ناندیڑ: چوری کے مقدمے کا معمہ حل، پانچ ملزمان گرفتار، مسروقہ مال برآمد

ناندیڑ: 30؍جولائی ( نمائندہ اعتبار) پولیس سپرنٹنڈنٹ ڈاکٹر نیلابھ روہن کی رہنمائی میں اتوارہ پولیس اسٹیشن کی کرائم برانچ نے چوری کے ایک مقدمے کا قلیل مدت میں سراغ لگا کر پانچ ملزمان کو گرفتار کر لیا اور چوری شدہ تمام مال برآمد کرنے میں کامیابی حاصل کی۔تفصیلات کے مطابق، نعمانیہ کالونی، ناندیڑ کے ساکن شیخ شہباز شیخ جعفر (عمر 40 سال) نے شکایت درج کرائی تھی کہ 24 جولائی 2026 ءکو صبح تقریباً 9 بجے وہ مدینہ نگر، دیگلور ناکہ، ناندیڑ میں واقع کرائے کے مکان سے اپنا گھریلو سامان نعمانیہ کالونی منتقل کر رہے تھے۔ اسی دوران ملزمان نے باہمی سازش کے تحت ان کے طبی پیشے اور حادثاتی بیمہ سے حاصل شدہ رقم سمیت تقریباً 8 لاکھ 12 ہزار روپے مالیت کا سامان چوری کر لیا۔اس شکایت کی بنیاد پر اتوارہ پولیس اسٹیشن میں مقدمہ نمبر 261/2026، بھارتیہ نیائے سنہتا (BNS) کی دفعات 306 اور 3(5) کے تحت مقدمہ درج کیا گیا۔مقدمہ درج ہوتے ہی کرائم برانچ نے جائے وقوع کا معائنہ کیا اور تکنیکی شواہد، سی سی ٹی وی فوٹیج، خفیہ مخبروں سے حاصل ہونے والی معلومات اور دیگر تفتیشی ذرائع کی مدد سے ملزمان کی تلاش شروع کی۔ خفیہ اطلاع کی بنیاد پر پولیس نے پیراجی بالو واگھمارے (51 سال)، سنیل بابوراؤ ریمپنواڑ (26 سال)، سنیل چمن جی واگھمارے (24 سال)، صاحب راؤ پیراجی واگھمارے (28 سال) اور تنشک گنپت میٹکر (19 سال) کو گرفتار کر لیا۔دورانِ تفتیش ملزمان نے جرم کا اعتراف کر لیا، جس کے بعد ان کے قبضے سے چوری شدہ 8 لاکھ 12 ہزار روپے مالیت کا مکمل مسروقہ مال برآمد کر لیا گیا۔ پولیس کی جانب سے مزید تفتیش جاری ہے۔ملزمان کو عدالت میں پیش کیا گیا، جہاں عدالت نے انہیں 14 دن کی عدالتی تحویل میں بھیج دیا۔یہ کارروائی پولیس سپرنٹنڈنٹ ڈاکٹر نیلابھ روہن، سب ڈویژنل پولیس آفیسر پرشانت شندے کی رہنمائی میں پولیس انسپکٹر رامیشور خنال، پولیس انسپکٹر سنجے شندے، پولیس سب انسپکٹر آگلاوے اور کرائم برانچ کے اہلکار ہرپریت سنگھ سکھئی، شیخ اسرائیل، ریون ناتھ کورنولے، صاحب راؤجگتاپ، بندو قلندر، ماروتی گیتے اور بشیر چودھری نے کامیابی کے ساتھ انجام دی۔