فرعون کی محفوظ لاش

از قلم : عارف محمد خان ، جلگاؤں

قرآنِ مجید اللہ تعالیٰ کا وہ عظیم کلام ہے جو نہ صرف روحانی رہنمائی فراہم کرتا ہے بلکہ کائنات، تاریخ اور انسانی فطرت کے بارے میں ایسی حقائق بیان کرتا ہے جو ہر دور میں غور و فکر کی دعوت دیتے ہیں۔ انہی میں سے ایک حیرت انگیز بیان سورۂ یونس کی آیت نمبر 92 ہے، جس میں فرعون کے جسم کے محفوظ رہنے کا ذکر کیا گیا ہے۔
فَالْيَوْمَ نُنَجِّيكَ بِبَدَنِكَ لِتَكُونَ لِمَنْ خَلْفَكَ آيَةً ۚ وَإِنَّ كَثِيرًا مِّنَ النَّاسِ عَنْ آيَاتِنَا لَغَافِلُونَ
ترجمہ:
پس آج ہم تیرے بدن کو بچا لیں گے تاکہ تو اپنے بعد آنے والوں کے لیے نشانی بن جائے، اور بے شک بہت سے لوگ ہماری نشانیوں سے غافل ہیں۔”
تاریخی پس منظر:
فرعونِ مصر، جو حضرت موسیٰ علیہ السلام کے زمانے کا ظالم حکمران تھا، اپنے غرور اور سرکشی میں اس حد تک بڑھ گیا کہ اس نے خدائی کا دعویٰ کر دیا۔ جب اس نے بنی اسرائیل کو ظلم و ستم کا نشانہ بنایا اور اللہ کے پیغام کو ٹھکرا دیا، تو بالآخر وہ اپنے لشکر سمیت سمندر میں غرق ہو گیا۔
یہ ایک عام فطری عمل ہے کہ ڈوبنے والے انسان کی لاش وقت کے ساتھ ختم ہو جاتی ہے، مگر قرآن نے اس موقع پر ایک غیر معمولی اعلان فرمایا کہ فرعون کا جسم محفوظ رکھا جائے گا۔
سائنسی تحقیق اور ممیوں کی دریافت:
جدید دور میں مصر میں قدیم بادشاہوں کی ممیوں کی دریافت نے دنیا کو حیران کر دیا۔ ان ممیوں میں ایک ایسی لاش بھی شامل ہے جسے ماہرین حضرت موسیٰ علیہ السلام کے زمانے کے فرعون سے منسوب کرتے ہیں۔
ممیفیکیشن (Mummification) کا عمل:
1-قدیم مصری اپنے بادشاہوں کے جسموں کو محفوظ رکھنے کے لیے ایک خاص طریقہ استعمال کرتے تھے۔
2-جسم سے نمی نکال دی جاتی تھی۔
3-مخصوص نمکیات (Natron) استعمال کیے جاتے تھے۔
4-جسم کو کپڑوں میں لپیٹ کر محفوظ کیا جاتا تھا۔
5-یہ عمل لاش کو ہزاروں سال تک محفوظ رکھتا ہے۔
سائنسی مشاہدات اور تحقیق:
فرانسیسی ماہر طب Dr. Maurice Bucaille نے فرعون کی ممی کا گہرائی سے مطالعہ کیا۔ اپنی مشہور کتاب "The Bible, The Quran and Science” میں وہ لکھتے ہیں۔
ممی کے جسم پر پانی میں ڈوبنے کے آثار پائے گئے۔
جسم کو بعد میں محفوظ کیا گیا، یعنی پہلے موت واقع ہوئی پھر ممی بنایا گیا۔
یہ دریافت قرآن کے بیان سے حیرت انگیز مطابقت رکھتی ہے۔
قرآن کا سائنسی اعجاز:
یہ ایک اہم حقیقت ہے کہ
قرآن 1400 سال پہلے نازل ہوا
اس وقت نہ ممیوں کی سائنسی تحقیق موجود تھی۔نہ انسانی لاشوں کے تحفظ کے جدید طریقے معلوم تھے۔اس کے باوجود قرآن نے یہ واضح کر دیا کہ فرعون کا جسم محفوظ رکھا جائے گا ۔ یہ ایک ایسا بیان ہے جو جدید سائنس کی دریافتوں سے مکمل ہم آہنگ ہے۔