میونسپل کارپوریشن میں مردم شماری کی تیاریوں کا جامع جائزہ، درستگی اور شفافیت پر زور

پربھنی:4؍اپریل (ضلع نامہ نگاراعتبار نیوز محمد سرور شریف):آئندہ مردم شماری کے پیشِ نظر میونسپل کارپوریشن پربھنی میں جمعرات (2 اپریل) کو ایک اہم اور جامع جائزہ اجلاس منعقد ہوا، جس میں مردم شماری سے متعلق تیاریوں، ڈیٹا جمع کرنے کے عمل اور اس کی درستگی کو یقینی بنانے کے مختلف پہلوؤں پر تفصیلی غور و خوض کیا گیا۔اجلاس میں ضلع کوآرڈینیٹر سندیپ کلکرنی نے خصوصی طور پر شرکت کرتے ہوئے جاری کاموں کا باریک بینی سے جائزہ لیا۔ میٹنگ کے آغاز پر میونسپل کارپوریشن کی جانب سے ان کا پرتپاک استقبال کیا گیا۔ اس موقع پر کمشنر نتن نارویکر، ڈپٹی کمشنر پرگیونت کامبلے، اسسٹنٹ مردم شماری سربراہ منظور حسن، وارڈ کمیٹی مردم شماری کے سربراہ زبیر ہاشمی، الکیش دیش مکھ، اویز ہاشمی سمیت دیگر سٹی مردم شماری افسران موجود تھے۔اس کے علاوہ رامیشور کلکرنی اور اسسٹنٹ ٹیکنیکل آفیسر شیخ ارشد بطور مہمانِ خصوصی شریک ہوئے۔ اجلاس کے دوران مردم شماری کی تیاریوں سے متعلق اہم امور جیسے گھریلو سطح پر ڈیٹا جمع کرنا، شہریوں کی درست رجسٹریشن، ڈیٹا انٹری میں شفافیت اور تکنیکی تقاضوں کی تکمیل پر خصوصی توجہ مرکوز کی گئی۔ضلع کوآرڈینیٹر سندیپ کلکرنی نے افسران کو ہدایت دی کہ مردم شماری جیسے حساس اور قومی اہمیت کے حامل عمل میں کسی بھی قسم کی لاپروائی برداشت نہیں کی جائے گی۔ انہوں نے ہر مرحلے پر معلومات کی مکمل تصدیق کو لازمی قرار دیتے ہوئے کہا کہ درست اعداد و شمار ہی مؤثر حکومتی پالیسی سازی کی بنیاد بنتے ہیں۔اجلاس میں اس بات پر بھی زور دیا گیا کہ تمام متعلقہ محکمے باہمی تال میل کے ساتھ کام کریں تاکہ کسی بھی قسم کی غلطی یا کمی کو بروقت دور کیا جا سکے۔ شہریوں میں بیداری پیدا کرنے اور انہیں درست معلومات فراہم کرنے کے لیے بھی خصوصی مہم چلانے کی ضرورت پر اتفاق کیا گیا۔مزید برآں مختلف وارڈز میں جاری کام کا جائزہ لیتے ہوئے بعض خامیوں کی نشاندہی کی گئی، جنہیں فوری طور پر درست کرنے کی ہدایات جاری کی گئیں۔ اجلاس کے اختتام پر اس عزم کا اظہار کیا گیا کہ مردم شماری کے عمل کو مکمل شفاف، منظم اور مؤثر بنانے کے لیے آئندہ بھی اس نوعیت کے جائزہ اجلاس باقاعدگی سے منعقد کیے جاتے رہیں گے۔