یو سی سی 27 جنوری سے اتراکھنڈ میں نافذ ہوگا، سی ایم دھامی پورٹل کا آغاز کریں گے

دہرادون: 25 جنوری:اتراکھنڈ میں 27 جنوری سے یکساں سول کوڈ (یو سی سی) نافذ ہو جائے گا۔ یو سی سی کو نافذ کرنے کا اعلان وزیر اعلیٰ پشکر سنگھ دھامی کے سکریٹری شیلیش بگولی نے دہرادون میں وزیر اعظم نریندر مودی کی آمد سے ٹھیک ایک دن پہلے کیا ہے اس سلسلے میں تمام محکموں کو ایک خط بھیجا ہے۔ خط میں یو سی سی سے متعلق ضروری ہدایات دی گئی ہیں۔ یہ خط متعلقہ محکموں کو بھیجا گیا ہے تاکہ 27 جنوری سے پہلے تمام انتظامات کو یقینی بنایا جائے۔ اسی دن ریاست کے وزیر اعلیٰ یو سی سی پورٹل کا آغاز کریں گے۔ اس کا آغاز سیکرٹریٹ میں 12.30 بجے کیا جائے گا۔ اس کے ساتھ نئے قانون کا نوٹیفکیشن بھی 27 جنوری کو جاری کیا جائے گا، جس کے بعد یہ عمل ریاست میں مکمل طور پر نافذ ہو جائے گا۔ اس سے قبل 4 جنوری کو نامہ نگاروں سے بات کرتے ہوئے اتراکھنڈ کے وزیر اعلیٰ پشکر سنگھ دھامی نے کہا تھا کہ ‘یکساں سول کوڈ’ اتراکھنڈ میں اسی ماہ ہی نافذ ہو جائے گا۔ سی ایم دھامی نے کہا تھا کہ ‘یکساں سول کوڈ’ جنوری سے نافذ کیا جائے گا۔ اس پر عمل درآمد کی تمام تیاریاں تقریباً مکمل کر لی گئی ہیں۔ چیف منسٹر دھامی نے 2022 کے اسمبلی انتخابی مہم کے دوران وعدہ کیا تھا کہ اگر ریاست میں بھارتیہ جنتا پارٹی (بی جے پی) کی حکومت آتی ہے تو ‘یکساں سول کوڈ’ (یو سی سی) کو نافذ کیا جائے گا۔ بی جے پی نے بھی اپنے ایجنڈے میں اس انتخابی وعدے کو اہمیت دی تھی۔ اتراکھنڈ میں بی جے پی کی حکومت بنتے ہی ‘یکساں سول کوڈ’ (یو سی سی) کو نافذ کرنے کی کوششیں شروع کر دی گئیں۔پہلے یہ خیال کیا جا رہا تھا کہ دھامی حکومت 1 جنوری 2025 سے ریاست میں ‘یکساں سول کوڈ’ (یو سی سی) کو نافذ کرے گی۔ تاہم بلدیاتی انتخابات سے متعلق نوٹیفکیشن جاری ہونے کی وجہ سے حکومت 23 جنوری تک کوئی فیصلہ نہیں لے سکی۔ بی جے پی کا خیال ہے کہ اتراکھنڈ میں ‘یکساں سول کوڈ’ (یو سی سی) کے نفاذ کے بعد یہ سماجی مساوات اور انصاف کے لیے ایک مثال بن جائے گا۔ ریاستی حکومت نے ‘یکساں سول کوڈ’ (یو سی سی) کو بروقت ترجیحی بنیادوں پر نافذ کیا ہے۔