ناندیڑ: بجلی کے کھمبے سے کرنٹ لگنے پر 37 سالہ نوجوان جاں بحق

ناندیڑ: 5 ؍اگست (نامہ نگار) ناندیڑ شہر کے کھڑک پورہ علاقے میں منگل کی نصف شب ایک افسوسناک حادثہ پیش آیا، جہاں بجلی کے کھمبے سے کرنٹ لگنے کے باعث 37 سالہ شعیب عبدالغفار موقع پر ہی جاں بحق ہوگئے۔ اس سانحہ سے علاقے میں غم کی لہر دوڑ گئی ہے، جبکہ اہلِ علاقہ نے گہرے رنج و افسوس کا اظہار کیا ہے۔ پولیس اس بات کی تحقیقات کر رہی ہے کہ مرحوم آدھی رات کے وقت بجلی کے کھمبے پر کس مقصد سے چڑھے تھے۔موصولہ اطلاعات کے مطابق منگل کی رات تقریباً ساڑھے گیارہ سے بارہ بجے کے درمیان کھڑک پورہ علاقے میں اچانک بجلی منقطع ہوگئی۔ اس وقت شعیب عبدالغفار اپنے اہلِ خانہ کے ساتھ گھر پر موجود تھے۔ بجلی بند ہونے کے بعد وہ گھر سے باہر نکل گئے۔ تقریباً دس سے پندرہ منٹ بعد جب بجلی بحال ہوئی تو اچانک ان کی چیخ سنائی دی۔چیخ سن کر اہلِ خانہ اور محلے کے لوگ فوراً باہر نکلے تو دیکھا کہ شعیب اپنے گھر کے سامنے واقع بجلی کے کھمبے پر کرنٹ لگنے کی حالت میں پھنسے ہوئے ہیں۔ یہ منظر دیکھ کر ہر شخص سکتے میں آ گیا۔اطلاع ملتے ہی وزیرآباد پولیس اسٹیشن کی ٹیم، ناندیڑ میونسپل کارپوریشن کا فائر بریگیڈ عملہ اور متعلقہ محکمے کے اہلکار موقع پر پہنچ گئے۔ مقامی شہریوں کی مدد سے شعیب کو کھمبے سے نیچے اتارا گیا، تاہم اس وقت تک ان کی موت واقع ہو چکی تھی۔ بعد ازاں لاش کو پوسٹ مارٹم کے لیے سرکاری اسپتال منتقل کر دیا گیا۔پولیس کے مطابق شعیب عبدالغفار رات کے وقت بجلی کے کھمبے پر کس وجہ سے چڑھے تھے، اس کی وجوہات تاحال واضح نہیں ہو سکی ہیں۔ واقعے کے تمام پہلوؤں سے تحقیقات جاری ہیں۔ پولیس نے پنچنامہ مکمل کرتے ہوئے دیگر قانونی کارروائی شروع کر دی ہے، جبکہ بجلی کے نظام سے متعلق امور کی بھی جانچ کی جا رہی ہے۔اس افسوسناک واقعے کے بعد کھڑک پورہ علاقے میں سوگ کی فضا چھا گئی ہے۔ مقامی شہریوں نے بجلی کے نظام کی حفاظت پر سوالات اٹھاتے ہوئے مطالبہ کیا ہے کہ آئندہ ایسے حادثات کی روک تھام کے لیے مؤثر حفاظتی اقدامات کیے جائیں۔ وزیرآباد پولیس مزید تفتیش کر رہی ہے۔