ملکاپور میں عازمینِ حج کے اعزاز میں شاندار استقبالیہ و دعوتِ طَعام

ملکاپور :12/ اپریل (محمد احسان سر ): ملکاپور تعلقہ کے بدنیرا، بسوہ، ناندورہ اور موتلا علاقوں سے تعلق رکھنے والے عازمینِ حج کے اعزاز میں ایک پروقار استقبالیہ و دعوتِ طَعام کا اہتمام کیا گیا۔ یہ تقریب الحاج محمد عثمان نور ماسٹر (بارہ داری، ملکاپور)، نائب صدر بلڈھانہ ضلع کانگریس کمیٹی اقلیتی شعبہ، کی جانب سے ان کی رہائش گاہ پر منعقد ہوئی۔تقریب کا آغاز صبح 11 بجے ایک خصوصی مجلس سے ہوا، جس میں عازمینِ حج کے لیے نورانی بیان پیش کیا گیا۔ اس موقع پر حج کے اہم امور، ضروری ہدایات اور دیگر دینی موضوعات پر روشنی ڈالی گئی۔ مجلس کے اختتام پر عازمینِ حج کے لیے خصوصی دعاؤں اور نیک تمناؤں کا اظہار کیا گیا. بعد ازاں دوپہر 12 بجے استقبالیہ تقریب کا انعقاد عمل میں آیا، جہاں عازمینِ حج کا پُرجوش استقبال کیا گیا. مہمانوں کے اعزاز میں پرتکلف ضیافت کا بھی اہتمام کیا گیا، جس سے حاضرین نے بھرپور لطف اٹھایا. اس موقع پر الحاج محمد عثمان نور ماسٹر نے تمام عازمینِ حج اور مہمانانِ گرامی کا شکریہ ادا کرتے ہوئے ان کی شرکت کو باعثِ سعادت قرار دیا۔ مہمانوں نے بھی اس بابرکت محفل کے انعقاد پر میزبان اور ان کے اہلِ خانہ کا تہہ دل سے شکریہ ادا کیا.تقریب کا اختتام دعاؤں اور نیک تمناؤں کے ساتھ ہوا، اور حاضرین نے عازمینِ حج کے کامیاب و مقبول سفرِ حج کے لیے دعا کی.