ناندیڑ میں ریت مافیا کے خلاف بڑا کریک ڈاؤن، 3.64 کروڑ روپئے کا سامان ضبط، 6 افراد کے خلاف مقدمہ

ناندیڑ: 31 جولائی(نمائندہ اعتبار): ناندیڑ دیہی پولیس نے غیر قانونی ریت کی کانکنی کے خلاف ایک بڑی کارروائی کرتے ہوئے تقریباً 3 کروڑ 64 لاکھ 45 ہزار 800 روپے مالیت کا سامان ضبط کر لیا۔ اس معاملے میں 6 افراد کے خلاف مقدمہ درج کیا گیا ہے، جبکہ چند دیگر ملزمان فرار ہونے میں کامیاب ہوگئے۔پولیس کے مطابق پولیس سپرنٹنڈنٹ ڈاکٹر نیلابھ روہن کی ہدایت پر ضلع بھر میں غیر قانونی سرگرمیوں کے خلاف خصوصی مہم جاری ہے۔ اسی مہم کے تحت 30 جولائی کو ناندیڑ دیہی پولیس اسٹیشن کے انچارج اوم کانت چنچولکر اپنی ٹیم کے ساتھ گشت پر تھے کہ خفیہ اطلاع ملی کہ آسرجن سے مارکنڈ علاقے کے درمیان دریائے گوداوری کے پاٹ میں کشتیوں، بیڑوں اور انجنوں کی مدد سے بڑے پیمانے پر غیر قانونی ریت نکالی جا رہی ہے۔اطلاع کی بنیاد پر پولیس نے پنچوں کی موجودگی میں موقع پر چھاپہ مارا۔ پولیس کو دیکھتے ہی کئی افراد موقع سے فرار ہوگئے، تاہم ریت کی غیر قانونی کانکنی میں استعمال ہونے والی بڑی مقدار میں مشینری اور سامان برآمد کر لیا گیا۔ضبط شدہ سامان میں 211 تیرتے ہوئے بیڑے، 15 انجن، 10 بڑی اور 5 چھوٹی لوہے کی کشتیاں، تقریباً 260 براس ریت، 25 بڑے ٹوکرے، 20 پھاوڑے، 28 ڈرم اور 20 لوہے کے پائپ شامل ہیں۔ پولیس نے موقع پر ہی استعمال ہونے والے بیشتر آلات کو تلف کر دیا، جبکہ مجموعی ضبط شدہ سامان کی مالیت 3 کروڑ 64 لاکھ 45 ہزار 800 روپے بتائی گئی ہے۔اس سلسلے میں نارائن بابوراؤ پنڈ، وٹھل دشرتھ ڈک، گووند بالاجی ڈک (ساکنان پمپل گاؤں)، سچن شری ساگر (ساکن کلال)، گنگا دھر میتھیواڑ، چندرکانت کاماجی لاکڑے (ساکن مارکنڈ) سمیت پانچ تا چھ نامعلوم افراد کے خلاف ناندیڑ دیہی پولیس اسٹیشن میں مقدمہ نمبر 928/2026 درج کیا گیا ہے۔ ان پر بھارتیہ نیائے سنہتا، مہاراشٹر لینڈ ریونیو کوڈ، ماحولیاتی تحفظ قانون اور عوامی املاک کو نقصان پہنچانے سے متعلق قوانین کی مختلف دفعات کے تحت کارروائی کی گئی ہے۔پولیس کا کہنا ہے کہ ملزمان نے بغیر کسی قانونی اجازت کے دریائے گوداوری سے ریت نکال کر سرکاری محصولات کو نقصان پہنچایا اور ماحولیات کو بھی شدید نقصان پہنچایا ہے۔ معاملے کی مزید تفتیش جاری ہے۔یہ کارروائی پولیس سپرنٹنڈنٹ ڈاکٹر نیلابھ روہن کی ہدایت پر ناندیڑ دیہی پولیس اسٹیشن کے انچارج اوم کانت چنچولکر، سب انسپکٹر وینکٹ کسمے، سب انسپکٹر باپوراؤ چوہان اور ان کی ٹیم نے انجام دی۔پولیس نے شہریوں سے اپیل کی ہے کہ اگر کہیں غیر قانونی ریت کی کانکنی، نقل و حمل یا ذخیرہ اندوزی کی اطلاع ملے تو فوری طور پر قریبی پولیس اسٹیشن یا پولیس کنٹرول روم کو مطلع کریں تاکہ ایسے عناصر کے خلاف سخت کارروائی کی جا سکے۔