نجی اسپتال، کلینک، لیبارٹری، بلڈ بینک اور فارمیسی اپنی رجسٹریشن کرائیں

ناندیڑ: 30 جولائی (نمائندہ اعتبار): ناندیڑ ضلع کے تمام سرکاری اور بامبے نرسنگ ہوم ایکٹ و دیگر قوانین کے تحت آنے والے تمام نجی طبی اداروں، جن میں اسپتال، کلینک، ڈائگناسٹک سینٹر، لیبارٹری، میڈیکل اسٹور، امیجنگ سینٹر (ایکس رے/ایم آر آئی)، بلڈ بینک اور فارمیسی شامل ہیں، کے لیے آیوشمان بھارت ڈیجیٹل مشن (ABDM) کے تحت رجسٹریشن کرانا لازمی قرار دیا گیا ہے۔ اس مقصد کے لیے مقررہ مدت بھی طے کر دی گئی ہے۔ضلعی انتظامیہ نے ضلع کے تمام شہریوں، خواہ وہ معاشی طور پر مستحکم ہوں یا کمزور، سے اپیل کی ہے کہ وہ اپنے تمام اہلِ خانہ کے آبھا (ABHA) کارڈ بنوائیں۔ یہ کارڈ ABHA موبائل ایپلی کیشن یا قریبی سرکاری صحت مرکز پر صرف آدھار کارڈ کی مدد سے مفت حاصل کیا جا سکتا ہے۔انتظامیہ کے مطابق آیوشمان بھارت ڈیجیٹل مشن کے ذریعے مریضوں اور اسپتالوں سے متعلق معلومات کی رازداری اور تحفظ کو یقینی بنایا جاتا ہے۔ حکومت اس نظام کے ذریعے کسی بھی نجی طبی ادارے کے انتظامی امور میں مداخلت یا کنٹرول نہیں کرتی، لہٰذا نجی اداروں کو کسی قسم کے خدشے یا ہچکچاہٹ کے بغیر اس منصوبے میں شامل ہونا چاہیے۔میونسپل حدود، تعلقہ سطح اور دیہی علاقوں کے تمام نجی اسپتال، کلینک، ڈائگناسٹک سینٹر، لیبارٹری، میڈیکل اسٹور، امیجنگ سینٹر (ایکس رے/ایم آر آئی)، بلڈ بینک اور فارمیسی کے لیے ہیلتھ فیسلٹی رجسٹری (HFR) میں رجسٹریشن اور وہاں خدمات انجام دینے والے ڈاکٹروں اور نرسنگ اسٹاف کے لیے ہیلتھ پروفیشنل رجسٹری (HPR) میں اندراج ضروری ہے۔ اس سلسلے میں رجسٹریشن کے لیے آنے والے سرکاری محکمۂ صحت کے اہلکاروں سے مکمل تعاون کرنے کی بھی اپیل کی گئی ہے۔واضح رہے کہ آیوشمان بھارت ڈیجیٹل مشن (ABDM) حکومتِ ہند کی نیشنل ہیلتھ اتھارٹی (NHA) کی ایک اہم اسکیم ہے، جس کا مقصد ملک بھر میں مربوط ڈیجیٹل صحت کا نظام قائم کرنا ہے۔ اس کے تحت مریضوں کی طبی معلومات، سابقہ میڈیکل رپورٹس، نسخے اور تشخیصی رپورٹیں محفوظ ڈیجیٹل شکل میں محفوظ رکھی جاتی ہیں، جبکہ مریض، ڈاکٹر اور اسپتال ایک ہی ڈیجیٹل پلیٹ فارم سے منسلک ہوتے ہیں۔ اس منصوبے کے تحت ہر شہری کو 14 ہندسوں پر مشتمل آیوشمان بھارت ہیلتھ اکاؤنٹ (ABHA) آئی ڈی فراہم کی جاتی ہے۔اس اسکیم کی ایک اہم خصوصیت یہ بھی ہے کہ مریض کی رضامندی کے بغیر اس کی کوئی بھی طبی معلومات کسی کے ساتھ شیئر نہیں کی جاتی، اور معلومات کی رازداری و تحفظ کو اولین ترجیح دی جاتی ہے۔قومی صحت اتھارٹی، حکومتِ ہند اور کمشنر محکمۂ صحت، ممبئی کی ہدایات کے مطابق ناندیڑ ضلع کو "ABDM ماڈل ضلع” کے طور پر منتخب کیا گیا ہے۔ضلعی سرجن کے دفتر کی جانب سے جاری کردہ اطلاع کے مطابق ضلع کی تمام سرکاری صحت اداروں کا HFR میں اور وہاں خدمات انجام دینے والے ڈاکٹروں و نرسنگ اسٹاف کا HPR میں اندراج مکمل ہو چکا ہے، جبکہ شہریوں کے آبھا کارڈ روزانہ کی بنیاد پر بنائے جا رہے ہیں۔