ناندیڑ: ایس آئی آر پروگرام میں غفلت ہرگز برداشت نہیں کی جائے گی

ناندیڑ: 9 جولائی(نمائندہ اعتبار)087 ناندیڑ جنوبی اسمبلی حلقہ کے تحت مجموعی طور پر 312 پولنگ اسٹیشن وارڈز میں خصوصی جامع نظرثانی (Special Intensive Revision – SIR) پروگرام پر عمل درآمد جاری ہے۔ اس کام کے سلسلے میں بار بار ہدایات جاری کیے جانے کے باوجود 18 بی ایل او (Booth Level Officer) اور 3 سپروائزروں کی کارکردگی انتہائی ناقص پائی گئی ہے، جس کے باعث ان کے خلاف قواعد کے مطابق کارروائی کا عمل شروع کر دیا گیا ہے۔ یہ اطلاع ووٹر رجسٹریشن آفیسر و سب ڈویژنل آفیسر ڈاکٹر سچن کھلّال نے دی۔انہوں نے بتایا کہ اس کام کے لیے مقرر کیے گئے بی ایل اوز اور ان کے معاونین کو ڈیوٹی پر حاضر ہونے سے روکنے والے متعلقہ اداروں کے سربراہان کو بھی وجہ بتاؤ نوٹس جاری کیے گئے ہیں۔ اگر بھارت الیکشن کمیشن کی ہدایات پر عمل نہیں کیا گیا تو عوامی نمائندگی ایکٹ 1951 کی متعلقہ دفعات کے تحت متعلقہ دفاتر کے سربراہان کے خلاف بھی محکمانہ اور قانونی کارروائی کی جائے گی۔ڈاکٹر کھلّال نے مزید بتایا کہ 25 بی ایل اوز اور 6 سپروائزروں کی کارکردگی بھی غیر اطمینان بخش پائی گئی ہے، جنہیں بھی وجہ بتاؤ نوٹس جاری کرتے ہوئے وضاحت طلب کی گئی ہے۔ اگر 10 اور 11 جولائی کے دوران ان کی کارکردگی میں مطلوبہ بہتری نہیں آئی تو بھارت الیکشن کمیشن کی ہدایات اور عوامی نمائندگی ایکٹ 1951 کی دفعات کے مطابق ان کے خلاف بھی مزید کارروائی کی جائے گی۔انہوں نے یہ بھی کہا کہ جن اسسٹنٹ ووٹر رجسٹریشن افسران کی کارکردگی تسلی بخش نہیں ہے، اگر 11 جولائی تک ان کے کام میں بہتری نہیں آتی تو ان کے خلاف کارروائی کی سفارش ضلع کلکٹر و ضلع الیکشن آفیسر راہل کرڈیلے کو ارسال کی جائے گی۔ڈاکٹر سچن کھلّال نے واضح کیا کہ خصوصی جامع نظرثانی (SIR) پروگرام کے لیے مقرر تمام بی ایل اوز، ان کے معاونین، سپروائزروں اور اسسٹنٹ ووٹر رجسٹریشن افسران کے لیے ضروری ہے کہ وہ بھارت الیکشن کمیشن کی جانب سے مقررہ ٹائم ٹیبل کے مطابق مقررہ مدت میں اپنا کام مکمل کریں۔ انہوں نے خبردار کیا کہ کام میں لاپروائی یا تاخیر کرنے والے کسی بھی افسر یا ملازم کے ساتھ کوئی نرمی نہیں برتی جائے گی، بلکہ ان کے خلاف سخت انتظامی اور قانونی کارروائی عمل میں لائی جائے گی۔