कया अप भी अपने न्यूज़ पेपर की वेब साईट बनाना चाहते है या फिर न्यूज़ पोर्टल बनाना चहाते है तो कॉल करें 9860450452 / 9028982166 /9595154683

فارم سیون یا دو دھاری تلوار

از قلم: اسماء جبین فلک

بی جے پی کی انتخابی سیاست کا سب سے بڑا دعویٰ اس کے کارکنوں کی محنت ہے۔ ہر انتخابی کامیابی کے بعد قیادت اپنے کارکنوں کو فتح کا اصل معمار قرار دیتی ہے۔ بوتھ کی سطح پر کام کرنے والے کارکن ایک ایک ووٹر کو گھر سے نکال کر پولنگ بوتھ تک پہنچاتے ہیں، انتخابی مہم چلاتے ہیں اور امیدوار کی کامیابی کے لیے دن رات ایک کر دیتے ہیں۔ جیت کا سہرا اکثر لیڈر کے سر سجتا ہے، لیکن اس کا کریڈٹ کارکن کو دیا جاتا ہے۔ حتیٰ کہ اپوزیشن کے رہنما بھی بی جے پی کے کارکنوں کی تنظیمی صلاحیت اور انتخابی محنت کا اعتراف کرتے رہے ہیں۔
لیکن آج اسی کارکن کے بارے میں ایک مختلف نوعیت کی خبریں سامنے آ رہی ہیں۔ جو کارکن کل تک ووٹر کو بوتھ تک پہنچانے کے لیے سرگرم تھا، اس کے نام ووٹر لسٹ سے شہریوں کے نام خارج کرانے کے لیے فارم سیون جمع کرنے کی درخواستوں میں کیوں دکھائی دے رہے ہیں؟ کیا وہ خود یہ درخواستیں جمع کر رہا ہے یا اس کے نام اور شناخت کا استعمال کیا جا رہا ہے؟ اور اگر یہ سب کچھ اس کی رضامندی سے ہو رہا ہے تو کیا اسے اپنے عمل کے آئینی اور قانونی نتائج کا اندازہ ہے؟
یہ سوال صرف بی جے پی کی انتخابی حکمت عملی کا نہیں، اس کے کارکن کے سیاسی مستقبل اور اخلاقی ذمہ داری کا بھی ہے۔
فارم سیون (Form 7) انتخابی فہرست میں کسی نام کے اندراج پر اعتراض کرنے یا پہلے سے درج نام حذف کرانے کے لیے استعمال ہوتا ہے۔ اس کا استعمال بذاتِ خود غیر قانونی نہیں۔ اگر کوئی ووٹر فوت ہو چکا ہو، مستقل طور پر منتقل ہو گیا ہو، ایک سے زیادہ جگہ درج ہو یا قانونی طور پر نااہل ہو تو مقررہ طریقۂ کار کے تحت اعتراض کیا جا سکتا ہے۔ لیکن اس درخواست میں دی گئی معلومات درست ہونی چاہئیں اور متعلقہ انتخابی افسر کو مناسب جانچ کے بعد فیصلہ کرنا ہوتا ہے۔ مسئلہ اس وقت پیدا ہوتا ہے جب اس قانونی سہولت کو غلط معلومات، فرضی اعتراضات یا کسی مخصوص طبقے کے ووٹروں کو نشانہ بنانے کے لیے استعمال کیے جانے کا خدشہ پیدا ہو۔
