ناندیڑ: ایس آئی آر مہم کا جائزہ، کام تیز کرنے کی ہدایت

ناندیڑ: 31 جولائی(نمائندہ اعتبار): ہندوستانی الیکشن کمیشن کی ہدایت کے مطابق ناندیڑواگھالہ شہر میونسپل کارپوریشن حدود میں ووٹر لسٹ کو تازہ ترین بنانے کے لیے اس وقت ’’ایس آئی آر‘‘ (خصوصی جامع نظرِ ثانی) مہم تیزی سے جاری ہے۔ مہم کے آخری مرحلے کی پیش رفت اور وارڈ وار کام کا جائزہ لینے کے لیے جمعہ، 31 جولائی 2026 کو میونسپل کارپوریشن کے مرکزی دفتر میں ایک اہم اجلاس منعقد ہوا۔ اجلاس کی صدارت میونسپل کمشنر و ایڈیشنل ضلع الیکشن آفیسر ڈاکٹر مہیش کمار ڈوئی پھوڑے نے کی۔اجلاس میں ایڈیشنل کمشنر گریش قدم، ڈپٹی کمشنر ابھیجیت وائیکوس، اجیت پال سنگھ سندھو، نتین گاڑھوے کے علاوہ متعلقہ تحصیلدار، علاقائی افسران، اسسٹنٹ ووٹر رجسٹریشن افسران اور محکمۂ انتخابات کے اعلیٰ افسران موجود تھے۔اجلاس میں اسسٹنٹ ووٹر رجسٹریشن افسران کے دائرۂ کار کے مطابق ڈیجیٹائزیشن سے باقی رہ جانے والے ووٹروں کے فیصد کا تفصیلی جائزہ لیا گیا۔ جن ووٹروں کی رہائش متعلقہ انتخابی حصہ میں موجود نہیں پائی گئی، ان کے بارے میں پنچ نامہ کی مقررہ کارروائی مکمل کرکے انہیں "غیر دستیاب” (Untraced) کے طور پر درج کرنے کی ہدایت دی گئی۔ اس کے علاوہ باقی ماندہ کام کی باریک بینی سے منصوبہ بندی کرتے ہوئے زیادہ سے زیادہ کام ہفتہ اور اتوار کے دوران مکمل کرنے کی ہدایت دی گئی۔ اس موقع پر پولنگ اسٹیشنوں کی تنظیمِ نو اور ممکنہ سماعتوں کی منصوبہ بندی پر بھی تبادلۂ خیال کیا گیا اور دونوں ووٹر رجسٹریشن افسران کو ہدایت دی گئی کہ متعلقہ کارروائی مقررہ مدت کے اندر مکمل کی جائے۔ڈاکٹر مہیش کمار ڈوئی پھوڑے نے واضح کیا کہ ایک بھی اہل ووٹر کا نام درج ہونے سے محروم نہ رہے، اس کے لیے خصوصی احتیاط برتی جائے۔ انہوں نے یہ بھی ہدایت دی کہ مہم میں شفافیت اور تیزی برقرار رکھنے کے لیے سینئر افسران پولنگ مراکز اور بی ایل اوز کے کام کا اچانک معائنہ کریں۔ انہوں نے کہا کہ اس مہم کے اختتام میں اب صرف آٹھ دن باقی رہ گئے ہیں، لہٰذا تمام افسران اور عملہ کام کی رفتار مزید تیز کریں، وقت ضائع نہ کریں اور تمام کارروائی مقررہ مدت میں مکمل ہونے کو یقینی بنائیں۔قابلِ ذکر ہے کہ میونسپل کارپوریشن انتظامیہ نے شہر کے تمام باشعور شہریوں سے اپیل کی ہے کہ وہ جمہوریت کو مضبوط بنانے کی اس قومی مہم میں بھرپور تعاون کریں۔ اگر بی ایل او یا اس کا نمائندہ آپ کے گھر آئے تو اسے درست معلومات فراہم کریں تاکہ کوئی بھی اہل شہری حقِ رائے دہی سے محروم نہ رہ جائے۔