اردو صحافت کا ایک درخشاں باب اختتام پذیر

اردو صحافت، ادبی دنیا اور سماجی حلقوں کے لیے یہ خبر انتہائی افسوسناک اور دل کو مغموم کرنے والی ہے کہ معروف صحافی، بہترین مقرر، گل بوٹے کے مدیر، خادمِ اردو اور کیویز ٹائم ممبئی کے ممتاز اینکر *فاروق سید*
ہمیں داغِ مفارقت دے گئے۔
ان کا انتقال صرف ایک فرد کا انتقال نہیں بلکہ اردو زبان، صحافت اور تہذیبی اقدار کے ایک روشن چراغ کا بجھ جانا ہے۔ مرحوم نے اپنی پوری زندگی علم، ادب، صحافت اور سماجی بیداری کے لیے وقف کردی تھی۔ وہ ان شخصیات میں شامل تھے جنہوں نے خاموشی سے مگر نہایت خلوص کے ساتھ اردو زبان کی خدمت انجام دی۔
فاروق سید ایک باوقار صحافی ہونے کے ساتھ ساتھ نہایت شائستہ مقرر بھی تھے۔ ان کی گفتگو میں علم کی گہرائی، زبان کی مٹھاس اور فکر کی سنجیدگی نمایاں ہوتی تھی۔ وہ جب کسی موضوع پر اظہارِ خیال کرتے تو سامعین ہمہ تن گوش ہوجاتے۔ ان کی تقریروں میں معاشرتی شعور، اخلاقی اقدار اور انسان دوستی کا پیغام نمایاں رہتا تھا۔
بطور مدیر گل بوٹے انہوں نے ادبی صحافت کو نئی جہت عطا کی۔ انہوں نے بے شمار ادیبوں، شاعروں اور نوجوان قلم کاروں کی حوصلہ افزائی کی اور اردو ادب کے فروغ میں اہم کردار ادا کیا۔ اسی طرح کیویز ٹائم ممبئی کے اینکر کی حیثیت سے ان کا منفرد انداز، متوازن تجزیہ اور شائستہ لب و لہجہ عوام میں بے حد مقبول تھا۔
مرحوم نہایت ملنسار، مخلص اور درد مند انسان تھے۔ ان کی شخصیت میں عاجزی، محبت اور خلوص نمایاں تھا۔ وہ جہاں بھی رہے، لوگوں کے دلوں میں محبت اور احترام پیدا کرتے رہے۔ ان کے انتقال سے اردو صحافت اور ادبی دنیا میں جو خلا پیدا ہوا ہے، اسے مدتوں محسوس کیا جاتا رہے گا۔
آج ان کے چاہنے والے، دوست احباب، صحافتی حلقے اور ادبی دنیا غم میں ڈوبی ہوئی ہے۔ ہر آنکھ اشکبار ہے اور ہر زبان پر ان کے لیے دعائے مغفرت جاری ہے۔
اللہ تعالیٰ مرحوم فاروق سیدکی کامل مغفرت فرمائے، ان کی خدمات کو صدقۂ جاریہ بنائے، انہیں جنت الفردوس میں اعلیٰ مقام عطا فرمائے اور ان کے اہلِ خانہ و متعلقین کو صبرِ جمیل نصیب فرمائے۔(آمین)
شریک غم :عارف محمد خان ، جلگاؤں