نیوز لانڈری کی 21 اگست 2026 کی تحقیقاتی رپورٹ Inside the bulk objections targeting Muslims in Uttarakhand’s SIR میں اتراکھنڈ کے پانچ اسمبلی حلقوں میں پانچ افراد کی جانب سے تقریباً 6500 اعتراضات جمع کرانے کا انکشاف کیا گیا۔ رپورٹ کے مطابق یہ پانچوں افراد بی جے پی سے وابستہ تھے اور ان کی درخواستوں میں نشانہ بنائے گئے تمام ووٹر مسلمان تھے۔ تحقیق میں خاص طور پر اتراکھنڈ کے کیچھا اسمبلی حلقے کا معاملہ سامنے آیا، جہاں راجیش تیواری نامی بی جے پی سے وابستہ بوتھ لیول ایجنٹ نے 4855 اعتراضات جمع کرائے تھے۔ یہ درخواستیں بڑی تعداد میں ایسے ووٹروں کے خلاف تھیں جن کے نام مبینہ طور پر اتر پردیش کے پڑوسی علاقوں کی ووٹر لسٹوں میں بھی درج ہونے کی بنیاد پر چیلنج کیے گئے تھے۔ راجیش تیواری نے اس کارروائی کو دوہری رجسٹریشن کی نشاندہی قرار دیا، جبکہ کانگریس کے مقامی رکن اسمبلی نے درخواستوں میں غلط معلومات فراہم کیے جانے کا الزام لگایا۔ نیوز لانڈری کی رپورٹ نے یہ بھی واضح کیا کہ متعلقہ انتخابی افسران کے مطابق درخواستوں کی جانچ انتخابی قواعد کے مطابق کی جانی تھی۔
یہاں کسی درخواست کو جمع ہوتے ہی ووٹر کا نام حذف ہو جانا نہیں سمجھنا چاہیے۔ اعتراض کی بنیاد کی تصدیق، متعلقہ ووٹر کو نوٹس اور اس کا مؤقف سننا بھی قانونی عمل کا حصہ ہیں۔ لیکن سوال یہ ضرور ہے کہ جب ایک ہی شخص سینکڑوں اور ہزاروں درخواستیں جمع کراتا ہے تو ان معلومات کا ماخذ کیا ہوتا ہے؟ کیا ہر ووٹر کے بارے میں الگ اور قابلِ تصدیق ثبوت موجود ہوتا ہے؟ اور کیا درخواست گزار واقعی ان تمام معلومات کی ذمہ داری قبول کرتا ہے؟
اسی سلسلے کی ایک اور اہم مثال جے پور کے ہوا محل اسمبلی حلقے سے سامنے آئی۔ نیوز لانڈری کی 15 جنوری 2026 کی رپورٹ کے مطابق بوتھ لیول افسر کیرتی کمار نے الزام لگایا کہ بی جے پی کی جانب سے 470 ووٹروں کے نام حذف کرانے کی درخواستیں دی گئی تھیں، جو ان کے بوتھ کے تقریباً 40 فیصد ووٹروں کے برابر تھیں۔ ان کے مطابق یہ اعتراضات مسلمان ووٹروں کو نشانہ بنا رہے تھے، جن کی وہ پہلے ہی تصدیق کر چکے تھے۔ ایک وائرل ویڈیو میں کیرتی کمار کو بی جے پی کے کونسلر سریش سینی سے گفتگو کے دوران شدید ناراضی کا اظہار کرتے ہوئے بھی سنا گیا۔ ہوا محل وہی حلقہ ہے جہاں 2023 کے اسمبلی انتخابات میں بی جے پی کے بالمکند آچاریہ نے محض 974 ووٹوں کے فرق سے کامیابی حاصل کی تھی۔
اس واقعے کی اہمیت صرف 470 درخواستوں کی تعداد میں نہیں، بلکہ اس انتخابی حلقے کے سیاسی پس منظر میں بھی ہے۔ جب کسی حلقے میں انتخابی کامیابی کا فرق ایک ہزار ووٹ سے بھی کم ہو اور اسی حلقے میں سیکڑوں ووٹروں کے نام حذف کرانے کی درخواستیں سامنے آئیں تو ان کی غیر جانب دارانہ جانچ ناگزیر ہو جاتی ہے۔ بی ایل او کا کام کسی سیاسی جماعت کی انتخابی حکمت عملی کو کامیاب بنانا نہیں، بلکہ انتخابی فہرست کی درستگی اور قانونی تقاضوں کی تکمیل ہے۔
