انسان کو بہترین ساخت پر پیدا کیا گیا

از قلم : عارف محمد خان، جلگاؤں

انسان صدیوں سے اپنی تخلیق، اپنی حقیقت اور کائنات میں اپنے مقام کو سمجھنے کی کوشش کرتا رہا ہے۔ فلسفہ، سائنس اور مذہب نے اس سوال کا جواب اپنے اپنے انداز میں دیا، مگر قرآنِ کریم نے چودہ سو سال پہلے انسان کی عظمت، اس کی تخلیق اور اس کے مقصدِ حیات کو نہایت جامع انداز میں بیان کردیا تھا۔ آج جدید سائنس جوں جوں ترقی کررہی ہے، قرآن کے بیان کردہ حقائق مزید واضح ہوتے جارہے ہیں۔
قرآن انسان کو محض ایک حیاتیاتی مخلوق نہیں بلکہ اللہ تعالیٰ کی عظیم نشانی قرار دیتا ہے۔ ارشادِ باری تعالیٰ ہے۔
لَقَدْ خَلَقْنَا الْإِنسَانَ فِي أَحْسَنِ تَقْوِيمٍ
“بے شک ہم نے انسان کو بہترین ساخت میں پیدا کیا۔”
(سورۂ التین: 4)
یہ آیت انسانی جسم، دماغ، شعور اور اس کی صلاحیتوں کی طرف اشارہ کرتی ہے۔ جدید سائنس بھی اس حقیقت کو تسلیم کرتی ہے کہ انسانی جسم ایک حیرت انگیز نظام ہے۔ انسان کے دماغ میں اربوں عصبی خلیے موجود ہیں، دل مسلسل خون پمپ کرتا ہے، آنکھیں لاکھوں رنگوں میں فرق کرسکتی ہیں اور جسم کا مدافعتی نظام بے شمار جراثیم سے لڑنے کی صلاحیت رکھتا ہے۔
انسانی تخلیق کا قرآنی بیان
قرآنِ کریم نے انسان کی تخلیق کے مختلف مراحل نہایت واضح انداز میں بیان کیے ہیں۔
خَلَقَ الْإِنسَانَ مِن نُّطْفَةٍ
“اللہ نے انسان کو نطفے سے پیدا کیا۔”(سورۂ النحل: 4)
ایک اور مقام پر ارشاد فرمایا:
ثُمَّ خَلَقْنَا النُّطْفَةَ عَلَقَةً فَخَلَقْنَا الْعَلَقَةَ مُضْغَةً
“پھر ہم نے نطفے کو جما ہوا خون بنایا، پھر اس لوتھڑے کو گوشت کا ٹکڑا بنایا۔”(سورۂ المؤمنون: 14)
جدید علمِ جنین (Embryology) کے مطابق بھی انسان رحمِ مادر میں مختلف مراحل سے گزرتا ہے۔ حیرت انگیز بات یہ ہے کہ قرآن نے یہ حقائق اس زمانے میں بیان کیے جب سائنسی آلات اور جدید تحقیق کا وجود بھی نہیں تھا۔
انسان اور ارتقاء کا نظریہ
انیسویں صدی میں سائنس دان چارلس ڈارون نے نظریۂ ارتقاء پیش کیا جس کے مطابق جاندار وقت کے ساتھ ارتقائی مراحل سے گزر کر وجود میں آئے۔ اس نظریے نے پوری دنیا میں فکری بحث چھیڑ دی۔
قرآنِ کریم انسان کو ایک باعزت اور منفرد مخلوق قرار دیتا ہے۔ ارشادِ باری تعالیٰ ہے۔
يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُم مِّن نَّفْسٍ وَاحِدَةٍ
“اے لوگو! اپنے رب سے ڈرو جس نے تم سب کو ایک جان سے پیدا کیا۔”(سورۂ النساء: 1)
یہ آیات واضح کرتی ہیں کہ انسان صرف ایک حیوانی وجود نہیں بلکہ عقل، شعور اور اخلاقیات سے مزین ایک عظیم مخلوق ہے۔
انسانی دماغ: قدرت کا حیرت انگیز شاہکار
سائنس دان انسانی دماغ کو دنیا کا سب سے پیچیدہ نظام قرار دیتے ہیں۔ انسان سوچتا ہے، محسوس کرتا ہے، فیصلہ کرتا ہے اور تخلیقی صلاحیتوں کا مظاہرہ کرتا ہے۔ قرآن انسان کو اپنے وجود پر غور کرنے کی دعوت دیتا ہے۔