عریشہ فاطمہ کی شاندار کامیابی

پربھنی:9؍مئی ( ضلع نامہ نگار اعتبار نیوز محمد سرور شریف )سونیا گاندھی ہائی اسکول، پربھنی کی ہونہار طالبہ عریشہ فاطمہ سید اشفاق نے جماعت دہم کے سالانہ امتحان میں شاندار کامیابی حاصل کرتے ہوئے 87 فیصد نمبرات کے ساتھ اسکول میں اول مقام حاصل کیا۔ اس نمایاں کامیابی پر اہلِ خانہ، اساتذہ اور عزیز و اقارب میں خوشی کی لہر دوڑ گئی۔عریشہ فاطمہ نے اپنی کامیابی کا سہرا والدین کی دعاؤں، اساتذہ کی رہنمائی اور مسلسل محنت کو دیا۔ انہوں نے نہایت لگن اور مستقل مزاجی کے ساتھ اپنی تعلیم جاری رکھی، جس کا بہترین نتیجہ آج سب کے سامنے ہے۔ اسکول انتظامیہ نے بھی ان کی اس کامیابی کو قابلِ فخر قرار دیتے ہوئے مبارک باد پیش کی اور کہا کہ عریشہ فاطمہ دیگر طلبہ کے لیے ایک بہترین مثال ہیں۔اس خوشی کے موقع پر گھر کے تمام افراد نے انہیں دل کی گہرائیوں سے مبارک باد دی اور ان کے روشن مستقبل کے لیے نیک تمناؤں کا اظہار کیا۔ والدین نے کہا کہ بیٹی کی یہ کامیابی پورے خاندان کے لیے باعثِ مسرت اور فخر ہے۔ خاندان کے بزرگوں اور رشتہ داروں نے بھی دعا کی کہ اللہ تعالیٰ عریشہ فاطمہ کو آنے والی زندگی میں مزید کامیابیاں، عزت، ترقی اور کامرانی عطا فرمائے۔