جولائی میں ناندیڑ پولیس کی مؤثر کارروائیاں، کروڑوں روپئے کا غیر قانونی سامان ضبط

ناندیڑ:3؍اگست (نمائندہ اعتبار) ناندیڑ ضلع پولیس نے جولائی 2026 ءکے دوران جرائم پر قابو پانے، عوامی تحفظ کو یقینی بنانے اور قانون و نظم برقرار رکھنے کے لیے بھرپور کارروائیاں انجام دیتے ہوئے غیر قانونی سرگرمیوں کے خلاف سخت مہم چلائی۔ ضلع پولیس سپرنٹنڈنٹ ڈاکٹر نیلابھ روہن کی قیادت میں یکم جولائی سے 31 جولائی 2026 ءتک جاری خصوصی مہم کے دوران غیر قانونی دھندوں پر کریک ڈاؤن، سنگین جرائم کی تفتیش، گمشدہ موبائل فون کی بازیابی، خواتین اور طلبہ کی حفاظت، سائبر جرائم سے متعلق بیداری اور ٹریفک نظم و ضبط کے فروغ جیسے متعدد شعبوں میں نمایاں کامیابیاں حاصل کی گئیں۔
پولیس کی جانب سے جاری کردہ کارکردگی رپورٹ کے مطابق جولائی میں ریت کی غیر قانونی نکاسی کے 40، گٹکھا کے 26، جوا کے 80، شراب بندی قانون کے 317، منشیات کے 3 اور اسلحہ ایکٹ کے مختلف دفعات کے تحت متعدد مقدمات درج کیے گئے۔ ان کارروائیوں میں کروڑوں روپئے مالیت کا سامان ضبط کیا گیا، جن میں صرف غیر قانونی ریت سے متعلق کارروائیوں میں تقریباً 14 کروڑ 19 لاکھ روپئے سے زائد مالیت کا سامان ضبط کیا گیا، جبکہ گٹکھا، جوا، منشیات، غیر قانونی اسلحہ اور پاکستانی لیبل والے جعلی کاسمیٹکس بھی بڑی مقدار میں برآمد کیے گئے۔
رپورٹ میں بتایا گیا ہے کہ ’’مشن کووچ‘‘ کے تحت ضلع بھر کے اسکولوں، کالجوں اور کوچنگ مراکز میں طلبہ کو منشیات کے نقصانات، خواتین کی حفاظت، سائبر جرائم سے بچاؤ اور ٹریفک قوانین کے بارے میں آگاہ کرنے کے لیے خصوصی مہمات چلائی گئیں۔ اس کے ساتھ ہی شہر کے مختلف عوامی مقامات پر بھی ٹریفک بیداری پروگرام منعقد کیے گئے تاکہ سڑک حادثات میں کمی لائی جا سکے۔
ضلع پولیس نے گمشدہ موبائل فون کی بازیابی میں بھی نمایاں کامیابی حاصل کرتے ہوئے 471 موبائل فون تلاش کرکے ان کے اصل مالکان کے حوالے کیے۔ اس کے علاوہ انسانی اسمگلنگ کی روک تھام کے قانون (PITA) کے تحت دو مقدمات درج کرکے 13 ملزمان کے خلاف کارروائی کی گئی اور 11 متاثرین کو آزاد کرایا گیا۔ اغوا اور گمشدگی کے کئی معاملات میں بھی قابل ذکر پیش رفت کرتے ہوئے متعدد لڑکیوں، لڑکوں اور دیگر گمشدہ افراد کو تلاش کیا گیا۔
عدالتی مقدمات میں بھی ناندیڑ پولیس نے مؤثر پیروی کرتے ہوئے قتل، عصمت دری اور دیگر سنگین جرائم کے مقدمات میں مجرموں کو سزا دلانے میں کامیابی حاصل کی۔ اس مقصد کے لیے ’’ٹرائل مانیٹرنگ سیل‘‘ قائم کیا گیا، جس کی مدد سے کئی اہم مقدمات میں عمر قید اور دیگر سزائیں سنائی گئیں۔
جرائم کی روک تھام کے لیے اینٹی تھیفٹ پیٹرولنگ ٹیمیں، سٹی اسٹریٹ سیفٹی اسکواڈ، کومبنگ آپریشن، ناکہ بندی اور خواتین کے تحفظ کے لیے ’’دامنی پاتھک‘‘ مسلسل سرگرم رہے۔ ان اقدامات سے چوری، ڈکیتی، خواتین سے چھیڑ چھاڑ اور دیگر جرائم پر مؤثر قابو پانے میں مدد ملی۔
رپورٹ میں متعدد اہم کامیاب کارروائیوں کا بھی ذکر کیا گیا ہے، جن میں ’’میڈ اِن پاکستان‘‘ لیبل والے جعلی کاسمیٹکس کی بڑی کھیپ ضبط کرنا، زیورات کی ڈکیتی کا معمہ حل کرنا، بین الاضلاعی چوری کرنے والے گروہ کا پردہ فاش کرنا، پنجاب کی منشیات اسمگلنگ سے وابستہ مفرور ملزم کی گرفتاری، 15 چوری شدہ موٹر سائیکلوں کی برآمدگی، نو برس سے مفرور ملزم کو حیدرآباد (تلنگانہ) سے گرفتار کرنا، کالج کے طالب علم کے اغوا اور لوٹ مار میں ملوث گروہ کا سراغ لگانا، پنجاب سے اغوا شدہ کم عمر لڑکی کو بازیاب کرانا اور سائبر فراڈ میں استعمال ہونے والے ’’میول بینک اکاؤنٹ‘‘ ریکیٹ کا پردہ فاش کرنا شامل ہے۔
پولیس سپرنٹنڈنٹ ڈاکٹر نیلابھ روہن نے کہا ہے کہ ناندیڑ ضلع پولیس عوام کے جان و مال کے تحفظ، امن و امان کے قیام اور منظم جرائم کے خاتمے کے لیے ’’زیرو ٹالرنس‘‘ کی پالیسی پر عمل پیرا ہے۔ انہوں نے عوام سے اپیل کی کہ کسی بھی مشتبہ یا غیر قانونی سرگرمی کی اطلاع فوری طور پر پولیس کو دیں تاکہ امن و امان برقرار رکھنے میں عوامی تعاون حاصل ہو سکے۔