دہلی کے مصطفی آباد کا معاملہ اس سے بھی زیادہ توجہ طلب ہے۔ روزنامہ دی ہندو کی صحافی سروچی کماری کی 11 نومبر 2026 کی رپورٹ کے مطابق مصطفی آباد کے 25 پولنگ بوتھوں پر 20 بی جے پی کے نامزد بوتھ لیول ایجنٹس کے نام سے 796 فارم سیون جمع ہوئے۔ رپورٹ کے مطابق یہ تمام درخواستیں مسلمان ووٹروں کے خلاف تھیں اور ان کا تعلق تین مسلم آبادی والے علاقوں، نیہرو وہار، دیال پور اور چندو نگر سے تھا۔ رپورٹ میں یہ بھی بتایا گیا کہ ان درخواستوں میں سے کم از کم 87 ووٹر اپنے درج شدہ پتوں پر موجود پائے گئے۔ بی جے پی نے اس کارروائی سے لاتعلقی ظاہر کرتے ہوئے کہا کہ پارٹی نے اپنے ایجنٹس کو فارم سیون جمع کرنے کی ہدایت نہیں دی تھی۔
اس رپورٹ کا سب سے اہم پہلو یہ ہے کہ بی جے پی کے متعدد بوتھ لیول ایجنٹس نے مبینہ طور پر ان درخواستوں پر اپنے دستخط یا اجازت سے انکار کیا۔ اس کا مطلب یہ ہے کہ معاملہ صرف ووٹرز کے نام حذف کرانے کی کوشش تک محدود نہیں رہتا، بلکہ کسی دوسرے شخص کی شناخت استعمال کرکے درخواست جمع کرانے کا امکان بھی تحقیقات کا تقاضا کرتا ہے۔
اسی معاملے میں کانگریس رہنما علی مہدی کی درخواست پر 19 نومبر 2026 کو سپریم کورٹ نے الیکشن کمیشن اور دہلی کے چیف الیکٹورل افسر کو الزامات کی تصدیق کرنے اور قانون کے مطابق ضروری اصلاحی اقدامات کرنے کی ہدایت دی۔ عدالت نے الزامات کے میرٹ پر کوئی فیصلہ نہیں دیا۔ اس لیے اسے کسی سیاسی جماعت یا فرد کے جرم کا عدالتی ثبوت قرار نہیں دیا جا سکتا۔ البتہ عدالت کی یہ ہدایت اس معاملے کی سنجیدگی کو ضرور ظاہر کرتی ہے۔
یہاں ایک سوال بی جے پی کی قیادت سے بھی بنتا ہے۔ اگر درخواستیں واقعی اس کے کارکنوں نے جمع کرائی ہیں تو انہیں ان کے جواز اور ثبوت پیش کرنے چاہئیں۔ اگر کارکنوں کے نام ان کی اجازت کے بغیر استعمال ہوئے ہیں تو ان کی شناخت کے تحفظ اور ذمہ داروں کے خلاف کارروائی کا مطالبہ ہونا چاہیے۔ پارٹی کا یہ کہنا کہ اس نے کسی کو فارم سیون بھرنے کی ہدایت نہیں دی، اپنی جگہ ایک مؤقف ہے، لیکن اس سے ان درخواستوں کی حقیقت جانچنے کی ضرورت ختم نہیں ہوتی۔
اس معاملے کی قانونی اہمیت بھی معمولی نہیں۔ عوامی نمائندگی ایکٹ 1950 کی دفعہ 31 کے مطابق انتخابی فہرست کی تیاری، نظرثانی یا کسی نام کے اندراج و اخراج سے متعلق اگر کوئی شخص جانتے بوجھتے غلط تحریری بیان یا اعلان کرتا ہے تو اسے ایک سال تک قید، جرمانے یا دونوں کی سزا ہو سکتی ہے۔
