پرائمری گریجویٹ اساتذہ کو بلا امتیاز گریجویٹ پے اسکیل نافذ کرنے کے مطالبے پر ایم ایل سی (اساتذہ) وکرم کالے سے ملاقات

جالنہ:18؍جولائی ( نمائندہ) ناگپور ہائی کورٹ کے تاریخی فیصلے کی روشنی میں ریاست کے تمام پرائمری گریجویٹ اساتذہ کو کسی بھی قسم کے امتیاز کے بغیر یکساں طور پر گریجویٹ پے اسکیل نافذ کیا جائے، اس اہم مطالبے کے سلسلے میں آج مراٹھواڑہ خطے کے اساتذہ کے رکنِ قانون ساز کونسل (ایم ایل سی) جناب وکرم کالے سے ملاقات کی گئی اور انہیں اس ضمن میں ایک تفصیلی یادداشت پیش کی گئی۔اس موقع پر بتایا گیا کہ سال 2016 سے ضلع جالنہ سے اس جدوجہد کا آغاز کیا گیا تھا، جو بعد ازاں پورے ریاستی سطح پر مسلسل جاری رکھی گئی۔ پرائمری گریجویٹ اساتذہ کے ساتھ ہونے والی ناانصافی کے خلاف طویل قانونی اور تنظیمی جدوجہد کے بعد بالآخر ناگپور ہائی کورٹ کا موافق فیصلہ حاصل ہوا۔ لہٰذا اس فیصلے پر عمل درآمد کرتے ہوئے ریاست کے تمام اہل پرائمری گریجویٹ اساتذہ کو مساوات اور انصاف کے اصول کے تحت گریجویٹ پے اسکیل دیا جائے، یہی پُرزور مطالبہ پیش کیا گیا۔پرائمری گریجویٹ پے اسکیل سنگھرش کمیٹی کے ریاستی کوآرڈینیٹر دیویندر بارگجے اور جاوید خان نے ایم ایل سی وکرم کالے کے سامنے اس معاملے کے قانونی، انتظامی اور تعلیمی پہلوؤں کی تفصیل پیش کی۔ نیز انہوں نے درخواست کی کہ عدالت کے فیصلے پر فوری عمل درآمد کرایا جائے اور اساتذہ کو انصاف دلانے کے لیے حکومتی سطح پر مؤثر پیروی کی جائے۔اس موقع پر ایم ایل سی وکرم کالے نے کہا: "حال ہی میں ریاستی حکومت کے سیکریٹری صاحبان کے ساتھ ہونے والی میٹنگ میں اس موضوع پر گفتگو ہوئی ہے اور اس سلسلے میں مسلسل پیروی جاری ہے۔ تاہم ممکن ہے کہ حکومت سپریم کورٹ یا ہائی کورٹ میں نظرِ ثانی کی درخواست (Review Petition) دائر کرنے پر غور کرے۔ اگر ایسا ہوتا ہے تو آئندہ قانونی جدوجہد کے لیے سب کو تیار رہنا ہوگا۔”اس پر سنگھرش کمیٹی کی جانب سے واضح مؤقف پیش کرتے ہوئے کہا گیا: "عدالت کی جانب سے دیا گیا انصاف ہر اہل پرائمری گریجویٹ استاد تک پہنچنا چاہیے۔ مساوی کام، مساوی اہلیت اور مساوی انصاف کے اصول کے تحت ریاست کے تمام پرائمری گریجویٹ اساتذہ کو بلا امتیاز گریجویٹ پے اسکیل ضرور ملنا چاہیے۔”اس موقع پر ٹیچرز کمیٹی کے ضلعی صدر مدھوکر کاکڑے، راشٹروادی ٹیچرز یونین کے ضلعی صدر اُدھو پوار، ٹیچر بھارتی کے ضلعی صدر دیویندر بارگجے، آل مہاراشٹر اردو ٹیچرز ایسوسی ایشن کے ضلعی صدر جاوید خان، آل انڈیا اردو ٹیچرز ایسوسی ایشن کے ضلعی صدر عبداللہ چاؤس، سدھاکر راؤت اور ریاض خان بھی موجود تھے۔