کل ہند تحریکِ پیامِ انسانیت کی جانب سے ناندیڑ کے مختلف تعلیمی اداروں میں ’’اسکرین ڈیٹاکسفیکیشن‘‘ کے عنوان سے بیداری پروگرام منعقد

ناندیڑ: 16 جولائی (محمد سرور شریف)کل ہند تحریکِ پیامِ انسانیت کی جانب سے 10 اور 11 جولائی کو ناندیڑ شہر کے مختلف اسکولوں، کالجوں اور اکیڈمیوں میں "اسکرین ڈیٹاکسفیکیشن” کے عنوان سے خصوصی بیداری پروگراموں کا انعقاد کیا گیا۔ ان پروگراموں میں طلبہ، اساتذہ، سرپرستوں اور تعلیمی اداروں کے ذمہ داران نے بڑی تعداد میں شرکت کی۔ پروگرام کا مقصد نوجوان نسل کو موبائل فون، ٹی وی، کمپیوٹر اور دیگر ڈیجیٹل اسکرینوں کے ضرورت سے زیادہ استعمال کے نقصانات سے آگاہ کرنا اور متوازن و صحت مند طرزِ زندگی کی طرف راغب کرنا تھا۔اس موقع پر کل ہند تحریکِ پیامِ انسانیت کے کوآرڈینیٹر حضرت مولانا جنید فاروقی ندوی (اورنگ آباد)، مولانا عبد الماجد صاحب (بیڑ)، مفتی الیاس صاحب (جالنہ)، حافظ عمر صاحب (عثمان آباد)، مولانا سعد عبداللہ ندوی اور محمد عمران ندوی خصوصی طور پر موجود رہے۔ اس کے علاوہ متعلقہ اسکولوں، کالجوں اور اکیڈمیوں کے ذمہ داران اور اساتذہ نے بھی بھرپور شرکت کی اور اس مہم کو وقت کی اہم ضرورت قرار دیا۔مقررین نے اپنے خطابات میں بتایا کہ اسکرین ڈیٹاکسفیکیشن سے مراد یہ ہے کہ انسان روزانہ یا مخصوص مدت کے لیے موبائل، سوشل میڈیا، ویڈیو گیمز اور دیگر ڈیجیٹل اسکرینوں کے غیر ضروری استعمال میں کمی لائے، تاکہ ذہنی سکون، جسمانی صحت، تعلیمی کارکردگی اور خاندانی تعلقات بہتر ہو سکیں۔انہوں نے واضح کیا کہ اسکرین کے حد سے زیادہ استعمال سے آنکھوں کی کمزوری، نیند میں خلل، ذہنی دباؤ، توجہ کی کمی، تعلیمی نقصان، وقت کا ضیاع اور سماجی تنہائی جیسے مسائل پیدا ہو سکتے ہیں۔ اس لیے ضروری ہے کہ روزمرہ زندگی میں اسکرین ٹائم کو محدود کیا جائے اور مطالعہ، کھیل کود، ورزش، عبادت، مثبت سرگرمیوں اور اہلِ خانہ کے ساتھ وقت گزارنے کو ترجیح دی جائے۔پروگرام کے دوران طلبہ کو اسکرین کے ذمہ دارانہ استعمال، وقت کی منصوبہ بندی اور ڈیجیٹل توازن برقرار رکھنے کے عملی طریقے بھی بتائے گئے۔ شرکاء نے اس بیداری مہم کو بے حد مفید قرار دیتے ہوئے اس طرح کے مزید پروگرام منعقد کرنے کی خواہش ظاہر کی۔تحریکِ پیامِ انسانیت فورم نے اس عزم کا اظہار کیا کہ نوجوان نسل کی ذہنی، اخلاقی اور تعلیمی ترقی کے لیے مستقبل میں بھی اس نوعیت کے اصلاحی اور بیداری پروگراموں کا سلسلہ جاری رکھا جائے گا۔