آفتاب آپ کی قبر پر رحمت آفشانی کرے

از قلم محمد سرور شریف ابن یوسف شریف
معلم مؤیدالمسلمین پرائمری اسکول پربھنی
و ضلع نامہ نگاراعتبار نیوز محمد سرور شریف

إِنَّا لِلّٰهِ وَإِنَّا إِلَيْهِ رَاجِعُونَ
نہایت افسوس اور گہرے رنج کے ساتھ یہ خبر موصول ہوئی کہ مہاراشٹر کے جید دینی رہنما، حضرت حافظ منظور احمد صاحب رحمۃ اللہ علیہ اس فانی دنیا سے رخصت ہو گئے۔ آپ کا انتقال ملتِ اسلامیہ کے لیے ایک عظیم سانحہ ہے، جس کا خلا مدتوں محسوس کیا جاتا رہے گا۔
گزشتہ جمعرات کو امیر محترم اپنی پیرانہ سالی شدید گرمی کے موسم میں بھی امت میں دین کو عام کرنے کی فکروں کے کو لے کر شہر پربھنی میں موجود تھے جو حضرت کا آخری اور یاد گا ر سفر ہے ذمہ داران سے رابطہ پر معلوم ہوا کے صبح صوبہ مہاراشٹر میں ہونے والے اجتماع کے لیے مرکز حضرت نظام الدین کے لیے روانہ ہونے والے تھے اسی دوران بحکم الہی حرکت قلب بند یونے سے داعی اجل کو لبیک کہا اور حضرت جی مولانا انعام الحسن صاحب رحمتہ اللہ علیہ کی نصیحت کو جو امیر محترم اپنے پیانات میں کہا کرتے تھے کہ یہ ایمان کے بنانے کی محنت ہے جسے ہمیں سیکھتے سیکھتے کرنا ہے اور کرتے کرتے سیکھنا مزید یہ کے اس دعوت تبلیغ کے کام کو کرتے کرتے مرنا اور مرتے مرتے کرنا ہے کو عملی طور پر ثابت کرکے امت کو ایک پیغام دے گے
مرحوم نے اپنی پوری زندگی دینِ اسلام کی اشاعت و ترویج کے لیے وقف کر دی تھی۔ دعوت و تبلیغ کے میدان میں آپ کی خدمات روشن باب کی حیثیت رکھتی ہیں۔ آپ نہ صرف ایک عظیم داعی تھے بلکہ ایک مخلص رہنما، درد مند انسان اور فکرِ امت سے لبریز شخصیت بھی تھے۔ آپ کے دل میں امت کے ہر فرد کی ہدایت کی تڑپ ہمیشہ زندہ رہی۔
آپ کی زندگی اخلاص، تقویٰ، سادگی اور عاجزی کا حسین امتزاج تھی۔ آپ نے کبھی دنیاوی جاہ و منصب کو اہمیت نہیں دی بلکہ خاموشی کے ساتھ دین کی خدمت کو اپنا شعار بنایا۔ آپ کا اخلاق، نرم گفتاری اور انکساری ہر ملنے والے کو متاثر کرتی تھی۔ بڑوں کا احترام اور چھوٹوں پر شفقت آپ کی نمایاں صفات میں شامل تھا۔
حضرت والا نے اکابرین کی صحبت میں رہ کر دعوت کے اصول سیکھے اور پوری دیانت داری کے ساتھ انہیں آگے بڑھایا۔ آپ کی محنتوں کے نتیجے میں بے شمار لوگوں کی زندگیاں سنوریں اور دین کی طرف رجوع کا جذبہ پیدا ہوا۔ آپ ایک چلتی پھرتی مثال تھے کہ اخلاص کے ساتھ کیا گیا کام کس طرح دلوں پر اثر انداز ہوتا ہے۔
آپ کے وصال سے دعوت و تبلیغ کے قافلے کا ایک درخشاں چراغ بجھ گیا، مگر آپ کی چھوڑی ہوئی روشن راہیں ہمیشہ رہنمائی کرتی رہیں گی۔ آپ کی یادیں، آپ کی خدمات اور آپ کا مشن ہمیشہ زندہ رہے گا۔
اللہ تعالیٰ سے دعا ہے کہ وہ مرحوم کی کامل مغفرت فرمائے، ان کی لغزشوں کو معاف کرے، ان کی قبر کو جنت کے باغوں میں سے ایک باغ بنا دے اور انہیں جنت الفردوس میں اعلیٰ مقام عطا فرمائے۔اللہ تعالیٰ ان کے درجات کو بلند فرمائے اور ان کی دینی خدمات کو صدقۂ جاریہ بنائے۔
اللہ رب العزت مرحوم کے اہلِ خانہ، متعلقین اور تمام رفقائے دعوت و تبلیغ کو صبرِ جمیل عطا فرمائے اور ہمیں ان کے نقشِ قدم پر چلنے کی توفیق نصیب فرمائے۔ آمین یا رب العالمین آپ کی نماز جنازہ مورخہ 18مئی بروز پیر بمقام نگڑی قبرستان پونہ میں آج رات 10بجے ادا کی جاۓ گی شہر پربھنی سے آپ کے آخری دیدار اور نماز جنازہ میں شرکت کے لیے قافلے روانہ ہوچکے ہیں ۔