یعنی اگر کسی کارکن نے کسی شہری کے خلاف جان بوجھ کر غلط معلومات فراہم کی ہیں تو یہ محض پارٹی کے اندرونی کام کی انجام دہی نہیں، ایک قانونی ذمہ داری بھی ہے۔ لیکن اگر کسی کارکن کا نام اس کی رضامندی کے بغیر استعمال ہوا ہے تو اسے بھی تحقیقات کے ذریعے واضح ہونا چاہیے۔ کسی کو محض اس کا نام درخواست میں درج ہونے کی بنیاد پر مجرم قرار نہیں دیا جا سکتا۔
الیکشن کمیشن نے 9 اکتوبر 2026 کو فارم سیون کے غیر معمولی استعمال پر نئی ہدایات جاری کرتے ہوئے ایک فرد کے لیے دعوؤں اور اعتراضات کی مدت میں زیادہ سے زیادہ دس درخواستوں کی حد مقرر کی۔ کمیشن نے اپنی ہدایت میں اعتراف کیا کہ غیر مستند بنیادوں پر بڑی تعداد میں فارم سیون جمع ہونے سے ووٹروں کو غیر ضروری پریشانی اور انتخابی عملے پر اضافی بوجھ پڑتا ہے۔ اس ہدایت میں بوتھ لیول ایجنٹس کے لیے بھی مقررہ حدود بیان کی گئیں۔
یہ پیش رفت اس بات کی نشاندہی کرتی ہے کہ فارم سیون کے استعمال میں غیر معمولی تعداد اور غیر مستند اعتراضات کا مسئلہ انتخابی ادارے کے نوٹس میں آ چکا ہے۔ لیکن سوال یہ ہے کہ کیا صرف درخواستوں کی تعداد محدود کر دینے سے مسئلہ حل ہو جائے گا؟ اصل ضرورت یہ ہے کہ ہر درخواست گزار کی شناخت کی تصدیق ہو، ہر اعتراض کے ساتھ قابلِ اعتماد ثبوت موجود ہو اور کسی بھی شہری کا نام حذف کرنے سے پہلے اسے مؤثر طور پر اپنا دفاع کرنے کا موقع دیا جائے۔
اس بحث کا دائرہ مغربی بنگال تک بھی پھیلتا ہے، جہاں ایس آئی آر کے بعد ووٹر لسٹ سے نام خارج ہونے کا معاملہ غیر معمولی صورت اختیار کر گیا۔ انڈین ایکسپریس کی 7 اپریل 2026 کی رپورٹ کے مطابق عدالتی جانچ کے بعد 27,16,393 ووٹروں کو انتخابی فہرست میں نااہل قرار دے کر خارج کیا گیا تھا۔ ان میں سے 14,28,771 افراد پہلے مرحلے کے انتخابات میں ووٹ نہیں ڈال سکتے تھے، کیونکہ اس مرحلے کی ووٹر لسٹ منجمد ہو چکی تھی۔ باقی افراد کے لیے دوسرے مرحلے سے پہلے اپیل کے ذریعے نام بحال کرانے کا امکان موجود تھا۔
یہ اعدادوشمار بتاتے ہیں کہ ووٹر لسٹ سے نام خارج ہونے کا معاملہ کس قدر بڑے پیمانے پر اثرانداز ہو سکتا ہے۔ تاہم یہ کہنا درست نہیں ہوگا کہ تمام 27 لاکھ افراد کے نام غیر قانونی طور پر حذف ہوئے یا انہیں ایک ہی وجہ سے ووٹ ڈالنے سے روکا گیا۔ ان ناموں کے اخراج کے پیچھے انتخابی جانچ اور عدالتی کارروائی شامل تھی، جس کے فیصلوں پر اپیل کا راستہ بھی موجود تھا۔ اصل سوال یہ ہے کہ اس عمل میں اہل شہریوں کے حقِ رائے دہی کے تحفظ کے لیے کتنے مؤثر انتظامات کیے گئے اور کتنے متاثرہ افراد کو بروقت انصاف مل سکا۔
