خلیل الحیہ تنظیم کے سیاسی دفتر کے سربراہ منتخب ہو گئے : حماس

غزہ:21؍جولائی:فلسطینی تنظیم حماس نے اسرائیل کے ساتھ جنگ بندی مذاکرات میں نمایاں رہنما اور چیف مذاکرات کار خلیل الحیہ کو اپنے سیاسی دفتر کا سربراہ منتخب کرنے کا اعلان کیا ہے۔ وہ غزہ کی پٹی میں جنگ کے دوران اسرائیل کے ہاتھوں مارے جانے والے یحییٰ سنوار کے جانشین ہوں گے۔تنظیم نے پیر کے روز جاری بیان میں کہا ہے کہ اسلامی مزاحمتی تحریک حماس، برادر خلیل الحیہ کے سربراہ سیاسی دفتر منتخب ہونے کا اعلان کرتی ہے جو قائد یحییٰ سنوار کے جانشین ہوں گے۔تنظیم کے نئے سربراہ پانچ رکنی لیڈرشپ کونسل کی جگہ لیں گے جس کی سربراہی محمد درویش کر رہے تھے، جو کہ مجلس شوریٰ عام کے سربراہ ہیں۔ یہ کونسل اکتوبر 2024 میں سابق سربراہ سیاسی دفتر یحییٰ سنوار کے قتل کے بعد قائم کی گئی تھی، جنہوں نے یہ ذمہ داریاں سابق سربراہ سیاسی دفتر اسماعیل ہنیہ سے سنبھالی تھیں۔ ہنیہ کو اسرائیل نے اسی سال جولائی میں ایران کے دارالحکومت تہران میں قتل کر دیا تھا۔عام سیاسی دفتر غزہ کی پٹی، مغربی کنارے اور بیرون ملک کے حلقوں کی نمائندگی کرتا ہے، جس میں ہر حلقے سے چھ اراکین کا انتخاب کیا جاتا ہے۔تنظیم نے حماس تنظیم کے سیاسی دفتر کے نئے سربراہ کے انتخاب کے عمل کا پہلا مرحلہ یحییٰ سنوار کے جانشین کے طور پر مکمل کر لیا تھا، جس میں غزہ کی پٹی کے حلقے میں ووٹنگ کا عمل مکمل ہوا جہاں غزہ کی پٹی کے اندر موجود مجلس شوریٰ عام کے اراکین نے ووٹ ڈالے۔با خبر ذرائع نے بتایا تھا کہ غزہ کی پٹی میں ابتدائی نتائج میں غزہ کی پٹی میں تنظیم کے سربراہ ڈاکٹر خلیل الحیہ کی اپنے حریف خالد مشعل، جو بیرون ملک حلقے کے سربراہ ہیں، پر بڑی کامیابی ظاہر ہوئی تھی۔ یہ انتخابات گذشتہ ہفتے کے روز انتہائی سخت سکیورٹی اقدامات کے درمیان ہوئے۔ اس موقع پر خفیہ رائے شماری کا طریقہ کار اپنایا گیا تاکہ مکمل رازداری برقرار رکھی جا سکے اور اسرائیلی حملے کے خدشے کے پیش نظر قیادت کو ایک جگہ جمع ہونے سے روکا جا سکے۔اس ووٹنگ میں مجلس شوریٰ عام کے غزہ کی پٹی کے کوٹے کے 23 اراکین نے حصہ لیا، جس کے کل اراکین کی تعداد 69 ہے۔ اگرچہ اس راؤنڈ میں الحیہ کو نمایاں برتری حاصل تھی، لیکن ذرائع نے تصدیق کی کہ حتمی نتیجہ ابھی طے نہیں ہوا، کیونکہ انتخابی مقابلہ اب بھی جاری ہے اور مغربی کنارے اور بیرون ملک کے حلقوں کے نتائج کا انتظار ہے جو کہ اگلے صدر کا تعین کرنے میں حتمی ثابت ہوں گے۔یہ فیصلہ کن انتخابی مرحلہ موجودہ عمل کا تیسرا مرحلہ ہے، اس سے قبل دو مراحل میں کوئی بھی امیدوار، الحیہ یا مشعل، جیتنے کے لیے درکار قانونی کوٹہ حاصل کرنے میں کامیاب نہیں ہو سکا تھا، کیونکہ تنظیم کے اندرونی ضابطے کے مطابق سربراہ سیاسی دفتر بننے کے لیے امیدوار کا مجلس شوریٰ عام کے اراکین کے کم از کم 36 ووٹ حاصل کرنا ضروری ہے۔