بنیادی سہولیات کو مضبوط بنانے کے لیے ٹھوس فیصلے ناگزیر : وزیر سنجے راٹھوڑ

ناندیڑ:20؍مارچ (نمائندہ اعتبار)ملک اور ریاستی سطح پر بنیادی سہولیات کو مضبوط بنانے کے ساتھ ساتھ عوام کے مسائل حل کرنے کے لیے حکومت کی جانب سے ٹھوس اور پالیسی پر مبنی فیصلے کیے جا رہے ہیں، ایسا اظہارِ خیال ریاست کے مٹی و آبی تحفظ (مرد و جل سنرکشن) کے وزیر سنجے راٹھوڑ نے کیا۔وہ ماہور تعلقہ میں دریائے پین گنگا کے پاٹ میں تعمیر کیے جانے والے شکتی پیٹھ بندھارے کے سنگ بنیاد پروگرام کے موقع پر خطاب کر رہے تھے۔ اس موقع پر دکشا گرو پریم سنگھ جی (باپو) مہاراج کے ہاتھوں سنگ بنیاد عمل میں آیا۔ اس تقریب میں رکن اسمبلی بھیم راؤ کیرام، رکن اسمبلی بابوراؤ کوہلیکر، رکن اسمبلی کسان راؤ وانکھیڑے، نگر ادھیکش فیروز دوسانی، سابق ضلع پریشد نائب صدر سمادھان جادھو، دھرم سنگھ راٹھوڑ سمیت دیگر معززین موجود تھے۔وزیر راٹھوڑ نے کہا کہ ماہور گڑھ پر ہر سال لاکھوں عقیدت مند آتے ہیں اور دریائے پین گنگا میں اسنان کرتے ہیں، لیکن ضروری سہولیات کی کمی تھی۔ شکتی پیٹھ بندھارے کے ذریعے عقیدت مندوں کو مختلف سہولیات فراہم کی جائیں گی اور یہ پروجیکٹ ایک سال کے اندر مکمل ہونے کی امید ہے۔ انہوں نے یہ بھی واضح کیا کہ ترقیاتی کاموں کی وجہ سے کسانوں کو نقصان نہ ہو، یہ حکومت کی پالیسی ہے۔رکن اسمبلی بھیم راؤ کیرام نے بتایا کہ پریم سنگھ جی (باپو) مہاراج کی جانب سے مفت زمین فراہم کیے جانے کے باعث ضلع منصوبہ بندی کمیٹی کے تقریباً 3 کروڑ 50 لاکھ روپئے کے فنڈ سے یہ پروجیکٹ نافذ کیا جا رہا ہے۔ اس بندھارے میں اسنان گھاٹ، ریلنگ، روشنی کا نظام، حفاظتی دیوار، پارکنگ اور سبھا منڈپ جیسی سہولیات شامل ہوں گی۔ اس کے علاوہ اس مٹھ کے لیے 10 کروڑ روپئے کے فنڈ کا مطالبہ بھی حکومت سے کیا گیا ہے۔انہوں نے مزید بتایا کہ حلقۂ اسمبلی میں تقریباً 1100 کروڑ روپئے کے فنڈ سے تین ہائی لیول بندھارے تعمیر کیے جا رہے ہیں، جن میں سب سے بڑا پروجیکٹ کنوٹ۔ماہور حلقہ میں ہو رہا ہے۔ دھنودا ہائی لیول بندھارا مکمل ہونے کے بعد ماہور میں پانی کی قلت بڑی حد تک کم ہو جائے گی۔اسی طرح سہستر کنڈ پروجیکٹ کی منظوری کے لیے تجویز حکومت کو پیش کی گئی ہے، جس کے ذریعے تقریباً 22 ہزار ہیکٹر رقبہ زیرِ آبپاشی آئے گا۔اس موقع پر رکن اسمبلی بابوراؤ کوہلیکر اور کسان راؤ وانکھیڑے نے بھی اپنے خیالات کا اظہار کیا، جبکہ پروگرام کا ابتدائیہ سودھاکر کچکلواڑ نے پیش کیا۔