آئین ہند کا آرٹیکل 326 بالغ رائے دہی کے اصول کو تسلیم کرتا ہے۔ اس کے تحت مقررہ قانونی اہلیت رکھنے والے شہریوں کو انتخابات میں ووٹ دینے کا حق حاصل ہے۔ یہ حق کسی سیاسی جماعت کی مہربانی نہیں، جمہوری نظام کی بنیاد ہے۔ اس لیے ووٹر لسٹ کی اصلاح کا عمل بھی اسی بنیادی اصول کے تابع ہونا چاہیے کہ کوئی اہل شہری محض انتظامی غلطی، غلط اعتراض یا شناخت کے ناجائز استعمال کے باعث اپنے حق سے محروم نہ ہو۔
یہاں بی جے پی کے کارکن کے لیے ایک اور سوال پیدا ہوتا ہے۔ وہ اپنی جماعت کی کامیابی کے لیے ووٹر کو بوتھ تک پہنچاتا ہے، لیکن اگر کسی اہل ووٹر کا نام غلط طریقے سے حذف ہو رہا ہو تو کیا وہ اس کے حق میں آواز اٹھائے گا؟ کیا اس کی سیاسی وفاداری اسے اپنے ہی علاقے کے شہری کے آئینی حق کے تحفظ سے روک سکتی ہے؟
یہ سوال محض بی جے پی کے کارکن سے نہیں، ہر سیاسی جماعت کے کارکن سے ہونا چاہیے۔ سیاسی وابستگی کسی شخص کو آئینی ذمہ داریوں سے آزاد نہیں کرتی۔ کسی پارٹی کے لیے کام کرنا اور اس کے ہر اقدام کی غیر مشروط حمایت کرنا دو الگ چیزیں ہیں۔
انتخابی شفافیت کے حوالے سے سی سی ٹی وی فوٹیج کا معاملہ بھی اسی بحث کا حصہ ہے۔ دسمبر 2024 میں انتخابی ریکارڈ کے قواعد میں تبدیلی کی گئی، جس کے بعد انتخابی عمل کی سی سی ٹی وی فوٹیج، ویب کاسٹنگ اور بعض دیگر الیکٹرانک ریکارڈ کے تحفظ اور عوامی معائنے کے طریقۂ کار پر سوالات اٹھے۔ انڈین ایکسپریس کی رپورٹ کے مطابق الیکشن کمیشن نے انتخابی عمل کی یہ الیکٹرانک ریکارڈنگ 45 دن تک محفوظ رکھنے اور متعلقہ حلقے میں انتخابی عرضی دائر نہ ہونے کی صورت میں اسے حذف کرنے کی ہدایت دی تھی۔ انتخابی عرضی زیر سماعت ہونے کی صورت میں ریکارڈ محفوظ رکھنے کی شرط بھی موجود تھی۔
کمیشن کا مؤقف انتخابی ریکارڈ کے غلط استعمال اور ووٹ کی رازداری کے تحفظ سے متعلق رہا ہے، جبکہ ناقدین کا کہنا ہے کہ شفافیت اور احتساب کے لیے ضروری ریکارڈ زیادہ مدت تک محفوظ رہنا چاہیے۔ دونوں پہلوؤں کو سامنے رکھتے ہوئے ایک متوازن نظام بنایا جا سکتا ہے جس میں ووٹ کی رازداری بھی برقرار رہے اور انتخابی بے ضابطگیوں کی تحقیقات کے لیے ضروری ثبوت بھی محفوظ رہیں۔
