سیلو تعلقہ کے بالور سمیت دیہی علاقوں میں نجی سود خوروں کے ذریعے غریبوں کی شدید لوٹ

سیلو :2؍اکتوبر(ابرار بیگ)سیلو تعلقہ کے بالور اور اس کے قریبی دیہی علاقوں میں گزشتہ کچھ عرصے سے غیر قانونی نجی سود خوری اور ساہوکاری کا جال تیزی سے پھیل رہا ہے۔ ضرورت مند اور غریب افراد کو 5 سے 10 فیصد فی مہینہ کے بھاری اور جابرانہ سود کی شرح پر رقم دے کر ان کا معاشی استحصال کیا جا رہا ہے۔فی الحال بارش کے رک جانے کے باعث کسان اور عام شہری شدید بحران کا شکار ہیں، اور اسی نازک صورتحال کا ناجائز فائدہ اٹھاتے ہوئے نجی سود خور ایک بار پھر فعال ہو گئے ہیں۔ بالور اور اس کے اطراف کے علاقوں میں غیر قانونی سود خوری کا نیٹ ورک اتنا وسیع ہو چکا ہے کہ من مانے اور بے تحاشا سود کے ذریعے غریبوں کو لوٹا جا رہا ہے۔عام شہریوں نے ریاستِ مہاراشٹرا کی حکومت اور انتظامیہ سے پرزور مطالبہ کیا ہے کہ اس غیر قانونی سود خوری کو روکنے کے لیے معاملے کی فوری اور باریک بینی سے تحقیقات کی جائیں اور ان ظالم سود خوروں کے خلاف سخت ترین قانونی کارروائی کی جائے۔