سماجی ہم آہنگی اور امن برقرار رکھنے کے لیے سب کو مل کر کام کرنا ہوگا: کلکٹر ابھیجیت راؤت

ناندیڑ:12؍دسمبر ( نمائندہ اعتبار) ضلع میں امن و امان کو برقرار رکھنے کے لیے سماج کی تمام امن پسند قوتوں کو متحد ہوکر کام کرنا چاہیے۔ قانون و انتظام کے بگاڑ کو روکنے کے لیے انتظامیہ کا تعاون ضروری ہے۔ یہ اپیل کلکٹر ابھیجیت راؤت اور ضلع پولیس سپرنٹنڈنٹ ابیناش کمار نے آج یہاں کی۔پر بھنی کے واقعہ کے بعد آج ناندیڑ میں امن کمیٹی کی میٹنگ منعقد ہوئی۔ اس میٹنگ میں کلکٹر نے یہ اپیل کی۔ میٹنگ کے اختتام پر آئین کے دیباچے کا اجتماعی طور پر مطالعہ کیا گیا۔ناندیڑ کے شہریوں کی فطرت ہمیشہ سے امن پسند رہی ہے۔ شہر میں امن قائم رکھنے کے لیے تمام برادریوں کے افراد نے ہمیشہ تعاون کیا ہے۔ پر بھنی کا واقعہ قابل مذمت ہے، لیکن اس پر کسی بھی غلط یا منفی ردعمل کو فروغ نہ دیا جائے۔ سماجی ذمہ داری کے تحت اچھے پہلو کو اپنانا اور برے کو چھوڑ دینا چاہیے تاکہ ضلع میں امن و امان برقرار رہے۔ کلکٹر ابھیجیت راؤت نے یہ اپیل کرتے ہوئے کہا کہ ہمیں اس کے لیے سب مل کر کوشش کرنی چاہیے۔ناندیڑ ضلع سطحی امن کمیٹی کا جائزہ اجلاس آج ضلع پلاننگ ہال میں کلکٹر ابھیجیت راؤت کی صدارت میں منعقد ہوا۔ اس موقع پر کلکٹر نے خطاب کیا۔ اجلاس میں ضلع پولیس سپرنٹنڈنٹ ابیناش کمار، ناندیڑ کے ایڈیشنل پولیس سپرنٹنڈنٹ سورج گرو، اسسٹنٹ پولیس سپرنٹنڈنٹ کرتیکا، ریزیڈنٹ ڈپٹی کلکٹر مہیش وڑدکر، کمیٹی کے رکن دُشینت سونالے، بھنتے پَیابودھی جی، ہپی کلب کے صدر محمد شعیب، سینئر صحافی الطاف ثانی، محمد وسیم محمد قاسم، نندکمار کلکرنی، اور مختلف کمیونٹیز کے معزز افراد موجود تھے۔ضلع میں کسی بھی ناخوشگوار واقعے کو روکنے کے لیے امن کمیٹی کی یہ میٹنگ منعقد کی گئی۔ بھارتی آئین کی تشہیر و اشاعت کے لیے عوامی بیداری مہم کو فروغ دیا جائے گا۔ اس مہم کو عوامی تحریک میں تبدیل کرنے کی کوشش کی جائے گی۔ ناندیڑ میں آئین بھون تعمیر کرنے کی تجویز حکومت کو پیش کی گئی ہے، اور جلد ہی ناندیڑ میں آئین بھون تعمیر ہوگا، ان خیالات کا اظہار کلکٹر نے کیا۔ شہری اگر پولیس کے ساتھ تعاون کریں تو ناندیڑ میں کوئی منفی سرگرمی نہیں ہوگی۔ اس موقع پر ضلع پولیس سپرنٹنڈنٹ ابیناش کمار نے ضلع میں امن و امان کی موجودہ صورت حال سے متعلق معلومات فراہم کیں۔ امن و امان کے حوالے سے منصوبہ بندی پر تبادلہ خیال کیا گیا۔ اجلاس میں دی گئی مختلف تجاویز کو اعلیٰ حکام تک پہنچایا جائے گا۔ پر بھنی واقعہ کے بعد کچھ امور پر سبھی کو قابو رکھنا ہوگا۔ عوامی اور ذاتی املاک کو نقصان سے بچانے کے لیے ہر حرکت پر کیمروں کے ذریعے نظر رکھی جا رہی ہے۔ احتجاج یا مظاہروں کے بارے میں انتظامیہ کو پیشگی اطلاع دے کر ان میں ہم آہنگی پیدا کی جائے۔ اس کے لیے ضروری تحفظ پولیس فراہم کرے گی۔ بند سے غریبوں اور چھوٹے تاجروں کو نقصان ہوتا ہے، لہٰذا شہریوں کو بند کا اعلان نہیں کرنا چاہیے۔ ضلع میں قانون و امان کو برقرار رکھنے کے لیے پولیس 24 گھنٹے آپ کے ساتھ ہے اور تمام شہریوں کو تعاون کرنا چاہیے، ان خیالات کا اظہار ضلع پولیس سپرنٹنڈنٹ ابیناش کمار نے کیا۔ ناندیڑ میں امن قائم رکھنے کے لیے تمام شرکا نے عہد کیا کہ وہ عظیم رہنماؤں کے امن کے پیغام پر عمل کریں گے۔ آخر میں کلکٹر ابھیجیت راؤت نے آئین کے دیباچے کا مطالعہ کیا اور سب سے اپیل کی کہ امن برقرار رکھنے کے لیے جدوجہد جاری رکھیں۔