سڑک دھنسنے کے بعد میونسپل انتظامیہ کی ہنگامی کارروائی

ناندیڑ: 6 ؍اگست(نامہ نگار) شہر کی نندی گرام سوسائٹی کے کرشنا چوک میں 400 ملی میٹر قطر کی مرکزی پرانی زیرِ زمین ڈرین لائن کے اوپر سے ریت سے بھرا ایک بھاری ٹرک گزرنے کے باعث اندرونی سیاہ مٹی دھنس گئی، جس کے نتیجے میں سڑک بیٹھ گئی اور ریت سے لدا ٹرک گڑھے میں پھنس گیا۔ واقعے کے فوراً بعد میونسپل کارپوریشن انتظامیہ نے فوری کارروائی کرتے ہوئے ٹرک کو بحفاظت باہر نکال لیا، جبکہ متاثرہ ڈرین لائن اور سڑک کی مرمت کا کام جنگی پیمانے پر شروع کر دیا گیا ہے۔میونسپل کارپوریشن کے مطابق نندی گرام سوسائٹی کے کرشنا چوک سے کارپوریشن کی مرکزی زیرِ زمین ڈرین لائن گزرتی ہے۔ اس مرکزی لائن سے ایک ذیلی گلی سے آنے والی 400 ملی میٹر قطر کی ڈرین لائن ’’ٹی جوائنٹ‘‘ کے ذریعے منسلک ہے۔ چونکہ اس مقام کی زمین سیاہ مٹی پر مشتمل ہے، اس لیے بھاری ریت بردار ٹرک کے گزرنے سے زمین دباؤ برداشت نہ کر سکی اور دھنس گئی۔اس حادثے کے نتیجے میں سڑک کے نیچے موجود 400 ملی میٹر قطر کی پرانی ڈرین لائن اندر سے ٹوٹ گئی۔ ڈرین لائن منہدم ہونے سے اس کے اطراف کی مٹی اور سڑک کے نیچے موجود تعمیراتی مواد پانی اور گندے پانی کے ساتھ بہہ گیا، جس سے سڑک کے نیچے ایک بڑا خلا پیدا ہوگیا۔ بعد ازاں اوپر سے گزرنے والے بھاری ٹرک کا وزن اس خلا پر پڑنے سے سڑک بیٹھ گئی اور ٹرک گڑھے میں پھنس گیا۔اطلاع ملتے ہی میونسپل کارپوریشن کے متعلقہ شعبے کے انجینئروں اور ایمرجنسی ٹیم نے موقع پر پہنچ کر کارروائی شروع کی۔ سب سے پہلے کرین کی مدد سے ریت سے لدے بھاری ٹرک کو بحفاظت باہر نکالا گیا۔ شہریوں کی حفاظت کے پیش نظر فی الحال کرشنا چوک کی ٹریفک کو متبادل راستوں پر منتقل کر دیا گیا ہے، جبکہ جائے وقوع پر بیریکیڈنگ بھی کر دی گئی ہے۔فی الوقت مرکزی ڈرین لائن اور 400 ملی میٹر قطر کی ذیلی لائن کو دوبارہ جوڑنے کا کام تیزی سے جاری ہے۔ اس کے ساتھ ساتھ سڑک کے نیچے بننے والے خلا کو بھر کر سڑک کو سابقہ حالت میں بحال کرنے کی منصوبہ بندی بھی کی گئی ہے۔میونسپل انتظامیہ کا کہنا ہے کہ شہریوں کی پریشانی کو جلد از جلد ختم کرنے کے لیے تکنیکی ٹیمیں جائے وقوع پر شب و روز کام کر رہی ہیں۔ انتظامیہ نے عوام سے اپیل کی ہے کہ مرمتی کام مکمل ہونے تک تعاون کریں، متبادل راستوں کا استعمال کریں اور اس علاقے سے گزرتے وقت احتیاط برتیں۔