اگر بی جے پی کو یقین ہے کہ اس کی انتخابی کامیابی کارکنوں کی محنت اور عوامی حمایت کا نتیجہ ہے تو انتخابی عمل پر اٹھنے والے سوالات کا جواب دینے میں اسے کیا دشواری ہونی چاہیے؟ شفاف ریکارڈ اور غیر جانب دارانہ تحقیقات سے کسی سیاسی جماعت کی ساکھ کم نہیں ہوتی، بلکہ مضبوط ہوتی ہے۔ انتخابی عمل پر اعتماد صرف نتائج کا اعلان کر دینے سے پیدا نہیں ہوتا، بلکہ اس کے لیے ضروری ہے کہ نتائج تک پہنچنے کا پورا عمل قابلِ جانچ ہو۔
اس پورے تنازعے میں بی جے پی کے کارکن کا بحران صرف قانونی نہیں، اخلاقی اور سیاسی بھی ہے۔ بی جے پی کی سیاست میں مذہب، قوم اور دھرم کے تحفظ کے نعرے نمایاں رہے ہیں۔ ایسے میں اس کے کارکن کو یہ سوال بھی اپنے ضمیر سے پوچھنا چاہیے کہ کیا مذہب یا قوم کے نام پر سیاست کرنے کا مطلب یہ ہے کہ کسی دوسرے شہری کے آئینی حق سے چشم پوشی کی جائے؟ کیا کسی مخصوص مذہبی شناخت رکھنے والے ووٹر کے خلاف بلاجواز اعتراض کرنا قومی خدمت کے تصور میں شامل ہو سکتا ہے؟
کسی بھی مذہب کی اخلاقی تعلیمات میں انصاف، دیانت اور دوسروں کے حقوق کی پاسداری بنیادی اہمیت رکھتے ہیں۔ اسی طرح آئین بھی ہر اہل شہری کو یکساں انتخابی حق فراہم کرتا ہے۔ سیاسی کارکن اگر اپنے نظریے اور مذہبی وابستگی کو واقعی اخلاقی بنیاد سمجھتا ہے تو اسے سب سے پہلے انصاف کے اصول پر قائم رہنا ہوگا۔
یہاں ایک دلچسپ تضاد بھی سامنے آتا ہے۔ سیاسی جماعتیں اپنے کارکنوں کو انتخابی کامیابی کا اصل سرمایہ قرار دیتی ہیں، لیکن جب کارکن کسی متنازع کارروائی میں قانونی مشکل سے دوچار ہو تو کیا قیادت اس کی ذمہ داری قبول کرتی ہے؟ کیا اسے واضح طور پر بتایا جاتا ہے کہ کون سا کام قانونی ہے اور کون سا نہیں؟ کیا اسے یہ تربیت دی جاتی ہے کہ کسی شہری کے خلاف اعتراض جمع کرانے سے پہلے اس کے پاس مستند ثبوت ہونا چاہیے؟
سیاسی جماعتوں میں کارکن لیڈر بننے کے لیے آتا ہے۔ وہ اپنی محنت، عوامی رابطوں اور سیاسی شعور کے ذریعے آگے بڑھنے کا خواب دیکھتا ہے۔ لیکن اگر اس کی محنت کو صرف احکامات کی تعمیل تک محدود کر دیا جائے اور اسے ایسے کاموں میں استعمال کیا جائے جن کے قانونی نتائج سنگین ہو سکتے ہیں تو اس کا سیاسی مستقبل خود اسی جماعت کے ہاتھوں خطرے میں پڑ سکتا ہے۔
یہی فارم سیون کی دو دھاری تلوار ہے۔ اس کا غلط استعمال کسی شہری کے ووٹ کے حق کو متاثر کر سکتا ہے، اور اس میں جان بوجھ کر غلط معلومات فراہم کرنے والا کارکن خود بھی قانونی کارروائی کی زد میں آ سکتا ہے۔ دوسری طرف اگر اس کی شناخت کسی دوسرے نے استعمال کی ہے تو وہ بھی ایک الگ سنگین معاملہ ہے، جس کی تحقیقات ہونی چاہئیں۔
