار قرار دیا گیا ہے.