راشن ڈیلروں کا کمیشن بڑھانے کا مطالبہ

ناندیڑ: 6 اگست (نامہ نگار): آل مہاراشٹر فیئر پرائس شاپ کیپرس فیڈریشن، ناندیڑ ضلع یونٹ کی جانب سے راشن ڈیلروں کے مختلف دیرینہ مطالبات کی منظوری کے لیے ریاستی حکومت سے فوری مداخلت کی اپیل کی گئی ہے۔ اس سلسلے میں محکمۂ خوراک، شہری رسد اور صارفین کے تحفظ کے وزیر اور متعلقہ اعلیٰ حکام کو ایک تفصیلی یادداشت پیش کی گئی۔یادداشت میں مطالبہ کیا گیا ہے کہ ریاست بھر کے راشن ڈیلروں کا کمیشن فوری طور پر بڑھایا جائے تاکہ بڑھتی ہوئی مہنگائی اور انتظامی اخراجات کے پیش نظر انہیں معاشی راحت مل سکے۔ تنظیم نے خبردار کیا کہ اگر حکومت نے مطالبات پر جلد مثبت فیصلہ نہیں کیا تو راشن ڈیلروں کو احتجاج کا راستہ اختیار کرنا پڑ سکتا ہے۔تنظیم کے ضلع صدر دتاتریہ پٹیل نے بتایا کہ آل مہاراشٹر فیئر پرائس شاپ کیپرس فیڈریشن کی جانب سے جون 2026 ءسے مختلف مراحل میں تحریک چلائی جا رہی ہے۔ اسی سلسلے میں 6 اگست 2026ء کو محکمۂ خوراک کے پرنسپل سیکریٹری سے بھی ملاقات کی گئی، جس میں ریاست بھر کی تنظیموں نے مشترکہ طور پر اپنے مطالبات پیش کیے۔انہوں نے کہا کہ حکومت کو چاہیے کہ عوامی تقسیم نظام سے وابستہ راشن ڈیلروں کے مسائل کو سنجیدگی سے حل کرے، کیونکہ یہ طبقہ لاکھوں مستحق خاندانوں تک سرکاری غذائی اجناس پہنچانے میں اہم کردار ادا کرتا ہے۔اس موقع پر ناندیڑ ضلع راشن ڈیلرس ایسوسی ایشن کے عہدیداران اور آل مہاراشٹر فیئر پرائس شاپ کیپرس فیڈریشن کے نمائندوں کے علاوہ ریاست کے مختلف اضلاع سے آئے ہوئے راشن ڈیلر تنظیموں کے ذمہ داران بھی موجود تھے۔ انہوں نے حکومت سے مطالبہ کیا کہ راشن ڈیلروں کے مسائل کو ترجیحی بنیادوں پر حل کرتے ہوئے کمیشن میں مناسب اضافہ کیا جائے تاکہ عوامی تقسیم کے نظام کو مزید مؤثر اور مستحکم بنایا جا سکے۔