ضلع منصوبہ بندی کمیٹی کا اجلاس منعقد

ناندیڑ: 17 جولائی(نمائندہ اعتبار) ریاستی وزیر برائے دیگر پسماندہ طبقات و بہوجن فلاح، ڈیری ڈیولپمنٹ، غیر روایتی توانائی اور معذورین کو بااختیار بنانے کے امور نیز ضلع ناندیڑ کے سرپرست وزیر اتل ساوے نے کہا کہ ضلع میں زراعت، صحت، تعلیم، بجلی، پینے کے پانی، سڑکوں اور دیگر بنیادی سہولیات سے متعلق ترقیاتی کاموں کو معیاری انداز میں اور تیز رفتاری کے ساتھ مکمل کرنے کے لیے تمام محکمے باہمی تال میل کے ساتھ کام کریں۔ انہوں نے یقین دلایا کہ ترقیاتی منصوبوں کے لیے فنڈز کی کوئی کمی نہیں ہونے دی جائے گی۔اجلاس میں ضلع سالانہ منصوبہ 2026-27 کے تحت 867.59 کروڑ روپے کے منصوبے کو منظوری دی گئی۔ سرپرست وزیر نے اسکولوں میں بیت الخلاء، اضافی جماعتی کمروں، شمشان بھومی کے لیے زمین کی فراہمی اور بنیادی سہولیات پر ترجیحی بنیادوں پر اخراجات کرنے کی ہدایت دی۔ اس کے علاوہ ضلع سالانہ منصوبہ 2025-26 کے تحت عمومی منصوبہ، درج فہرست ذاتوں کی ذیلی اسکیم اور قبائلی و غیر قبائلی علاقوں کی ذیلی اسکیموں کے لیے 790.57 کروڑ روپے کے اخراجات کو منظوری دی گئی، جبکہ 2026-27 کے لیے 867.59 کروڑ روپے کے منصوبہ بندی بجٹ کو بھی منظوری حاصل ہوئی۔وہ آج ضلع کلکٹر آفس کے پلاننگ بھون میں منعقدہ ضلع منصوبہ بندی کمیٹی کے اجلاس سے خطاب کر رہے تھے۔ اجلاس میں سابق وزیر اعلیٰ و رکن پارلیمنٹ اشوک چوہان، ارکان پارلیمنٹ ڈاکٹر اجیت گوپچھڑے، رویندر چوہان، ناگیش پاٹل آشٹیکر، ڈاکٹر شیواجی کالگے، ارکان اسمبلی امر راجورکر، وکرم کالے، بھیمراؤ کیرام، راجیش پوار، ڈاکٹر تشار راٹھوڑ، شری جیا چوہان، بالاجی کلیانکر، آنندراؤ تڈکے بونڈھارکر، جتیش انتاپورکر، بابوراؤ کوہلیکر، ضلع کلکٹر راہول کرڈیلے، ضلع پریشد کے چیف ایگزیکٹیو آفیسر مہیش پاٹل، سپرنٹنڈنٹ آف پولیس ڈاکٹر نیلب روہن، میونسپل کمشنر ڈاکٹر مہیش کمار ڈوئیفوڈے، رہائشی ڈپٹی کلکٹر کرن امبیکر، ضلع منصوبہ بندی افسر سدھاکر چنچانے اور دیگر افسران موجود تھے۔
اتل ساوے نے کہا کہ ضلع میں نامکمل ترقیاتی کاموں کو مقررہ مدت میں مکمل کرنے پر خصوصی توجہ دی جائے۔ اسکولوں کی زمین حکومت کے نام رجسٹر کرانے کا عمل جلد مکمل کیا جائے تاکہ انہیں ترقیاتی اور سی ایس آر فنڈز کے حصول میں دشواری نہ ہو۔ انہوں نے کہا کہ اس سال بارش کم ہونے اور ایل نینو کے اثرات کے باعث آئندہ پانی کی قلت کا خدشہ ہے، اس لیے پینے کے پانی کی مناسب منصوبہ بندی ابھی سے کی جائے۔انہوں نے ہدایت دی کہ ضلع کی تمام زیر التوا شمشان بھومیوں کے کام سو فیصد مکمل کرنے کے لیے انتظامیہ اور عوامی نمائندے مشترکہ کوششیں کریں۔ فصل بیمہ کے معاملات جلد از جلد نمٹا کر کسانوں کو انصاف فراہم کیا جائے۔ غیر قانونی کاروبار کے خلاف سخت کارروائی کرتے ہوئے امن و امان برقرار رکھا جائے اور اس معاملے میں کسی کے ساتھ نرمی نہ برتی جائے۔سرپرست وزیر نے کہا کہ پوچم پاڈ ڈیم کے بیک واٹر مسئلے کا مستقل حل نکالنے کے لیے کولہاپور ماڈل کی طرز پر اقدامات کیے جائیں گے۔ ناندیڑ شہر میں عوامی ٹرانسپورٹ کو مضبوط بنانے کے لیے 150 الیکٹرک بسوں کی فراہمی کی تجویز مرکزی حکومت کو بھیجنے کی ہدایت انہوں نے میونسپل کمشنر کو دی۔ضلع میں آبی تحفظ کے منصوبوں کے لیے اراضی کے حصول کا عمل مؤثر انداز میں مکمل کرنے پر ضلع کلکٹر راہول کرڈیلے، ڈپٹی کلکٹر پرینکا کرڈیلے اور پروین میگشیٹی کو سرپرست وزیر نے مبارکباد پیش کی۔اجلاس میں سابق وزیر اعلیٰ و رکن پارلیمنٹ اشوک چوہان سمیت تمام عوامی نمائندوں نے ریاستی حکومت کی پنیہ شلوک اہلیہ دیوی ہولکر کسان قرض معافی اسکیم اور بجلی بل میں رعایت کے فیصلے پر وزیر اعلیٰ دیویندر فڈنویس، نائب وزیر اعلیٰ ایکناتھ شندے اور نائب وزیر اعلیٰ سنیتراتائی پوار کا خیر مقدم کرتے ہوئے اظہارِ تشکر کیا۔
سی سی ٹی این ایس نظام میں ناندیڑ ریاست بھر میں اول:
پولیس محکمہ کے سی سی ٹی این ایس (Crime and Criminal Tracking Network & Systems) نظام میں مہاراشٹر بھر میں ناندیڑ ضلع کو پہلا مقام حاصل ہونے پر سرپرست وزیر اتل ساوے نے پولیس انتظامیہ کو مبارکباد دی۔
عوامی نمائندوں نے مختلف مسائل پیش کیے:
اجلاس میں ارکان پارلیمنٹ اور ارکان اسمبلی نے بجلی اور پانی کی فراہمی، فصل بیمہ، سڑکوں کی تعمیر، صحت کی سہولیات، دوبارہ بوائی کے بحران، اسکولوں کی عمارتوں، بس سروس، مواصلاتی سہولیات، شمشان بھومی، امن و امان، شہر میں سی سی ٹی وی نظام، شجرکاری، معذورین کے لیے سہولیات، تجاوزات، اساتذہ کی ایڈجسٹمنٹ، آبی تحفظ منصوبوں کے لیے فنڈز، ای وی چارجنگ اسٹیشن، شہر میں ہورڈنگز کے اسٹرکچرل آڈٹ اور ٹریفک جام سمیت مختلف مسائل اٹھائے۔سرپرست وزیر نے متعلقہ افسران کو ہدایت دی کہ آئندہ ضلع منصوبہ بندی کمیٹی کے اجلاس سے قبل ان تمام مسائل پر عوامی نمائندوں کو تحریری جواب پیش کریں۔اجلاس میں قندھار تعلقہ کے بھگوان راؤ پیتھکر کے خاندان کی خصوصی تہنیت کی گئی۔ اپنے بیٹے کی شادی کے موقع پر 3 ہزار 365 افراد کا بیمہ کروا کر سماجی خدمت کی منفرد مثال قائم کرنے پر انہیں اعزاز سے نوازا گیا۔ اس موقع پر’’مہا بھوسمپادن‘‘ آن لائن نظام کا افتتاح بھی عمل میں آیا۔ اجلاس کی نظامت ضلع منصوبہ بندی افسر سدھاکر چنچانے نے انجام دی۔اجلاس کے بعد سرپرست وزیر اتل ساوے کی صدارت میں ضلع میں بجلی سے متعلق مسائل اور ان کے حل کے لیے مہاوترن کے افسران کے ساتھ ایک علیحدہ اجلاس بھی منعقد ہوا، جس میں بجلی کے مسائل کے مؤثر اور فوری حل کے لیے ضروری اقدامات کرنے پر زور دیا گیا۔