بی جے پی کی قیادت کے لیے اب ضروری ہے کہ وہ اپنے کارکنوں کے بارے میں محض انتخابی کامیابی کے وقت تعریفی جملے ادا کرنے کے بجائے ان کے قانونی اور اخلاقی تحفظ کے لیے بھی واضح پالیسی اختیار کرے۔ اسے اپنے کارکنوں کو یہ ہدایت دینی چاہیے کہ کسی اہل شہری کے خلاف غلط معلومات کی بنیاد پر فارم سیون جمع نہ کرائیں، اور اگر کسی کارکن کی شناخت کا ناجائز استعمال ہوا ہے تو اس کی غیر جانب دارانہ تحقیقات کا مطالبہ کریں۔ جہاں غلط درخواستیں ثابت ہوں، وہاں قانون کے مطابق کارروائی کی حمایت بھی کریں۔
لیکن اس سے بھی زیادہ اہم ذمہ داری خود کارکن کی ہے۔ اسے یہ سمجھنا ہوگا کہ سیاسی وفاداری کا مطلب اپنی عقل، ضمیر اور آئینی ذمہ داری کو پارٹی دفتر کے باہر چھوڑ آنا نہیں ہے۔ کسی جماعت سے وابستگی اس وقت تک سیاسی اعزاز ہے جب تک وہ شہری کے حقوق اور جمہوری اصولوں سے متصادم نہ ہو۔
جمہوریت میں کسی جماعت کی کامیابی صرف اس بات سے نہیں ناپی جاتی کہ اس کے کتنے امیدوار کامیاب ہوئے، بلکہ اس بات سے بھی کہ انتخابی عمل کتنا منصفانہ رہا اور کتنے شہریوں کو اپنے حق کے استعمال کا موقع ملا۔ اگر مقابلے کا میدان ہی غیر شفاف ہو جائے تو کارکن کی محنت، امیدوار کی مقبولیت اور قیادت کی حکمت عملی، سب اپنی معنویت کھونے لگتے ہیں۔
اس لیے آج بی جے پی کے کارکن کے سامنے ایک بنیادی انتخاب ہے۔ وہ محض پارٹی کی جیت کا محافظ بن کر رہنا چاہتا ہے یا جمہوریت اور آئین کے حقوق کا بھی محافظ بننا چاہتا ہے؟
کل تک جس کارکن کی شناخت یہ تھی کہ وہ ایک ایک ووٹر کو بوتھ تک پہنچاتا ہے، آج اگر اسی کے نام ووٹر کا نام کٹوانے کی درخواستوں میں سامنے آ رہے ہیں تو اسے اپنی سیاسی شناخت کے بارے میں سوچنا ہوگا۔ اسے اپنی قیادت سے جواب طلب کرنا ہوگا کہ اس کے نام سے کون درخواستیں جمع کر رہا ہے، ان کی بنیاد کیا ہے اور ان کے نتائج کی ذمہ داری کون قبول کرے گا؟
کیونکہ جمہوریت میں کارکن کا اصل فخر اس بات میں نہیں کہ وہ کتنے ووٹ کٹوا سکتا ہے، بلکہ اس بات میں ہے کہ وہ کتنے شہریوں کے ووٹ کے حق کی حفاظت کر سکتا ہے۔
اور آخر میں سوال صرف بی جے پی سے نہیں، اس کے ہر کارکن سے ہے:
کیا وہ اپنی جماعت کی جیت کے لیے کام کرتا ہے یا اس جمہوریت کے لیے بھی، جس نے اسے سیاسی کارکن بننے اور کل کا لیڈر بننے کا حق دیا ہے؟

Misbah Cloth Center Advertisment

Shaikh Akram

Shaikh Akram S/O Shaikh Saleem Chief Editor Aitebar News, Nanded (Maharashtra) Mob: 9028167307 Email: akram.ned@gmail.com

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے