پولیس ڈپٹی انسپکٹر جنرل شہاجی اُماپ کا ناندیڑ میں شکایت کنندگان سے ’جن سنواد‘

ناندیڑ: 28؍جولائی(نمائندہ اعتبار)شہریوں کی شکایات کو براہِ راست سن کر ان کا فوری ازالہ کرنا اور پولیس و عوام کے درمیان رابطے کو مضبوط بناتے ہوئے عوام دوست طرزِ عمل کے ذریعے پولیس پر عوام کے اعتماد کو مزید مستحکم کرنا، اس مقصد کے تحت ناندیڑ رینج کے پولیس ڈپٹی انسپکٹر جنرل شہاجی اُماپ نے رینج کے چاروں اضلاع میں "جن سنواد” (عوامی رابطہ) مہم کا آغاز کیا ہے۔رینج کے چاروں اضلاع کی کارکردگی کا جائزہ لینے کے لیے پولیس ڈپٹی انسپکٹر جنرل ہر ماہ ضلعی ہیڈکوارٹر کا دورہ کرتے ہیں۔ اس موقع پر وہ متعلقہ ضلع کے شکایت کنندگان سے بالمشافہ ملاقات کرکے ان کی شکایات اور مسائل سنتے ہیں اور ان کے فوری ازالے کی کوشش کرتے ہیں۔28 جولائی کو پولیس ڈپٹی انسپکٹر جنرل شہاجی اُماپ نے ضلع ناندیڑ میں پولیس سپرنٹنڈنٹ کے دفتر میں ضلعی پولیس کی ماہانہ کارکردگی کا جائزہ لینے کے بعد دوپہر 3 بجے سے شام 5 بجے تک ضلع کے شکایت کنندگان سے براہِ راست ملاقات کی۔ اس دوران مجموعی طور پر 17 شکایت کنندگان نے اپنی تحریری درخواستیں ڈی آئی جی کے حوالے کیں، جن میں جائیداد کے تنازعات، لاپتہ افراد، مارپیٹ کے واقعات، درج مقدمات کی تفتیش اور دیگر معاملات سے متعلق شکایات شامل تھیں۔اسی روز موصول ہونے والی تمام شکایات کا سنجیدگی سے نوٹس لیتے ہوئے ان کے جلد از جلد ازالے کے لیے متعلقہ سب ڈویژنل پولیس افسران اور پولیس تھانوں کے انچارجوں کو ضروری ہدایات جاری کی گئیں۔شکایت کنندگان کی درخواستوں کے فوری تصفیے کے لیے پولیس ڈپٹی انسپکٹر جنرل کے دفتر کی جانب سے پہلے ہی "سنویدنا” (Sensvedana) نامی شکایت ازالہ نظام شروع کیا جا چکا ہے۔ آج "جن سنواد” پروگرام کے دوران موصول ہونے والی تمام درخواستیں مزید جانچ اور کارروائی کے لیے "سنویدنا” پورٹل کے ذریعے متعلقہ افسران کو ارسال کی جائیں گی، جبکہ ہر شکایت پر ہونے والی کارروائی کا جائزہ ناندیڑ رینج دفتر کی فیڈبیک ٹیم کی جانب سے لیا جائے گا۔اس موقع پر پولیس سپرنٹنڈنٹ نیلابھ روہن، ایڈیشنل سپرنٹنڈنٹ آف پولیس ارچنا پاٹل، ایڈیشنل سپرنٹنڈنٹ آف پولیس سورج گرو، ضلع ناندیڑ کے تمام سب ڈویژنل پولیس افسران، پولیس انسپکٹرز، لوکل کرائم برانچ، اکنامک کرائم برانچ اور شہر کے تمام پولیس اسٹیشنوں کے انچارج افسران موجود تھے۔