نوجوان مہارت پر مبنی صنعت کاری کے مواقع سے فائدہ اٹھائیں: وائس چانسلر ڈاکٹر منوہر چاسکر

ناندیڑ:15 ؍جولائی(نمائندہ اعتبار) نوجوانوں کو چاہیے کہ وہ خود پر اعتماد رکھتے ہوئے نئی سوچ اور مہارت کی بنیاد پر صنعت کاری کے مواقع سے بھرپور فائدہ اٹھائیں۔ یہ اپیل سوامی رامانند تیرتھ مراٹھواڑہ یونیورسٹی کے وائس چانسلر ڈاکٹر منوہر چاسکر نے کی۔ عالمی یومِ نوجوان مہارت 2025 ء کا جشن آج ضلع کلکٹر آفس کے پلاننگ ہال میں نہایت جوش و جذبے اور حوصلہ افزا ماحول میں منایا گیا۔ اس پروگرام کا انعقاد ضلع اسکل ڈیولپمنٹ، ایمپلائمنٹ اینڈ انٹرپرینیورشپ گائیڈنس سینٹر ناندیڑ کی جانب سے کیا گیا تھا، جس کا افتتاح ڈاکٹر چاسکر نے کیا۔ اس موقع پر ضلع کلکٹر راہول کرڈیلے صدارت پر فائز تھے۔ڈاکٹر چاسکر نے نوجوان طلبہ میں خود اعتمادی پیدا کرنے والے خیالات پیش کرتے ہوئے کہا کہ مہارت صرف نوکری حاصل کرنے کا ذریعہ نہیں بلکہ یہ نئی راہیں کھولنے کا مؤثر وسیلہ بھی ہے۔ ضلع کلکٹر راہول کرڈیلے نے نوجوانوں کو مہارت کی اہمیت سے روشناس کراتے ہوئے انہیں نئی ملازمتوں اور کاروباری مواقع تلاش کرنے کی ترغیب دی۔پروگرام میں مختلف سرکاری اسکیموں کا تعارف پیش کیا گیا۔ مقامی کامیاب صنعت کاروں نے رہنمائی کے سیشن میں اپنے کاروباری سفر کی روداد سناتے ہوئے نوجوانوں کو متاثر کیا، جن میں نلنکٹھ کونکنے (ایل ای ڈی لائٹس مینوفیکچرنگ، نرسی)، شیوہار کرنکے (منرل واٹر بوٹل پروڈکشن)، محترمہ ساوتا مورے (خوشبودار تیل کی تیاری)، محمد زید (کولڈ ڈرنکس، ناندیڑ)، ایکونت گوودوار (مصالحہ صنعت، ناندیڑ)، محترمہ دیوکی نندا (کھادی مصنوعات) اور شبھم پوار (کوکم سوفٹ ڈرنک) شامل تھے۔پروگرام کا آغاز روایتی چراغ روشن کرنے سے ہوا۔ اس میں RSETI، NULM، خواتین اقتصادی ترقی کارپوریشن، ضلع انڈسٹری سینٹر، زراعت اور سماجی بہبود جیسے مختلف محکموں کی اسکیموں پر رہنمائی فراہم کی گئی۔ اس پروگرام کی ترتیب اسکل ڈیولپمنٹ، ایمپلائمنٹ اینڈ انٹرپرینیورشپ گائیڈنس سینٹر کے اسسٹنٹ کمشنر ڈاکٹر راجپال کولہے کی رہنمائی میں کی گئی۔ نوجوان لڑکے اور لڑکیوں کے لیے یہ پلیٹ فارم نہ صرف رہنمائی اور تحریک کا ذریعہ بنا بلکہ صنعت کاری کی طرف ایک اہم سنگِ میل ثابت ہوا۔