محکمۂ موسمیات کے انتباہ کے بعد ناندیڑ میونسپل کمشنر ایکشن موڈ میں

ناندیڑ: 4 جولائی(نمائندہ اعتبار) بھارتی محکمۂ موسمیات کی جانب سے ناندیڑ ضلع سمیت پورے مراٹھواڑہ میں آئندہ چند دنوں کے دوران موسلادھار سے انتہائی موسلادھار بارش کی پیش گوئی کیے جانے کے بعد شہریوں کی حفاظت اور ممکنہ سیلابی صورتحال سے نمٹنے کے لیے میونسپل کمشنرڈاکٹر مہیش کمار ڈوئی پھوڑےنے 4 جولائی 2026ء کو شہر کے مختلف نشیبی، دریا کنارے واقع اور حساس علاقوں کا دورہ کرکے ڈیزاسٹر مینجمنٹ کی تیاریوں کا تفصیلی جائزہ لیا۔میونسپل کمشنر نے صبح ہی شہر کے سیلاب سے متاثر ہونے والے علاقوں، اہم نالوں اور دریائے گوداوری کے کنارے واقع نشیبی مقامات کا معائنہ کیا۔ ان میں اردو گھر کے قریب واقع نالہ، اسدون سے لاتور پھاٹا نالہ، روی نگر سے کوتھا پولیس چوکی اور شگون سٹی کے علاقے شامل تھے۔ اس موقع پر شگون سٹی کے شہریوں سے گفتگو کرتے ہوئے انہوں نے ان کے مسائل سنے۔معائنے کے دوران میونسپل کمشنر نے نالوں کی صفائی، پانی کے بہاؤ کے راستوں اور ان مقامات کا جائزہ لیا جہاں بارش کے دوران پانی جمع ہونے کا خدشہ رہتا ہے، اور متعلقہ افسران کو فوری احتیاطی و تدارکی اقدامات کرنے کی ہدایت دی۔ انہوں نے حکم دیا کہ نالوں میں کچرا پھنسنے اور پانی کی نکاسی متاثر ہونے سے بچانے کے لیے اضافی صفائی عملہ اور ضروری مشینری تعینات کی جائے۔اسی طرح میونسپل کمشنر نے ہدایت دی کہ میونسپل کارپوریشن کا مرکزی ڈیزاسٹر مینجمنٹ کنٹرول روم تین شفٹوں میں 24 گھنٹے فعال رکھا جائے، جبکہ تمام زونل افسران اور انجینئروں کو اگلے احکامات تک ہیڈکوارٹر نہ چھوڑنے کی بھی ہدایت دی گئی ہے۔
شہریوں سے انتظامیہ کی اپیل
میونسپل کمشنر نے ناندیڑ شہر کے شہریوں سے اپیل کی ہے کہ محکمۂ موسمیات کے انتباہ کو مدنظر رکھتے ہوئے بلا ضرورت گھروں سے باہر نکلنے سے گریز کریں۔ کسی بھی ہنگامی مدد یا بارش کا پانی جمع ہونے کی شکایت درج کرانے کے لیے میونسپل کارپوریشن کے سرکاری ڈیزاسٹر مینجمنٹ کنٹرول روم کے ہیلپ لائن نمبروں242803 اور235077پر رابطہ کریں۔ انہوں نے شہریوں سے یہ بھی کہا کہ افواہوں پر یقین نہ کریں بلکہ انتظامیہ کی جانب سے وقتاً فوقتاً جاری کی جانے والی ہدایات پر عمل کریں۔اس معائنہ کے موقع پر میونسپل کارپوریشن کے ایڈیشنل کمشنر گیریش قدم، سٹی انجینئر سمنت پاٹل، ڈیزاسٹر مینجمنٹ آفیسر ڈاکٹر مرزا فرحت اللہ بیگ، ایگزیکٹو انجینئر دلیپ ٹاکلیکر، علاقائی افسر راون سونسلے، جونیئر انجینئر ٹھانیدار اور دیگر متعلقہ افسران موجود تھے۔